Билегер ырысту болзын деп кӧпти де эдип турган болзогор, кезикте слердиҥ амырыгарды айрыйтан кӱчтер болордоҥ айабас (Јарлыкчы 9:11). Мындый ӧйлӧрдӧ Кудай биске акту јӱрегинеҥ болужып јат. Тӧмӧнги берилген библиялык принциптер слерге ле јуук улузыгарга, јаан тӱбек те боло берзе, болужар.

АГАРУ БИЧИК НЕНИ АЙДАТ. «Не де керегинде санааркабагар, Ого иженигер, нениҥ учун дезе ол слерди кичееп кӧрӱп јӱрӱ» (Петрдыҥ 1-кы самаразы 5:7). Слерде болуп турган ченелтелерде Кудайдыҥ бурузы јок деп качан да ундыбагар (Иаковтыҥ самаразы 1:13). Ого јууктагар, слерге оноҥ артык кем де болужып болбос (Исаия 41:10). «Јӱрегеерде не барын Иеговага чыгара айдыныгар» (Сарын 62:8).

Анайда ок кӱнӱҥ сайын Агару Бичикти кычырып, шиҥдеп турзагар база токунал алараар. Слер Иегованы «кандый ла коот [токунал, ЈТ] береечи Кудай» деп билип аларыгар (2 Коринфтегилерге 1:3, 4; Римдегилерге 15:4). Ол «не ле сагыштаҥ бийик амырды» берер деп сӧзин берет (Филиппыдагыларга 4:6, 7, 13).

ТУЗАЛУ ЈӦПТӦР

• Токуналу ла эрӱ санаалу артарга, Иегованаҥ болуш сурагар

• Тузалангадый аргаларды ончозын шӱӱп кӧрӧлӧ, эҥ керектӱзин талдап алыгар

АГАРУ БИЧИК НЕНИ АЙДАТ. «Оҥдоп турган кижиниҥ јӱреги билгирди таап алат, ойгорлордыҥ кулагы билгирлер бедирейт» (Укаа сӧстӧр 18:15). Айалганы јакшы оҥдоп аларга, кӧптӧдӧ јетирӱлер јууп алыгар. Билегердиҥ кажы ла кижизине тургуза ӧйдӧ не керектӱ болгонын билип аларга, олорло куучындажыгар. Айтканын лаптап угугар (Укаа сӧстӧр 20:5).

Јуук кижи божогон болзо, нени эдер? Сезимдереерди кӧргӱзерге уйалбагар. Андый учуралда Иисустыҥ да «кӧзине јаш келген» (Иоанн 11:35; Јарлыкчы 3:4). Мындый ӧйдӧ јеткилинче уйуктап, јазап амыраар керек (Јарлыкчы 4:6). Бу аргалар тӱбектиҥ ӧйинде ийде-кӱч берер.

ТУЗАЛУ ЈӦПТӦР

• Биледе ачык-јарык куучындажып турганы, кенетийин болгон тӱбекти ӧдӧргӧ болужар. Андый болзо, билегердиҥ улузына слерге баштанарга јеҥил болор

• Мындый ок айалгада болгон улусла куучындажыгар

АГАРУ БИЧИК НЕНИ АЙДАТ. «Чын најы сӱӱжин јаантайын кӧргӱзет, ол кыйын-шыраныҥ ӧйине чыккан акадый» (Укаа сӧстӧр 17:17). Најылар јаантайын болужарга белен, је кезикте канайып болужарын билбей јат. Оныҥ учун кандый болуш керектӱ болуп турганын эбијоксынбай айдыгар (Укаа сӧстӧр 12:25). Анайда ок кӧгӱс јанынаҥ болуш аларга, Агару Бичикти јакшы билер улуска баштаныгар. Кудайдыҥ Сӧзине тайанып айткан олордыҥ сӧстӧри кыйалта јогынаҥ болужын јетирер (Иаковтыҥ самаразы 5:14).

Керектӱ болушты, слер Кудайга ла оныҥ сӧзине тыҥ бӱдӱп турган улусла јаантайын куучындажып турзагар алараар. Токунал аларга турган улуска болужып турзагар, бойыгар да токунал аларыгар. Олорго Иеговага ла оныҥ сӧзине бӱдӱп турганыгарды куучындап туругар. Бойыгардыҥ ийде-кӱчигерди кӱч айалгалу улуска болужарга тузаланыгар. Слерди сӱӱп ле баалап турган улустыҥ болужынаҥ мойнобогор (Укаа сӧстӧр 18:1; 1 Коринфтегилерге 15:58).

ТУЗАЛУ ЈӦПТӦР

• Јуук најыгарла куучындажыгар, оныҥ болужынаҥ мойнобогор

• Кандый болуш керектӱ болгонын айдарга эбијоксынбагар