Anɛ Mawu Ngɛ He Fɛɛ He Lo?
Nɔ́ nɛ Baiblo ɔ de
Mawu naa nɔ́ fɛɛ nɔ́ nɛ ngɛ nɔ yae ngɛ he fɛɛ he. (Abɛ 15:3; Hebri Bi 4:13) Se Baiblo ɔ tsɔɔ we kaa Mawu ngɛ he fɛɛ he, aloo e ngɛ nɔ́ fɛɛ nɔ́ mi. Mohu ɔ, Baiblo ɔ tsɔɔ kaa e ji nɔ ko nɛ e ngɛ nitsɛnitsɛ, nɛ e ngɛ si himi he pɔtɛɛ ko.
Bɔ nɛ Mawu ngɛ ha: Mawu ji mumi. (Yohane 4:24) Adesahi be nyɛe maa na lɛ kɛ a hɛ ngmɛ. (Yohane 1:18) Ninahi nɛ kɔɔ Mawu he nɛ a ngma ngɛ Baiblo ɔ mi ɔ tsɔɔ kaa e ngɛ si himi he pɔtɛɛ ko. A tsɔɔ we kaa e ngɛ he fɛɛ he ko.—Yesaya 6:1, 2; Kpo Jemi 4:2, 3, 8.
He nɛ Mawu ngɛ: Mawu hi he ji hiɔwe. Lejɛ ɔ ngɛ slɔɔto ngɛ je nɛ wa ngɛ mi nɛ ɔ he. Baiblo ɔ de kaa Mawu ‘hi he ngɛ hiɔwe.’ (1 Matsɛmɛ 8:30) Baiblo ɔ bɔ amaniɛ kaa be ko ɔ, mumi mi adebɔ ní ɔmɛ ‘ba bua a he nya ngɛ Yehowa * hɛ mi.’ Munyu nɛ ɔ tsɔɔ kaa Mawu ngɛ he ko pɔtɛɛ.—Hiob 1:6.
Ke Mawu be he fɛɛ he ko ɔ, lɛɛ anɛ e ma nyɛ ma susu wa he kaa ni kakaakahi lo?
Ee. Mawu susuɔ wa kpɛti nɔ fɛɛ nɔ he wawɛɛ nitsɛ. E ngɛ mi kaa e ngɛ hiɔwe mohu lɛɛ, se e toɔ nihi nɛ a ngɛ zugba a nɔ nɛ a suɔ kaa a maa pee e suɔmi nya ní ɔ a he hɛ, nɛ e yeɔ bua mɛ. (1 Matsɛmɛ 8:39; 2 Kronika 16:9) Moo hyɛ ní komɛ nɛ Yehowa peeɔ kɛ tsɔɔ kaa e susuɔ e sɔmɔli nɛ a yeɔ lɛ anɔkuale ɔ a he:
Ke o ngɛ sɔlee: Ke o ngɛ sɔlee ɔ, Yehowa nuɔ nɔ́ nɛ o ngɛ dee ɔ.—2 Kronika 18:31.
Ke o ngɛ haoe: ‘Nihi nɛ a kɔni mi jɔ̃, kɛ nihi nɛ a be hɛ nɔ kami ɔ, Yehowa hii a kasa nya, konɛ e wo mɛ he wami.’—La 34:18.
Ke o hia blɔ tsɔɔmi: Yehowa ‘maa tsɔɔ mo blɔ nɛ o nyɛɛ nɔ, nɛ e maa tsɔɔ mo ní kɛ gu e Munyu nɛ ji Baiblo ɔ nɔ.—La 32:8.
Susumi nɛ dɛ nɛ nihi hɛɛ kɛ kɔ he nɛ Mawu ngɛ ɔ he
Susumi nɛ dɛ: Mawu ngɛ adebɔ níhi tsuo a mi.
