Testigos xtuny Jehová diti rioʼdo ló guerr por razón ni sieed lainy guet reʼ:

1.   Nacni mandary xtuny Dios. La Biblia goniʼ que buñ ni rasob ni ná Dios sonyibu espad ni napyibu «guip par guiquimbu gonyibu xchiinyibu» né ma diti sasuidyibu tzeeyibu ló guerr (Isaías 2:4).

2.   Nacni mandary xtuny Jesús. Pedro ni cuanal Jesús cuaʼbu galmandary reʼ: «Bidxiguet espad xtunylo xalagary, portín guirá ni racaʼ espad saity por espad» (Mateo 26:52). Né diitzreʼ, Jesús nayadit goniʼ que xpiimbu diti non tzee ló guerr.

    Cristo láaca gochbu a guirá xpiimbu que «layibu diti nacyibu de gudxliogoxreʼ». Por ngú, diti non tzoʼyibu lad partid (Juan 17:16). Láaca diti láani guicalóyibu soldad ni riee ló guerr o guicaayibu ló stipnés ni ná gac toibsi né soldad.

3.   Guirá ni racanal Cristo gandxiʼ saʼ. Jesús góoch a guirá xpiin: «Radudi lóoto toib mandamiento copy: gandxiʼto saʼto» (Juan 13:34, 35). Cristianos ni rasuidy xinésni nacyibu toibsi ló guidopynac Gudxlio né dipa saquiinyibu guip par guigaityibu saʼyibu (1 Juan 3:10-12).

4.   Guirá ni cuanal Jesús nírcu, diti goyeeyibu ló guerr. Toib libro rasetlaa que «guirá ni cuanal Jesús primerdiguieʼ diti goyeeyibu ló guerr né láaca diti gocyibu soldad», portín gontzayibu que clas de dxiin cú «diti radzakni né galnadxiʼ ni bisuidy Jesús né mandary ni bixelbu que buñ gandxiʼ xi enemig» (Encyclopedia of Religion and War). Né ló xilibro toib buñguieeu britanico Edward Gibbon ni laa Historia de la decadencia y caida del imperio romano, goniʼbu: «Góc naganni que guirá ni cuanal Cristo nadxinyibu ñacyibu soldad [...] portín goyoʼ stoib dxiin ni más bisac par layibu».

 Guirá testigos xtuny Jehová nacdo buñ ni rony dxiin né por ni toib ór ratzanlóni ló xpensarydo gonyxiroʼdo galnagan ni noʼ lainy gudx ro rabésdo. Lóodo rapdo respet buñchiin, portín rasobdo ni rony mandary la Biblia.

•   «Guirá buñ guisob ni ná buñchiin.» (Romanos 13:1.)

•   «Colquiix César cós ni nasapyto César, per Dios cós ni nasapyto Dios.» (Mateo 22:21.)

 Por ngú, ronydo guirá ni ranab leyes ni noʼ, raguiixdo impuestos né racnédo buñchiin par guiguaʼ buñ sacró lainy gudx ro rabésdo.