YI 35

Mɛni Ma Pee Konɛ Ma Nyɛ Nɛ Ma Pee Mawu Huɛ?

Haomi ko nɛ ba Jeremy nɔ ɔ ha nɛ e yɔse kaa e he hia nɛ huɛ bɔmi nɛ hi e kɛ Mawu a kpɛti. E de ke, “Benɛ i ye jeha 12 ɔ, ye papaa je wa weku ɔ he. Gbɔkuɛ ko benɛ i yaa hwɔ si ɔ, i sɔle kɛ ha Yehowa, nɛ i kpa lɛ pɛɛ konɛ e ha nɛ ye papaa nɛ kpale kɛ ba.”

Jeremy hao, enɛ ɔ he ɔ, e bɔni Baiblo ɔ kanemi. Benɛ e kane La 10:14 ɔ, e ta e tsui he wawɛɛ. Lejɛ ɔ de ke: ‘Nɔ nɛ e fĩ lɛ ɔ, o nɔ lɛ e ngɔɔ e hɛ kɛ fɔɔ. Mo ji awusahi a he piɛɛlɔ.’ Jeremy de ke: “I nu he kaa nɔ́ nɛ Yehowa kɛ mi ngɛ munyu tue, nɛ e ngɛ mi dee ke lɛ ji ye yemi kɛ bualɔ kɛ ye Tsɛ. Yehowa ji tsɛ nɛ se be nɛ nɔ ko ma nyɛ ma ná?”

KE SI fɔfɔɛ nɛ o ngɛ mi amlɔ nɛ ɔ ngɛ kaa Jeremy nɔ ɔ, aloo e be jã po ɔ, Baiblo ɔ tsɔɔ kaa Yehowa suɔ nɛ o pee e huɛ. Ngɛ anɔkuale mi ɔ, Baiblo ɔ de ke: “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yakobo 4:8) Mo susu nɔ́ nɛ munyu nɛ ɔmɛ tsɔɔ he nɛ o hyɛ: E ngɛ mi kaa o be nyɛe maa na Yehowa kɛ o hɛ ngmɛ, nɛ jehanɛ se hu o kɛ lɛ sɔɛ ngɛ blɔ ko blɔ ko nɔ mohu lɛɛ, se kɛ̃ ɔ, e ngɛ mo nine fɔe kaa o kɛ lɛ nɛ pee huɛ!

Se e ma bi nɛ o bɔ mɔde wawɛɛ konɛ o nyɛ nɛ o kɛ Mawu nɛ pee huɛ. Kaa nɔ hyɛmi nɔ́ ɔ: O le kaa ke o du tso ko ngɛ o we ɔ mi ɔ, tso ɔ nitsɛ be nyɛe maa wa ngɛ e dɛ he. Bɔ nɛ pee nɛ tso ɔ nɛ ko gbo ɔ, e ma bi nɛ o pue nɔ nyu be fɛɛ be konɛ e nyɛ nɛ e wa. Jã pɛpɛɛpɛ nɛ e ji ngɛ huɛ bɔmi nɛ maa hi waa kɛ Mawu wa kpɛti ɔ blɔ fa mi. Mɛni o maa pee konɛ nyɛ huɛ bɔmi ɔ mi nɛ wa?

Se Nami Nɛ Ngɛ Baiblo ɔ Kasemi He

Ke o kɛ nɔ ko pee huɛ ɔ, nyɛ sɛɛɔ ní, nɛ nyɛ buɔ nyɛ sibi tue. Jã nɔuu nɛ e sa nɛ e ya nɔ ngɛ o kɛ Mawu nyɛ huɛ bɔmi ɔ mi. Ke wa kane ɔ Baiblo ɔ, nɛ wa kaseɔ ɔ, e tsɔɔ kaa wa suɔ nɛ waa bu níhi nɛ Mawu suɔ nɛ e ma de wɔ ɔ tue.​—La 1:2, 3.

