Nukebwô toʼde num nsitshaʼ à ngelañ ze Satan tshob mbwe tatte là. Satan naʼ be toʼde mbʼa taʼ angél nelàne, ndaʼndù “a lo ke tsin ntùm nenùne.” (Yohané 8:44) A naʼ ghù nzi mbe bo fà ghamde zʼa naʼ mbe boaʼ fà à ndaʼ Nsi tùʼ i là yi. Satan tatte mbwe mènnzwi Eva, mbèn fùdʼé mbe a juʼ à ntshu i ke bʼa ze Nsi. Adam tam njam Eva num nebe ke juʼ ntshu Nsi. Tatu Adam mbèn ndoʼ ngeʼ bo vùkob nseʼ yi.​—Siañ Netoʼde 3:1-6, 19.

Ngelañ Satan tatte Eva mbe kà a juʼ ntshu Nsi là, a naʼ ke netoʼde nekañ mvèn i ntam ze netô Nsi yi, yi (Nsi) zʼa nèn tù ntshùade là. Mbeʼ yàm benntùn nyiañtu tamde bo Satan ghuaʼ Nsi mba ngatô yub là. A ndùlala ze Satan tùʼ “mven yen njù li” là.​—Siañ Yohané 14:30; 1 Yohané 5:19, MN.

Njoñ mfaʼ Nsi fa be nelàn miagde. Benntùn, mba Angél Nsi naʼ mbom nà, naʼ kuʼni nejuʼ ntshu i ntùm nelàn miagde. (Nebwôgde 32:4, 5) Nsi lo bom ben mfà nkuʼni ben, netshoʼ ze be tu neghù ju zʼa bwô là ke zʼa bag là lo. Yen nebe ze be tu là, num mfà manze ben nelaʼde nkôni mfà num Nsi.​—Siañ Yakobo 1:13-15; 1 Yohané 5:3.

Num metsit ngelañ, Yaweh Nsi fañ mbe bo kañ mvèn ntam ze netô yi. Numke? Num nelaʼde mbe netô zʼa keʼ fe à yi là keʼ kuʼni neywimde benntùn nyiañtu. (Nzenu 7:29; 8:9) Nguʼnjù 6000 zʼa yà tôg là tshwèt ndaʼde mbe  ze netô benntùn nyiañtu keʼ kuʼni neghù mbe ntsho, nefètte lem, nuketsin bo ngokèt mi.​—Siañ Yérémia 10:23; Roma 9:17.

Bade bo ze netô benntùn nyiañtu be a mbe, ben tse bo bam ze netô Nsi là num jù bin. (Esaya 48:17, 18) Ndaʼndaʼ Yaweh Nsi nseʼ mbiagde njoñ ze netô benntùn nyiañtu fa. Ndaʼ ben tse bo tshoʼ ze netô Nsi là mbèn nsi tswe num nsitshaʼa.​—Esaya 11:9; Siañ Daniel 2:44.

Lôde la’de netshañ Numke Nsi fañ mbe ngeʼ be à?

Satan naʼ tshob mbe sàm mèn keʼ kuʼni neghamde Yaweh Nsi bo nkôni. O kô nelaʼde mbe a bʼa tatte ké? Ñ, o kuʼni! Ze nefènde Nsi be mfà manze njoñ ben fa nelaʼde a be ze be tshoʼ à ze netô Nsi ke ze benntùn nyiañtu là lo. Mat ben mbèn nke ndaʼde bag i be tshoʼ là.​—Siañ Yob 1:8-12; Tànkùt 27:11.

Be kuʼni netshoʼ Nsi mba Ngatô ben à ngelañ ze be tshwèt ndiag i, mbèn mfà ghamde yi à ndañdañ mba a be ntùm Ñwaʼni Nsi là. (Yohané 4:23) Negha ze netô Satan bʼa nekù nkùnkù bo ntsho ndañndañ mba Yésu naʼ ngù là.​—Siañ Yohané 17:14.

Ngùʼ Satan bʼa netènde benntùn bo ghù tshunu ghàne, mba tshu kebwô. Ngelañ be num ghuaʼ tshen tshu kebwô là là, tsemoʼ shun ben nke nzwi mbèn nke ntshoʼ nku ben kebàn. (1 Pétro 4:3, 4) Là be ghù netshoʼo. Bag bin aʼ tamde bo ben tse bo kô Nsi là ké? Bag bin aʼ ze ntshùʼ mi zʼa dun zenu bo nkôni là ké? Be ghù ndùlala, mba be nke ndaʼdʼà mbe Satan naʼ nke netatte ngelañ zʼa naʼ ntshob mbe be mènntùn ke ghù ze nekô Nsi ntùm ngùtni là.​—Siañ 1 Korintô 6:9, 10; 15:33.

Nkôni Nsi ghù mfà num benntùn nyiañtu là tshwèt mfà nywinde mbe nukebwô bo ngeʼ nsi mi. Ben tse bo laʼde mbe bo bam yen nà là nsi tswe num nsitshaʼ à matmat.​—Siañ Yohané 3:16.