Afmatufali Chau Dios chumngechi ñi deumafiel taiñ cuerpu quisutu cümelcautuquelu am. Fei quiñe troquiñ taiñ cuerpo mu allfülngele, caulitungele cam catarumengele, “fillque dungu ruparupangeai ponhuitu taiñ cuerpu mu, fei quisutu ñi cümelcautual alüconfule rume ti allfeñ” (Johns Hopquins Medicine). Taiñ cuerpo matu catrümollfüñquei, fei ñi tremoltuafiel taiñ allfeñ ca trahua.

NGÜNEDUAMNGE: Chau Dios deumai taiñ cuerpo ñi quisutu cümelcautual, feimu maneluhuafuiñ quisu mu taiñ quelluaeteu ñi cutrantupiuquehuenoal. Biblia feipi “[Jehová] tremolmequefi tati pu cutrantupiuquelelu, impolmamequefi tañi allfeñ” (Salmo 147:3). Huelu huesa duamelelmu fill huesaque dungu tami rupan, ¿feyentuafuimi Chau Dios tami quelluaeteu eimi tami cutrantupiuquehuenoal famülque mu ca cüpalechi antü meu?

Chau Dios feipicünui: “Llicaquilnge, iñche am eimi mu mülen. Fill raquiduamcülequilnge, iñche am eimi tami Ngünechen. Iñche ta yafülayu, mai, iñche ta quelluayu” (Isaías 41:10). Fei feyentuliyiñ Chau Ngünechen taiñ cuidanieteu, cüme duamcüleaiñ ca chaftuafiyiñ fill huesaque dungu. Apostol Pablo nütramcalu tüfachi felen taiñ nieafel, feipi: “Ngünechen eluaimünmeu quisu tañi cüme tüngün [cüme felen], fei tüfachi fütra cüme tüngün ta doi cümei che ta pepil-layafui ñi nieal ta cüme tüngün”. Pablo ca feipi: “Femngechi tañi pengelelal tüfachi fütra pepiluhun ñi tripanon ta iñchiñ meu, huelu mai ñi cüpan ta Ngünechen meu” (Filipenses 4:4-7, 9; 2 Corintios 4:7).

Biblia quelluqueiñmu taiñ feyentual Chau Jehová tañi feipicünuel pu che ñi cüme feleal. Fei Apocalipsis 21:4, 5 feipi chem chumai Chau Dios ca chumngelu maneluhuafuiñ quisu mu ñi femürpual tüfa:

• Com pu che “ancümüñmangetuai engün tañi cülleñu”. Chau Jehová apümcayafi taiñ cutrancaucülen ca itrocom dungu taiñ raquiduamelqueteu caque quiñeque iñchiñ, feichi dungu cütu ñi falintunofiel caquelu che.

• Chau Ngünechen “fei tati anülelu ti ülmen huancu meu”. Fente tañi nehuen-ngen, quisu apümcayafi fill dungu taiñ huesalcayafeteu ca eluaiñmu taiñ duamnieelchi quellu.

• Chau Dios feipi: “Fei tüfa ta rüfngechi dungu ca felei tañi manelngeal”. Fei coilatuquenolu am Chau Dios, maneluhuafuiñ quisu ñi femürpual com tañi feipicünuel.

“Ancümüñmangetuai engün tañi cülleñu, fei ngehuelayai ta lan, ngüman no rume, eyütun no rume, cutrantun no rume. Itrocom tati mülequefulu am ta cuifi deu ta mülehuetunolu. Fei tati anülelu ti ülmen huancu meu feipi: ‘Iñche ta itrocom mülelu huecünutuafiñ’. Fei hula ca femngechi feipi: ‘Huirintucufinge tañi feipiaelchi dungu, fei tüfa ta rüfngechi dungu ca felei tañi manelngeal’” (Apocalipsis 21:4, 5).

Taiñ Huenu Chau ñi deumael ca tati Biblia pengeli quisu ñi cüme chumngen. Fei ngüneduamfiliyiñ ñi deumael, tüfa quelluaiñmu taiñ cüme hueniyeafiel. Huelu doi quelluaiñmu ngüneduamal Biblia ñi feipin: “Fülconmün ta Ngünechen meu, fei quisu fülconai ta eimün meu” (Santiago 4:8). Hechos 17:27 feipi: “Ngünechen ñi alü camapulenon caque quiñeque iñchiñ meu”.

Fei eluhulmi tami doi quimafiel ta Chau Dios, doi feyentuaimi quisu tami “piuqueyenieteu” (1 Pedro 5:7). Femngechi feyentulmi, ¿chumngechi quelluafeimu?

Ngüneduamnge Catsuo ñi rupan. Quisu tremümngei Japón mapu mu, ca cristianangefulu rume tañi ñuque, Catsuo coni quiñe troquiñche mu müna huesalcachequelu. Feimu feipi: “Chau Dios üdeeteu troquiufun, ca lalu quiñeque tañi pu che ca tañi pu hueni, castigaeneu Ngünechen piquefun, doi mai lalu quiñe che tañi piuqueyefiel”. Fente ñi huesañmangen pu che tañi huallmanieteu, Catsuo feipi: “Cüme piuquengelafun”. Nütramcalu tañi cüpa femürpun, quisu feipi: “Langümfili quiñe che doi huesañmangelu iñche mu troquingelu, fei yamfalngeafun, huechengen lafuli rume”.

 Huelu Catsuo ca tañi domo eluhuingu ñi quimeltulelngeal Biblia. Tüfa quellueyu ñi cüme elcünutual tañi mongen ca doi cüme chengerpual. Tañi domo feipi: “Ngüneduamün tañi huentru ñi hue cüme mongen nietun”. Feula Catsuo feipi: “Cüme feyentuquen Chau Dios ñi duamniefiel caque quiñeque iñchiñ, ca ñi ayüquenon pu che ñi layal. Quisu eluuquei ñi huiñoduamtuafiel pu rüf huiñoraquiduamtulu tañi huelulcan mu. Feyentuquen Chau Dios ñi cüme allcütuqueel taiñ nütramcalelfiel, pu che adümnole rume chem taiñ raquiduamqueel. Pichilehuei Jehová ñi apümcayafiel fill cutrancahun, ca chem rume taiñ cutrantupiuqueleleteu. Famülque mu cütu, Jehová femafui tunte iñchiñ raquiduam mu üngümcülenoel rume. Ca cutrantupiuqueleliyiñ, quisu cuidayaiñmeu ca quelluaiñmeu” (Salmo 136:23).

Catsuo ñi rupan quimeltuqueiñmeu ñi falin-ngen maneluhual Chau Dios mu. Fei pichilehuei quisu tañi apümcayafiel taiñ cutrancaucülen ca tañi ancümüñmatuafiel taiñ cülleñu, tüfa cüme duamelqueiñmu famülque mu, ca eluqueiñmu maneluhun taiñ doi cüme feleal. Feingei llemai, ruparupangelu rume huesaque dungu Mapu meu, müna cümelcaqueiñmu Chau Dios taiñ piuqueyenieteu.