Se eko ɔ, o bua jɔɛ ní kasemi he tsɔ. Ngɛ nihewi kɛ yihewi komɛ a blɔ fa mi ɔ, a suɔ kaa a maa hyɛ TV, a ma je a hɛ ja, aloo a kɛ a huɛmɛ maa je kpo mohu pe nɛ a maa kase ní. Se ke o suɔ kaa o kɛ Mawu maa bɔ huɛ ɔ, blɔ kpa ko be nɛ o maa gu nɔ kɛ pee jã, kaa ja o bu lɛ tue kɛ gu e Munyu ɔ nɛ o maa kase ɔ nɔ.

Se ko ha nɛ lɔ ɔ nɛ wo o he gbeye. E sɛ nɛ Baiblo ɔ kasemi nɛ pee tlomi. Ke o susu kaa o bua jɔɛ ní kasemi he po ɔ, o bua ma nyɛ maa jɔ Baiblo ɔ kasemi he. Kekleekle nɔ́ nɛ e sa nɛ o pee ji kaa o maa to be kɛ ha Baiblo ɔ kasemi. Yiheyo ko nɛ a tsɛɛ lɛ ke Lais ɔ de ke, “I to be kɛ ha Baiblo ɔ kanemi. Daa mɔtu ke i te si ɔ, i kaneɔ Baiblo ɔ yi kake.” Yiheyo ko nɛ a tsɛɛ lɛ Maria nɛ e ye jeha 15 ɔ hu to blɔ nya ekpa. E de ke, “I kaneɔ Baiblo ɔ fã ko daa gbɔkuɛ loko i hwɔɔ si.”

Hyɛ  daka nɛ ngɛ ba fa 292 ɔ, konɛ e ye bua mo nɛ mo nitsɛ o je Baiblo ɔ kasemi sisi ngɛ o dɛ he. Lɔ ɔ se ɔ, moo ngma be nɛ o ma nyɛ maa ngɔ maa pee hɛngmɛfia 30 pɛ kɛ kase Mawu Munyu ɔ ngɛ hiɛ ɔ.

․․․․․

Blɔ nya nɛ o maa to ɔ ji sisije nɔ́. Se ke o je Baiblo ɔ kanemi sisi ɔ, eko ɔ, o ma ba yɔse kaa pi be fɛɛ be nɛ e kanemi ngɛ gbɔjɔɔ. Eko ɔ, o kɛ Jezreel nɛ e ye jeha 11 ɔ ma ba kpa gbi ngɛ nɔ́ nɛ e de nɛ ɔ he. E de ke, “Baiblo ɔ fã komɛ a kanemi yeɔ, nɛ ke i ngɛ kanee hu ɔ, ye bua jɔɛ he tsɔ̃.” Ke jã nɛ o ngɛ he nue ɔ, ko ha nɛ lɔ ɔ nɛ jɔ̃ o kɔni mi. Mo kai kaa Baiblo ɔ nɛ o maa kase be fɛɛ be ɔ ji blɔ nɛ o maa gu nɔ kɛ bu Yehowa Mawu, nɛ ji o huɛ ɔ tue. Ke o bɔ o he mɔde, nɛ o ya nɔ nɛ o kase Baiblo ɔ, o bua maa jɔ e kasemi he, nɛ o ma ná he se wawɛɛ!

Sɔlemi He Hia

Sɔlemi ji blɔ nɛ wa guɔ nɔ nɛ waa kɛ Mawu tuɔ munyu. Sɔlemi ji nike ní nɛ se be! O kɛ Yehowa Mawu ma nyɛ maa tu munyu kɛ gu sɔlemi nɔ be fɛɛ be ngɛ ligbi ɔ mi. E pee klaalo be fɛɛ be kaa e maa bu mo tue. Pi kaa e pee klaalo kɛkɛ, se mohu ɔ, e suɔ nɛ e nu nɔ́ nɛ o ma de lɛ ɔ. Enɛ ɔ he je nɛ Baiblo ɔ woɔ mo he wami kaa: ‘Ngɛ nɔ́ fɛɛ nɔ́ mi ɔ, o gu sɔlemi kɛ pɛɛ kpami nɛ mi wa kɛ sina nɔ kɛ ha nɛ Mawu nɛ e le o ní bimi ɔmɛ.’​—Filipi Bi 4:6.

