Tati pu che, ¿chemu illamkachekey? Petu ñi kimnofiel rume ti che illamkakefi tañi tuwün kam ñi kewün ñi dungukeel. Welu fey ka müten no, tati pu che ka illamkangekey tañi religion mu, tañi wentrungen ka domongen mu kam ñi nieel kam ñi nienoel plata. Kakelu illamkakefi ta che tañi educacion mu, tañi ad mu kam tunten tripantu ñi nieel. Feychi che illamkachekelu ngüneduamkelay rume ñi weda femmeken.

Fey eymi, ¿ka femngechi chengeymi? Kiñeke mu ngüneduamlayafuymi rume tami illamkacheken. Kom iñchiñ weda rakiduamafuiñ kiñe che mew petu taiñ kimnofiel. Ti profesor David Williams feypi ta kiñe che weda trokiafuy kiñe trokiñche, fey kimfile kiñe che koneltulelu fey mu, küme llowlayafuy fey nguneduamlayafuy rume ñi küme llownofiel.

Ngüneduamnge ñi rupan kiñe wentru Jovica pingelu, mülelu Europa mapu mu. Tañi mapu mu müley kiñe trokiñche ka tuwün-ngelu. Fey kidu feypi: “Iñche rakiduamkefun feychi trokiñche mew kiñe che no rume küme piwkengelay, kimfalngefuy tañi femngechi chengen engün. Feymu ‘kümey tañi feypin’ pikefun, welu ngüneduamlafun rume tañi weda rakiduammeken tüfa engün mew”, pi tüfachi wentru.

Fentren gobierno elkey kiñeke ley dungu ñi illamkangewenoal tati pu che ka tuwün ngelu, welu ¿chum tripay tüfa? Weda tripay. Petu illamkangekey ta che ¿chumngelu? Kiñe ley dungu katrütuafuy ta che ñi femal wedake dungu, welu katrütulayafuy ñi nienoal wedake rakiduam. Feymu tati pu che ka rakiduam nietunole, amuleay müten tañi illamkacheken. Fey ¿puway may chi antü ñi mülewenoal illamkawün? Eymi illamkachelmi, ¿chumafuymi tami femwenoal?