«Кичинек тужымда акам кажы ла кӱн мени айткылап, согуп туратан. Кижиге барган кийнинде мени кайын энем базынган. Кайын энемге ле кайын адамга мен чек ле кул болгом. Кезикте бойыма кол салынып койорго туратам» (Маду a, Индия).

 «Ӱй улустыҥ базындырып турганы — бӱдӱн јердиҥ ӱстинде турган курч сурак болот» — деп, Всемирный организация здравоохранения айдат. Статистикала болзо, јердиҥ ӱстинде кажы ла ӱчинчи ӱй кижи качан бирде базындырган эмезе албадаткан болот.

 Андый неме слерле болгон болзо, эмди слер јаантайын коркып, чочып јӱрген болороор. Санаагарда, слерди ойто ло та кем де айткылаар, согор эмезе албадап салардаҥ айабас. Ӱй улус јаантайын јабыс кӧрдӱрип турганынаҥ улам, бастыра улус ӱй кижини неге де бодобой турган деп билдирип турган болор. Је Кудай ӱй улуска канайып кӧрӧт?

 Агару Бичикте айдылат: «[Кудай] эр кижини ле ӱй кижини јайаган» (Башталганы 1:27).

 Мыны канайып оҥдоор. Эр де кижини, ӱй де кижини Кудай јайаган. Оныҥ учун олордыҥ кемизин де јабыс кӧрӧргӧ јарабас. Анайда ок Кудай эр кижи ӱйин айткылап, согордоҥ болгой, бир јаман сӧс тӧ айтпазын, кажы ла алтамын ширтебезин деп јат, карын эр кижи ӱйин «бойын бойы чылап» сӱӱзин деп кӱӱнзейт (Эфестегилерге 5:33; Колоссыдагыларга 3:19). Мынаҥ Кудай ӱй кижини недеҥ де коркыбай јӱрзин деп кӱӱнзеп турганы јарт кӧрӱнип јат.

 «Кичинек тужымда тӧрӧӧндӧрим јанынаҥ меге канча катап сексуальный домогательство болгон. Меге 17 јаш болордо, начальнигим мен оныла конбозом, ол мени иштеҥ чыгарып ийер деп коркыткан. А јаанап келеримде, мени ӧбӧӧним, ада-энем, айылдаш јаткан улус базынган. Је оноҥ Јайаачы Иегова b Кудай ӱй улусты тооп турган деп билип алала, Кудай мени де сӱӱп ле баалап турган деп оҥдоп ийгем» (Мария, Аргентина).

 Агару Бичикте айдылат: «Кезикте, кожо чыкканынаҥ да јуук најы болот» (Укаа сӧстӧр 18:24).

 Мыны канайып оҥдоор. Чын најы слерге јаан болужын јетирер аргалу. Кӱӱнеер бар болзо, слерди оҥдойтон кижиге кӧксӧӧрдӧ санаалараарды куучындап беригер.

 «Алдында меге канча катап сексуальный домогательство болгон. Бу керегинде 20 јылдыҥ туркунына кемге де куучындабагам. Мынаҥ улам, тыҥ санааркап, кунугып, депрессиянаҥ шыралагам. Је кийнинде мени угарга белен болгон кижиге ӱзе куучындап береримде, меге андый јеҥил боло берген» (Элиф, Турция).

  Агару Бичикте айдылат: «Не де керегинде санааркабагар, [Кудайга] иженигер, нениҥ учун дезе Ол слерди кичееп кӧрӱп јӱрӱ» (1 Пётр 5:7).

 Мыны канайып оҥдоор. Кудай слердиҥ мӱргӱӱлдереерди чын ла угуп турган (Сарын 55:22; 65:2). Слер ого керектӱ болодоор. Ол слер керегинде сананып, слерди јӱрӱмге сӱӱнип, јакшы јӱрзин деп кӱӱнзейт. Оныҥ учун ол слерге бойоорды тоорго болужар.

 «Иегова Кудай керегинде кӧптӧдӧ билип аларымда, мениҥ кӧксимде шыркаларым јазылып баштаган. Эмди бастыра санааркаштарымды Кудайга куучындайдым. Ол мени сӱреен јакшы оҥдоп турган јуук најым болуп калган» (Ана, Белиз).

 Агару Бичикте айдылат: «Иегова... Тобырактаҥ бӱткен кижи олорды база коркытпазын деп, сен ӧскӱстерди ле базындырган улусты корулаарыҥ» (Сарын 10:17, 18).

 Мыны канайып оҥдоор. Удабас Кудай базынышты токтодып салар — ӱй улусты база кем де, качан да базынбас.

 «Агару Бичиктеҥ Иегова удабас ла ӱзе базынышты токтодып салар деп билип алала, јӱрегим токунаган. База кем де кызычактарды ла ӱй улусты базынбас! Кандый јеҥил, кандый јакшы!» (Роберта, Мексика).

 Агару Бичик кандый ижемји берип турган? Оныҥ сӧстӧрине нениҥ учун бӱдерге јараар? Агару Бичиктеги сӧстӧр слерге канайып болужар аргалу? Бу сурактардыҥ карууларын билип аларга, Иегованыҥ Керечилерине баштанарга јараар. Олорло туштажып ийигер эмезе jw.org сайтта онлайн-заявка артырып салыгар.

 Бу статьяныҥ кепке базылган бӱдӱмин чыгарып алыгар.