Kaa bɔ nɛ jamɛ ngmami ɔ tsɔɔ, níhi fuu ngɛ nɛ o ma nyɛ maa tu a he munyu kɛ tsɔɔ Yehowa. Ekomɛ ji nyagbahi kɛ níhi nɛ haa nɛ o peeɔ yeyeeye. O ma nyɛ maa na lɛ si ngɛ níhi nɛ e pee kɛ ha mo ɔmɛ hu a he. Kaa bɔ nɛ ke o huɛmɛ pee ní kpakpahi kɛ ha mo nɛ o naa mɛ si ɔ, jã kɛ̃ nɛ o ma nyɛ maa na Yehowa si ngɛ ní kpakpahi fuu nɛ e pee kɛ ha mo nɛ́ pã nɔ́ nɛ o huɛmɛ pee kɛ ha mo ɔ he.​—La 106:1.

Moo ngma ní komɛ nɛ Yehowa pee kɛ ha mo nɛ o bua jɔ he ɔ ngɛ hiɛ ɔ.

․․․․․

Atsinyɛ jemi ko be he kaa be komɛ ɔ, o maa pee yeyeeye nɛ o maa ye gbeye. La 55:22 ɔ de ke: ‘Ngɔɔ o haomi ɔmɛ kɛ ha Yehowa, nɛ e maa bu o he. Nɔ nɛ peeɔ nɔ́ nɛ da a, Mawu be blɔ ngmɛe kɔkɔɔkɔ nɛ he nyɛlɔ nɛ ye e nɔ kunimi.’

Moo ngma ní komɛ nɛ haa nɛ o haoɔ, nɛ o maa suɔ nɛ o sɔle ngɛ a he ɔ ngɛ hiɛ ɔ.

․․․․․

Mo Nitsɛ O Níhi A Si Kpami

Nɔ́ kpa ko hu ngɛ nɛ e sɛ nɛ o ma o hɛ ngɔ fɔ nɔ ngɛ o kɛ Mawu nyɛ huɛ bɔmi ɔ mi. La polɔ David ngma ke: ‘Nyɛɛ ka Yehowa nɛ nyɛɛ hyɛ, nɛ nyɛ maa na kaa e hi.’ (La 34:8) Benɛ David ngma La 34 ɔ, jamɛ a be ɔ, e kɛ si fɔfɔɛ ko nɛ ngɛ gbeye kpe kɛ we. Matsɛ Saul ngɛ hlae maa gbe David, enɛ ɔ he ɔ, e tu fo. E he ba hia nɛ e ya sa we ngɛ Filisti Bi nɛ a ji e he nyɛli ɔ a kpɛti. Amlɔ nɛ ɔ lɛɛ e ngɛ kaa nɔ́ nɛ a maa gbe David. Se e bua pee kaa nɔ́ nɛ e nu godo, nɛ a ngmɛɛ e he.​—1 Samuel 21:10-​15.

David susuu we kaa e nyɛ nɛ e je e he nyɛli ɔmɛ a dɛ ngɛ lɛ nitsɛ e nyɛmi nya. Mohu ɔ, e kɛ yi jemi ɔ ha Yehowa. E de ngɛ la nɛ wa tu he munyu kɛ sɛ hlami ɔ mi ke: ‘I fa kue ha Yehowa, nɛ e bu mi tue; e ha nɛ i jɔɔ gbeye yemi.’ (La 34:4) Níhi a si kpami nɛ ɔ nɛ David ná he je ɔ, e nyɛ nɛ e wo nihi he wami kaa: ‘Nyɛɛ ka Yehowa nɛ nyɛɛ hyɛ, nɛ nyɛ maa na kaa e hi.’ *

Anɛ o ma nyɛ ma kai níhi a si kpami ko nɛ o ná ngɛ o si himi mi, nɛ́ lɔ ɔ ha nɛ o ná nɔ mi mami kaa Yehowa susuɔ o he lo? Ke jã a, moo ngma ngɛ sisi blɔ he ɔ. Mo kadi: E he hia we kaa níhi a si kpami ɔ nɛ pee nɔ́ titli ko. Mo susu ní tsɔwitsɔwihi nɛ a ji jɔɔmihi, nɛ ekomɛ po o be mɛ bue kaa a he hia tsɔ ɔ a he.

