Yaweh Nsi fà nsitshaʼ bandum boa bènnzwi. A ze be dùʼ ntswe. Ndùlala, mbwe benntùn, Adam bo Eva, lo ke ghù nebwe bônkeʼ boa bo tswe à kamànyam​—Nsi lo yà nabte ba angél bo tswe mve kamànyam. (Yob 38:4, 7) Là, Nsi naʼ loʼ mbwe mandum njab i ntùm taʼ mbwô paradis bo nke ntsiañ nkaʼ Edèn nà. (Netoʼde 2:15-17) Yaweh Nsi lo laʼde bo mbe bo kuʼni neghù yôg matmat num nsitshaʼ bo nzwit yub.​—Siañ Yobkwi 37:29; 115:16.

Netoʼde, ndaʼ nkaʼ Edèn naʼ mbe paradis. Mbwe mandum bo ze mènnzwi lo be boaʼ ghù nsitshaʼ fa dun bo nzwit yub. A naʼ be boaʼ be nèn mbwe, ntô njù sagkùa fa mbèn ngù a tùʼ paradis. (Netoʼde 1:28) Ju ke nsi mbiagde nsitshaʼa. A nsi be à be dùʼ ntswe benntùn nyiañtu matmat.​—Siañ Yobkwi 104:5.

Lôde la’de netshañ Numke Nsi naʼ nabte nsitshaʼ à?

Mba Adam bo Eva naʼ mbe ke juʼ tshu Nsi là, Yaweh naʼ taʼ yub ntùm nkaʼ Edèn. Paradis naʼ bi, sàm mèn ke bèn kuʼni nete i. Ñwaʼni Nsi tshob mbe Nsi fañ nsitshaʼ “ntùm mbu ngatshùagntù.”​—Yob 9:24.​—Siañ Netoʼde 3:23, 24.

Yaweh Nsi ghuaʼ nkwade zʼa naʼ ngù netoʼde num benntùn nà ké? Nga! A be à nganeta ntshùade. Be a ke vù. (Esaya 45:18) Mba a naʼ nkwade fe netoʼde là, a nsi bèn mfà yôg matmat benntùn nyiañtu ntùm nelàn miagde.​—Siañ Yobkwi 37:11, 34.

Nsi aʼ bèn ngù mbe tshaʼ be paradis à ngelañ Yésu Kristô be Mven Nufen Nsi là. Léʼ ntsho Armagédon, Yésu boa angél Nsi aʼ biagde ben tse bo kañ mvèn yub ntam Nsi yi là.  Ndo bwe là, Yésu maʼ Satan ndàtsha num nguʼ 1000. Ghafaʼ Nsi nsi yôg ngelañ ntsho Armagédon à nummbe Yésu aʼ tshagde, mbèn ntshètte yube. Bo nsi jù bin yôg matmat ntùm Paradis num nsitshaʼa.​—Siañ Apokalipse 20:1-3; 21:3, 4.

Nsi nsi biagde nukebwô num nsitshaʼ à zit ngelañ à? Yésu naʼ mfà taʼ “keki” zʼa laʼde mbe miagde njù ghepte là. Ba tshu kebwô tsʼa tshwèt ntôg ntùm njù sènni là tshwèt mbweʼde nebiag yôg, mbèn nke ndaʼde mbe be be à ntùm “miagde njù.”​—Siañ Matio 24:3, 7-14, 21, 22.

Ngelañ nguʼ 1000 ze Yésu nsi tô num nsitshaʼ là, a nsi biagde njoñ ngeʼ fa. (Esaya 9:6, 7; 11:9) Aʼ me be mven, mbèn mbʼa ngaleʼde Nsi ze ndùb num nelagde mfànnu benntùn bo kô Nsi là. Ndùlala, ntshùade njam Yésu, Nsi aʼ biagde ngokèt, ywèn, bo vùkob.​—Siañ Esaya 25:8; 33:24.

Benntùn tshen nà tse bo tshwèt njuʼ ntshu Nsi là, mbèn nsi tswe ntùm Paradis. (1 Yohané 2:17) Yésu naʼ tum ghaziʼde nu i bo nèn ndiag ghabétni, ntswide yub mba be bo kuʼni nebe ghafaʼ Nsi là. Sènni, Yaweh Nsi tshwèt nabte ntshuʼ ntshuʼ benntùn ndù bo ghù yôg ntùm Paradis num nsitshaʼa. (Sofoni 2:3) Ntùm Ndà Ntseʼde Nufen Ghakwénta Yaweh, benntùn num nziʼde nebe mbwô du, mbwô tà, mbèn nziʼde nebe mbwô bennzwi mba mbwô mà. Bônkeʼ boa tà mba mà num ntamde ngamde Nsi, mbèn ziʼde mba be bo jù bin nkùn mebwô là.​—Siañ Mika 4:1-4.