Ingabe Izazi Ziyakholelwa Ukuthi Wake Waba Khona UJesu?
Izazi zinesisekelo esiqinile sokukholelwa ukuthi uJesu wake waba khona. Mayelana nalokho okwashiwo izazi zomlando zangekhulu lokuqala nelesibili leminyaka ngoJesu namaKristu okuqala, i-Encyclopædia Britannica, 2002 Edition, ithi: “Lokhu kulandisa okuhlukahlukene kubonisa ukuthi ezikhathini zasendulo ngisho nezitha zobuKristu zazingangabazi ukuthi uJesu wayekhona ngempela, okwaze kwaqala ukuphikwa ekupheleni kwekhulu le-18, phakathi nekhulu le-19 nasekuqaleni kwekhulu lama-20, futhi kungenazizathu ezanele.”
Ngo-2006 incwadi ethi Jesus and Archaeology yathi: “Asikho isazi namuhla esiphikayo ukuthi umJuda obizwa ngokuthi uJesu indodana kaJosefa wake waba khona; iningi livuma kugcwale umlomo ukuthi manje kuningi kakhulu esikwaziyo ngezenzo zakhe nezimfundiso zakhe eziyisisekelo.”
IBhayibheli libonisa ukuthi uJesu wayengumuntu ongokoqobo. Linikeza amagama okhokho bakhe nomkhaya wakubo. (Mathewu 1:1; 13:55) Linikeza namagama ababusi abadumile ababebusa ngesikhathi sakhe. (Luka 3:1, 2) Leyo mininingwane yenza abacwaningi baqinisekise ukunemba komlando weBhayibheli.