․․․․․

Eko ɔ, o fɔli kɛ mo kase Baiblo ɔ. Ke jã a, lɛɛ e ji jɔɔmi agbo. Se kɛ̃ ɔ, e sa nɛ mo nitsɛ o bɔ mɔde nɛ o ha nɛ huɛ bɔmi nɛ hi o kɛ Mawu nyɛ kpɛti. Ke o pee we jã lolo ɔ, lɛɛ o ma nyɛ maa ngɔ ga womihi nɛ a kɛ ha ngɛ womi nɛ ɔ mi ɔ kɛ tsu ní konɛ o nyɛ nɛ o je jã peemi sisi. Yehowa maa jɔɔ o mɔde bɔmi ɔ nɔ. Baiblo ɔ de ke: “Nyɛɛ ya nɔ nɛ nyɛɛ hi bie, nɛ a ma ha nyɛ; nyɛɛ ya nɔ nɛ nyɛɛ hi hlae, nɛ nyɛ maa na.”​—Mateo 7:7.

[Sisi ningma]

NGMAMI NƐ A KƐ DA NƆ

“Nihi nɛ a le kaa a hia mumi mi ní ɔ ngɛ bua jɔmi.”​—Mateo 5:3.

GA WOMI

Ke o kaneɔ Baiblo ɔ yi etɛ kɛ ya si yi enuɔ daa ligbi ɔ, o kɛ jeha kake ma nyɛ maa kane Baiblo mluku ɔ tsuo.

ANƐ O LE LO . . . ?

Womi nɛ ɔ nɛ o ngɛ kanee, nɛ o kɛ ga womi nɛ je Baiblo ɔ mi nɛ a kɛ ha ngɛ mi ɔ ngɛ ní tsue ɔ tsɔɔ kaa Yehowa susuɔ o he.​—Yohane 6:44.

NÍHI NƐ I TO KAA MA PEE!

Bɔ nɛ pee nɛ ma ná Baiblo ɔ kasemi he se ɔ, ma ․․․․․

Bɔ nɛ pee nɛ ma nyɛ ma sɔle daa a, ma ․․․․․

Nɔ́ nɛ i suɔ nɛ ma bi ye fɔli ngɛ sane nɛ ɔ he ji ․․․․․

KƐ O SUSU KƐƐ?

● Mɛni o maa pee konɛ Baiblo ɔ nɛ o maa kane ngɛ o dɛ he ɔ nɛ pee bua jɔmi?

● Mɛni he je nɛ Yehowa suɔ kaa e maa bu nimli nɛ a yi mluku ɔ a sɔlemi tue ɔ?

● Mɛni o maa pee konɛ o sɔlemi nɛ nu tso?

[Munyu nɛ a ma nɔ mi]

“Benɛ i wɛ ɔ, ke i ngɛ sɔle ɔ, i tĩɔ munyu kake too ɔ mi si abɔ. Se amlɔ nɛ ɔ lɛɛ i bɔɔ mɔde kaa ma sɔle ngɛ ní kpakpahi kɛ ní yayahi tsuo nɛ ya nɔ ngɛ ligbi ɔ mi ɔ he. Akɛnɛ e slo níhi nɛ yaa nɔ ngɛ ligbi fɛɛ ligbi mi he je ɔ, jã nɛ́ i peeɔ ɔ yeɔ bua mi nɛ i tí munyu kake too ɔ mi”​—Eve

[Daka/​Foni]

 Moo Kane Baiblo ɔ Saminya

1. Moo hla Baiblo mi sane ko nɛ o suɔ kaa o maa kane. Moo sɔle kɛ bi nile konɛ o nu nɔ́ nɛ o ma kanemi ɔ sisi.

2. Moo kane lɛ saminya. Mo na tsui kɛ kane. Poo nɔ́ nɛ o ngɛ kanee ɔ he foni. Bɔɔ mɔde kaa o maa na nɔ́ nɛ ngɛ nɔ yae ɔ, nɛ o nu nɔ́ nɛ ni ɔmɛ ngɛ dee ɔ. Moo sa o nya niye ní ɔ eko, nɛ o nu kɔɔhiɔ ɔ mi he via. Moo bɔ mɔde nɛ o po nɔ́ nɛ o ngɛ kanee ɔ he foni ngɛ o juɛmi mi!

