Калганчы кӱндерде јерде тыҥ эпидемиялар (ол тоодо пандемиялар) болор деп Агару Бичикте озолондыра айдылып калган (Луки 21:11). Је эпидемиялар Кудайдаҥ эмес, ол олор ажыра улусты кату каруузына тургуспай јат. Карын Кудай Каандыгы ажыра ончо оору-јоболды удабас јоголтып салар, ол тоодо эпидемияларды да.

•  Агару Бичикте эпидемиялар болор деп айдылган ба?

•  Кудай улусты оору-јоболло кату каруузына тургускан ба?

•  Бӱгӱнги эпидемиялар Кудайдаҥ ба?

•  Эпидемиялар качан бирде токтоор бо?

•  Оорулар ла эпидемиялар керегинде библиялык ӱлгерлер

 Агару Бичикте чике кандый эпидемиялар болор деп айдылбаган, темдектезе, COVID-19, СПИД эмезе испанка. Је ондо јаан оорулар, эмезе эпидемиялар болор деп јарт айдылып калган (Лука 21:11; Ачылта 6:8). Бу эпидемиялар бис Агару Бичикте айдылган «калганчы кӱндердиҥ» ле «чак тӱгенердиҥ» ӧйинде јададыс деп кӧргӱзет (2 Тимофею 3:1; Матфея 24:3).

 Агару Бичикте Кудай улусты ооруларла кату каруузына тургускан деп, тоолу учуралдар бичилген. Темдектезе, ол кезик улусты оныҥ јаҥына удура барганы учун проказала ооруткан (Тоолор 12:1—16; 2 Каандар 5:20—27; 2 Летопись 26:16—21). Је бу јӱк тоолу ла катап болгон учуралдар. А эпидемиялар дезе, бастыра јердиҥ ӱстине тыҥ таркап калат, оноҥ јаман керек этпеген де улус ооруга табартат.

 Јок. Кезик улус Кудай оору-јоболло эмезе эпидемияларла улусты кату каруузына тургузат деп сананат. Је бу јастыра санаа деп, Агару Бичиктеҥ эки шылтак кӧрӱп ийектер.

 Баштапкызы, Кудайдыҥ озогы да чындык улузы ооруган, бӱгӱнги де ишчилери ооруп јат. Темдектезе, Тимофей деп Кудайдыҥ чындык ишчизи «улам сайын оорып тур[атан]» (1 Тимофейге 5:23). Је ол Кудайды ачындырган деп Агару Бичикте кайда да айдылбаган. Кудайдыҥ бӱгӱнги де ишчилери ооруп калардаҥ айабас. Је олордыҥ оорузы Кудайдаҥ эмес — кижи келишпес ӧйдӧ лӧ учуралда болуп калган (Экклезиаст 9:11).

 Экинчи шылтак — Агару Бичикле болзо, улусты кату каруузына тургузар ӧй јеткелек. Эмди бис «аргаданыштыҥ кӱнинде» јададыс — бу ӧйдӧ Кудай кажы ла кижиге ого јууктап, аргаданып алар арга берет (2 Коринфтегилерге 6:2). Оныҥ учун Кудай сӱнчилӱ јар ончо јерге јарлалзын деп, бойыныҥ јарчыларын ийет (Матфей 24:14).

 Эйе. Агару Бичикте айдылганыла удабас кем де оорубас. Јерле Кудай башкарар, ол кажы ла кижиге бек су-кадык берер (Исаия 33:24; 35:5, 6). База кем де оору-јоболдоҥ шыралабас; Кудай керек дезе ӧлӱмди де јоголтып салар (Ачылта 21:4). А божогон улусты ол тирилтер. Олор мында, јерде, сӱрекей јараш райда јӱрӱп, бек су-кадыкту болор (Сарын 37:29; Апостолдордыҥ ижи 24:15).

 Ачылта 6:8: «Је бат, мен куба атты кӧрӱп ийгем. Атка мингенниҥ ады-јолы Ӧлӱм болгон. Оныҥ кийнинеҥ Таамы барып јаткан. Ого ...оору-јоболло ...ӧлтӱрер јаҥ берилген».

 Јартамал. Тӧрт атту чаап бараткандар керегинде Апокалипсистиҥ судурында бӱгӱнги ӧйдӧ эпидемиялар болор деп айдылат.