AGASTI 2, 2022
ERUSSIA

Ngiyaziqhenya Ngokuba ‘Nengxenye Emlandweni Wenhlangano’

IDLALE

NgoJulayi 26, 2022, iNkantolo Yedolobha laseSnezhinskiy eSifundeni SaseChelyabinsk ilahle ngecala uMfoweth’ u-Ilya Olenin. Umshushisi ucele ukuba agwetshwe iminyaka eyisithupha nohhafu ebhadla ejele. Esikhundleni sokuba avalelwe ejele, inkantolo ithe akahlawule imali engango-R135 750.

Izikhathi Zezenzakalo

Ngo-Ephreli 17, 2017

I-FSB yaphazamisa ukugcinwa kweSikhumbuzo saminyaka yonke. U-Ilya wabekwa icala “lokushumayela kube kuvinjelwe,” kodwa icala lachithwa
NgoNovemba 30, 2020

Umuzi wakhe waseshwa
NgoSepthemba 8, 2021

Wabekwa icala ngokusemthethweni
Ngo-Okthoba 27, 2021

Umuzi wakhe waseshwa okwesibili. Wathathwa ukuze ayophenywa ngemibuzo, wenqatshelwa ukuvakashela amanye amazwe
NgoMeyi 23, 2022

Ukuthethwa kwecala kwaqala

Mayelana Naye

U-Ilya Olenin

Wazalwa: Ngo-1977 (EChelyabinsk, eSifundeni SaseChelyabinsk)

Umlando omfushane: Lapho esemusha, wayekuthanda ukudlala imidlalo. Umndeni wakhe waba sengozini enyantisayo ngo-1993, okwenza wahlala isikhathi eside esibhedlela. Ungunjiniyela wemikhumbi-mkhathi

Ngemva kwengozi, wazibuza ngenjongo yokuphila wabe eseqala ukufunda iBhayibheli. Waqala ukuxoxa noFakazi BakaJehova ngo-1998. Ukuhlakanipha akuthola eBhayibhelini kwamenza waqiniseka ngokuthi liwumthombo ongcono kakhulu esingathola kuwo isiqondiso ekuphileni. Wabhapathizwa ngo-2006

Washada noNatalya ngo-2015. Banezingane ezintathu

Okushiwo U-Ilya Olenin

Uzizwa kanjani ngalo lonke ushushiso oye wabhekana nalo?

Ngikubheka njengelungelo ukushushiswa. Manje nginengxenye emlandweni wenhlangano. Kodwa leli lungelo liza nomthwalo othile. Ngingasho ukuthi uJehova usuke enengxenye lapho kuqulwa icala futhi ungisebenzisile ukuze ngilwele igama lakhe. Ngenxa yalokho, lapho ngithandaza ngikusho ngokuqondile lokho engikucelayo futhi imithandazo yami isijulile.

Yimaphi amathuba okufakaza akhethekile owatholile phakathi nokuqulwa kwecala lakho?

Ngesikhathi umphenyi wecala engibuza imibuzo, ngangivame ukumxoxela ngezinkolelo zami zobuKristu. Wagcina esengibuza imibuzo emayelana neBhayibheli. Lapho sigcina ukuhlangana, ngathi kwakufanele aqale ukutadisha iBhayibheli ngoba ngangazi ukuthi cishe sasingeke siphinde sibonane. Ngamangala lapho ethi uzocabangisisa ngalokhu. Waze wangibuza ukuthi kufanele aqale ngokuthola impendulo yamuphi umbuzo!

Enye indaba emnandi, imayelana nommeli owayengimele enkantolo. Ngesikhathi ngivela okwesibili enkantolo, weza neBhayibheli elalinesembozo sesikhumba esinensimbi ngaphezulu, emaceleni linombala osagolide. Wangicela ukuba ngimtholele ivesi elinegama likaNkulunkulu. Phakathi nokuqulwa kwecala, ummeli wami waya kufakazi owayelethwe umshushisi wamcela ukuba afunde u-Eksodusi 15:3. Bobabili bafunda leli vesi ngokuzwakalayo. Lokhu kwenza ijaji nomshushisi babone ukuthi igama likaNkulunkulu liyatholakala eBhayibhelini.

Ave siziqhenya ngo-Ilya nabo bonke abafowethu nodadewethu, ngokwethembeka abaphila ngokuvumelana nencazelo yegama lethu, abanikeza ubufakazi ngoNkulunkulu wethu omkhulu, uJehova.—Isaya 43:10.

EZISANDA KUKHISHWA