3. Mo susu nɔ́ nɛ o kane ɔ he. Mo bi o he sanehi nɛ nyɛɛ se nɛ ɔmɛ:

● Mɛni he je nɛ Yehowa ha nɛ a ngma sane nɛ ɔ ngɛ e Munyu ɔ mi ɔ?

● Mɛnɔmɛ e sa nɛ ma kase a nɔ hyɛmi nɔ́ ɔ, nɛ mɛnɔmɛ e sɛ nɛ ma kase a nɔ hyɛmi nɔ́ ɔ?

● Mɛni ma nyɛ ma kase ngɛ sane nɛ ɔ mi?

● Mɛni lɛ nɔ́ nɛ i kane nɛ ɔ tsɔɔ mi ngɛ Yehowa, kɛ bɔ nɛ e peeɔ e ní ha a he?

4. Moo sɔle kpiti kɛ ha Yehowa. Mo de lɛ nɔ́ nɛ o kase ngɛ Baiblo ɔ mi, kɛ bɔ nɛ o to kaa o kɛ ma tsu ní ngɛ o si himi mi ha. Moo na Yehowa si daa ngɛ e Munyu, nɛ ji Ngmami Klɔuklɔu ɔ nɛ e kɛ ha mo ɔ he!

[Foni]

“O munyu ɔ ji kane nɛ i kɛ hyɛɔ ye nane nya; o munyu ɔ ji la nɛ haa ye blɔ mi tɛ̃ɔ.”​—La 119:105.

[Daka/​Foni]

Moo Pee Níhi Nɛ A He Hia a Kekle

Anɛ o nuɔ he kaa o be deka nɛ o kɛ maa sɔle, aloo nɛ o kɛ maa kase Baiblo ɔ lo? Eko ɔ, bɔ nɛ o to o níhi a he blɔ nya ha a lɛ ha nɛ o nuɔ he jã.

Moo ka nɔ́ nɛ ɔ nɛ o hyɛ: Wo goga, nɛ o ngɔ tɛhi nɛ a kle saii kɛ wo mi. Lɔ ɔ se ɔ, ngɔɔ zia kɛ pue tɛ ɔ nɔ ngɛ goga a mi konɛ goga a nɛ hyi. Amlɔ nɛ ɔ lɛɛ, tɛ ɔ kɛ zu ɔ hyi o goga a.

Jehanɛ ɔ, plɛ tɛ ɔmɛ kɛ zia a ngɛ goga a mi ɔ kɛ pue si. Se amlɔ nɛ ɔ lɛɛ moo ngɔ zia a kɛ wo goga a mi kekle, nɛ o ngɔ tɛ ɔmɛ kɛ pue nɔ. O ma yɔse kaa tɛ ɔmɛ tsuo be nyɛe maa sɛ goga a mi hu. Nɔ́ he je nɛ e ba lɛ jã ji kaa o ngɔ zia a kɛ wo goga a mi kekle.

Mɛni wa kaseɔ ngɛ nɔ́ nɛ ɔ mi? Baiblo ɔ de ke: “Nyɛɛ le níhi nɛ a he hia wawɛɛ ɔ.” (Filipi Bi 1:10) Ke o ngɔ ní nyafinyafihi aloo níhi nɛ a he hia we tsɔ, kaa he ja jemi kɛ ye kekle blɔ he ngɛ o si himi mi ɔ, o be be fuu náe kɛ pee níhi nɛ a he hia wawɛɛ, nɛ ji níhi nɛ kɔɔ Yehowa jami he ɔ. Se ke o ngɔ Baiblo ɔ ga womi nɛ ngɛ Filipi Bi 1:10 kɛ tsu ní ɔ, o ma ná be kɛ sɔmɔ Mawu, nɛ o ma ná be kɛ je o hɛ ja hulɔ. E daa si ngɛ nɔ́ nɛ o kɛ maa wo o goga a mi kekle ɔ nɔ!

[Foni]

Kaa bɔ nɛ ja wa pue tso ko nɔ nyu loko e maa wa a, jã kɛ̃ nɛ e sa nɛ waa pee níhi nɛ ma ha nɛ huɛ bɔmi nɛ ngɛ waa kɛ Mawu wa kpɛti ɔ mi maa wa