Бала чыкканы кӧп эш-нӧкӧрлӧргӧ бир уунда сӱӱнчи ле санааркаш экелет. Олордыҥ ӧйи ле ийде-кӱчи эмди кӧп сабада баланы кичеерине барар деп, олор сананбаган да болор. Јаҥы айалгалардаҥ ла уйку јок тӱндердеҥ улам, эш-нӧкӧрлӧр ыраажып баштаардаҥ айабас. Балагарды кичеерге ле бой-бойыгарга јуук болорго, јаҥы айалгага ӱренер керек. Мындый ӧйдӧ библиялык јӧптӧр канайып болужар?

АГАРУ БИЧИК НЕНИ АЙДАТ. «Сӱӱш узак чыдажат, быйан эдет». Анайда ок сӱӱш «бойындыйын бедиребейт, ачынбайт» (1 Коринфтегилерге 13:4, 5). Јиит энениҥ санаазы јаҥыс ла балада боло берзе, ӧбӧӧни бойын кереги јок деп сананар болор. Оныҥ учун ӱйи ӧбӧӧнине де ајару эдер керек деп ундыбас учурлу. Ӱйи чыдамкай ла јалакай болзо, ӧбӧӧни баланы кичееринде јаан болуш јетирип турганын ла керектӱ болгонын билип турар.

«Слер де, эр улус, ӱйлереерге керсӱ болыгар» (Петрдыҥ 1-кы самаразы 3:7). Ӱйиниҥ ийде-кӱчи кӧп сабада баланы кичеерине барар деп, ӧбӧӧни оҥдоп турар учурлу. Јаҥы молјулардаҥ улам ӱйи тыҥ арып, керек дезе депрессияга да кирердеҥ айабас. Кезикте ол ӧбӧӧнине ачынардаҥ айабас, је ӧбӧӧнине бойын тудунар керек, не дезе «чугулданарга меҥдебес кижи кӱчтӱ кижинеҥ артык» деп айдылган сӧстӧр бар (Укаа сӧстӧр 16:32). Ӧткӱн болугар ла ӱйигерге болужып туругар (Укаа сӧстӧр 14:29).

ТУЗАЛУ ЈӦПТӦР

• Адаларга. Ӱйигерге баланы кичеерге, керек дезе тӱндер де сайын болужыгар. Кезик керектереерди туура јылдырып, олорло кожо кӧп ӧй ӧткӱрерге албаданыгар

• Энелерге. Ӧбӧӧнигердиҥ баланы кичеерге болужарга турганын јектебегер. Оныҥ эткени слерге јарабай да турган болзо, бурулаардыҥ ордына канайып чын эдерин кӧргӱзип беригер

АГАРУ БИЧИК НЕНИ АЙДАТ. Олор «бир эт-кан боло берет» (Башталганы 2:24). Слердиҥ билегерге база бир кижи кожулган да болзо, эш-нӧкӧригерле «бир эт-кан» болгоноорды ундыбагар. Бойыгардыҥ колбулараарды тыҥыдарга, бастыра аргаларды тузаланыгар.

Ӱйлер, ӧбӧӧндӧрӧӧрдиҥ болушканы ла јӧмӧшкӧни учун быйанзак болугар. Слердиҥ быйанду сӧстӧрӧӧр олорго «эмдеп» тургандый билдирер (Укаа сӧстӧр 12:18). Ӧбӧӧндӧр, ӱйлеригерди сӱӱп ле баалап турганаарды кӧргӱзип туругар. Олорды билени кичееп турганы учун мактагар (Укаа сӧстӧр 31:10, 28).

«Кем де бойына туза бедиребезин, је ӧскӧ кижиге бедирезин» (1 Коринфтегилерге 10:24). Эш-нӧкӧрӧӧрдиҥ керексиништерин бир де ундыбай туругар. Эки бойыгарга ӧй табып, бой-бойыгарды мактап, угуп туругар. Эш-нӧкӧрлӧр кожо уйуктаары јанынаҥ сурактарда јаҥыс ла бойыныҥ кӱӱнин сананбай, эш-нӧкӧриниҥ де кӱӱнин сананар учурлу. Агару Бичикте: «Бой-бойыгардаҥ кыйышпагар. Јаҥыс кезек ӧйгӧ, экӱ јӧптӧжӧлӧ... кожо болбозогор кем јок» — деп айдылат (1 Коринфтегилерге 7:3—5). Оныҥ учун бу суракты ачыгынча куучындажып туругар. Анайып, айалганы оҥдоп, чыдамкай болуп турзагар, колбулараар тыҥып турар.

ТУЗАЛУ ЈӦПТӦР

• Эки бойыгарга ӧй табып турары јаан учурлу деп ундыбагар

• Кыскарта самара бичиирин, СМС аткарарын эмезе бир кичинек сый эдип турарын ундыбай турзагар, эш-нӧкӧригер слердиҥ сӱӱжигерди сезип турар

АГАРУ БИЧИК НЕНИ АЙДАТ. «Кичӱдеҥ ала Агару Бичиктерди билериҥ, олор сени ойгор эдип, Христос Иисуска бӱткениҥ ажыра аргадаш берер аргалу» (2 Тимофейге 3:15). Балагарды канайып ӱредерин ле таскадарын шӱӱжип алыгар. Јаш баланыҥ ӱренетен аргазы сӱрекей кайкамчылу. Ол энедеҥ чыккалак та тушта ӱренип јат. Темдектезе, бала ичте тужында ада-энезиниҥ ӱнин танып турарына ла сезимдерин аайлап турарына ӱренет. Оныҥ учун балага чыкканынаҥ ла ала кычырып туругар. Кычырган сӧстӧрӧӧрди бала оҥдобой до турган болзо, јаанап келзе, кычырышты сӱӱп баштаар.

Балага Кудай керегинде јаш ла тужынаҥ ала куучындаарга јараар. Ол Иеговага мӱргӱп турганаарды угуп турзын (Јаҥды такыганы 11:19). Балагарла ойноп турган ӧйдӧ Кудай нени јайаганын куучындап туругар (Сарын 78:3, 4). Бала чыдаган сайын, Иегованы сӱӱп турганаарды кӧрӱп, Кудайды база сӱӱп баштаар.

ТУЗАЛУ ЈӦПТӦР

• Баланы чыдадарга, Кудайдаҥ ойгор сурагар

• Баланы јаштаҥ ала ӱредип турарга, сӧстӧрди ле Кудай керегинде тӧс ӱредӱлерди такып-такып айдып туругар