Anɔkuale: Mawu hi he be zugba a nɔ he ko, loo je ɔ mi he ko nɛ waa kɛ wa hɛ ngmɛ ma nyɛ maa na. (1 Matsɛmɛ 8:27) E ji anɔkuale kaa dodoe ɔmɛ kɛ adebɔ ní kpa amɛ ngɛ Mawu “yi jee.” (La 19:1) Se Mawu hí e we adebɔ ní ɔmɛ a mi kaa bɔ nɛ ní tɛnilɔ ko hu hí níhi nɛ e tɛni ɔmɛ a mi ɔ. Se kɛ̃ ɔ, nɔ́ ko nɛ a tɛni ɔ haa nɛ wa leɔ nɔ́ ko kɛ kɔ ní tɛnilɔ ɔ he. Jã nɔuu kɛ̃ nɛ níhi nɛ ngɛ je ɔ mi ɔ haa nɛ wa leɔ nɔ́ ko kɛ kɔ bɔlɔ ɔ su komɛ nɛ “a nɛ kɛ hɛ ngmɛ ɔ” he. Su nɛ ɔmɛ ekomɛ ji he wami, nile, kɛ suɔmi nɛ e ngɛ ɔ.—Roma Bi 1:20.
Susumi nɛ dɛ: E sa nɛ Mawu nɛ hi he fɛɛ he, konɛ e nyɛ nɛ e le nɔ́ fɛɛ nɔ́ nɛ ngɛ nɔ yae, nɛ e nyɛ nɛ e kudɔ nɔ́ fɛɛ nɔ́.
Anɔkuale: Mawu mumi klɔuklɔu ɔ ji e he wami nɛ e kɛ tsuɔ ní. Mawu ma nyɛ maa gu e mumi klɔuklɔu ɔ nɔ kɛ le nɔ́ fɛɛ nɔ́, nɛ e kɛ e mumi klɔuklɔu ɔ ma nyɛ ma tsu nɔ́ fɛɛ nɔ́ he ní be fɛɛ be, ngɛ he fɛɛ he, nɛ́ e he hia we kaa lɛ nitsɛ e hi lejɛ ɔ.—La 139:7.
Susumi nɛ dɛ: La 139:8 tsɔɔ kaa Mawu ngɛ he fɛɛ he ko. Lejɛ ɔ de ke: “Ke i kuɔ kɛ ya hiɔwe ɔ, ne mo ngɛ lejɛ ɔ; nɛ ke i ya hwɔ si ngɛ gbeje hu ne mo ngɛ lejɛ ɔ.”
Anɔkuale: Pi Mawu hi he he munyu nɛ ngmami nɛ ɔ ngɛ tue. Mohu ɔ, e ngɛ tsɔɔe kaa he ko he ko be nɛ́ wa ngɛ nɛ lejɛ ɔ kɛ tsɔ ha Mawu nɛ e be nyɛe maa ye bua wɔ.
^ Baiblo ɔ tsɔɔ kaa Mawu biɛ ji Yehowa.
Eko ɔ, O Bua Maa Jɔ Enɛ ɔ Hu He
BAIBLO TSƆƆMIHI NƐ A HE HIA
Anɛ Mawu Ngɛ Nitsɛnitsɛ Lo?
Hla níhi nɛ ma ha nɛ o na kaa sisi numi ngɛ he kaa o ma he Mawu ye ɔ.
BAIBLO MI SANE BIMIHI NƐ A HA HETO
Mɛni Ji Mumi Klɔuklɔu ɔ?
Ngɛ yi mi tomi kpakpa he je ɔ, Baiblo ɔ kale mumi klɔuklɔu ɔ kaa e ji Mawu “nine.”
WA HE SANEHI
Mo Bi Nɛ A Ba Slaa Mo
Nyɛ ma nyɛ ma susu Baiblo mi sane bimi ko he, aloo nyɛ ma nyɛ maa kase Yehowa Odasefohi a he ní.