Rupalu quiñe hora ñi choyüngen quiñe hue püñeñ, müna falin-ngei ñi fülmaucüleal tañi ñuque engu. ¿Chumngelu? Ti ñuque ñi ayücamequefiel tañi pichiche quellueyu ñi cüme tremcülerpual feichi hunen hora mu. *

Pu ñuque, ¿chumngelu fente cüme duamniefi tañi hue püñeñ? Quiñe domo adümuuquelu, Jeannette Crenshau pingelu, feipi: “Pu ñuque ayücaniefilu, leliniefilu ca moyolfilu tañi pichiche, doi pütrüquei ti hormona oxitocina tañi cuerpo mu. Tüfa quellueyu ti ñuque ñi doi piuqueyeafiel tañi hue püñeñ” (The Journal of Perinatal Education). Feichi mu, ca quiñe hormona quellueyu tati ñuque ñi quiñeucülerpual tañi püñeñ engu, feimu doi duamniefi ca poyeniefi. ¿Chem quimeltuqueiñmu tüfa?

Taiñ poyen Chau Jehová * deumafi ti domo ca tañi pichiche ñi rume piuqueyehual engu. Tati lonco ülmen David feipi Chau Dios entueteu tañi ñuque ñi pütra meu, ca petu metanieteu ñi ñuque cüme duamcülefui, Chau Dios ñi dapieteu troquiuquefui. Fei David llellipui: “Tañi choyüngen mu elfalcünungen tami cuñiutucuafiel; petu ñi mülen tañi ñuque ñi pütra mu, eimi iñche tañi Ngünechen ngeimi” (Salmo 22:9, 10).

NGÜNEDUAMNGE: Chau Dios deumai ti domo ñi dapiafiel ca duamnieafiel tañi püñeñ piuqueyen mu, fei “Ngünechen ñi tuhunche ta iñchiñ”, quisu doyelchi mai duamnieaiñmu tati (Hechos 17:29).

Jesucristo cüme quimniefi tañi Chau, feimu feipi: “Rume pichi falifui engün rume tati pu pichique üñüm, huelu quiñe no rume ütrüfnaglayafui engün pinofule tamün Chau. Feimeu ta llicaquilmün. Fei eimün tamün cal lonco cütu ta raquinieñmaeimünmeu re quiñeque, eimün am doi falilu fentren pichique üñüm meu” (Mateo 10:29-31).

Pichin che müten ngüneduamquefi pu pichique üñüm, ca ngüneduamquelafi rume quiñe pichi üñüm ñi ütrüfnagün mapu mu. Huelu taiñ Huenu Chau ngüneduamquefi caque quiñeque üñüm cütu. Quisu mu quiñe che doi fali ta fentren üñüm meu. Fei llicalayaimi tami duamnienoeteu Chau Ngünechen, doi mai piuquentucuaimi tüfa: ¡quisu duamnieimu llemai!

 Biblia feipi

• “Jehová lelimequelu am com huall Mapu meu ñi pengelal tañi nehuen ñi füreneafiel feichi che poyequeteu com tañi piuque mu” (2 CRÓNICAS 16:9).

• “Jehová tañi nge puuquintuquefi tati pu nor piuquengelu, ca tañi pilun allcütuquei ñi eyütulequen engün tañi quelluafiel” (SALMO 34:15).

• “Tami nor piuqueyen ayühulpiuqueeneu, penielu cai eimi tañi hueñancülen; ca cüme quimnieimi iñche tañi fütra cutrantupiuquelen” (SALMO 31:7).

Piuquentuculmi Chau Dios tami duamnieteu ca tami cuidanieteu piuqueyen mu, ¿doi cüme duamcüleafuimi? ¡Felei! Doi cüme duamcüleaimi llemai. Tüfa ñi feipiel quiñe domo Ana * pingelu, Inglaterra mapu mu mülelu:

“Afquentu raquiduamquefun Jehová tañi piuqueyenoeteu, ca quisu tañi allcütuñmanoeteu tañi ngillatun, cüme feyentunolu am iñche. Chau Dios castigaeneu troquiuquefun, ca tañi müte falintuuquenon mu quisu famentueneu. Fei duamtulaeneu Ngünechen piquefun”.

Huelu famülque meu Ana femngechi raquiduamhuelai. Fei, ¿chem quellueyu ñi cüme duamcüleal? Quisu feipi: “Ñochiquechi calerputui tañi raquiduam. Cuifi allcütun quiñe hueupin ngüneduamlu Jesús ñi lan, tüfa puhui tañi piuque mu. Fei quellueneu ñi loncontucual Jehová tañi piuqueyeteu. Ngüneduamlu iñche Chau Dios tañi huiñoldungueteu tañi ngillatufiel, ngümarumequen pefiel Jehová tañi piuqueyeteu. Cafei tañi chillcatuquen Biblia ca tañi amuquen cristiano trahun mu müna quimeltueneu Jehová mu, quisu tañi chumngen ca taiñ duamnieteu. Feula ngüneduamün chumngechi quelluqueiñmu ca piuqueyequeiñmu Jehová, ca tañi cüpa cuidaqueteu caque quiñeque iñchiñ”.

¡Müna yafültucuqueiñmu Ana tañi feipiel! Huelu, ¿feipiafuiñ mai Jehová tañi cüme quimniefiel taiñ rupamequen ca taiñ chum duamcülen? Ngüneduamaiñ tüfa ti cüpalechi chillcatun mu.