Testigos xtuny Jehová rasuidyibu buñ ni ná la Biblia par gacnéni layibu. La Biblia labúu gacné looy ló ndeʼ:

•   Guibanylo sacró.

•   Gaclo ximig Dios.

•   Guisuidylo ni ná Dios gony ló dzú ni sietra.

Ló página reʼ sarexa guirá galrranabdiitz reʼ:

•  ¿Ximod rasuidydo buñ?

•  ¿Raquiin quiixi par guisudi la?

•  ¿Balac tiemp guisudi?

•  ¿Pu niis labúu salóya?

•  ¿Nír labúu guibiʼya ximod rasuidyto buñ la?

•  Pal rasudi la Biblia né lóoto, ¿sony lafuersto naʼ gaca testigo xtuny Jehová la?

•  ¿Labúu guiquiina Biblia xtuni la?

•  ¿Labúu tzoʼ stipnés órni guisudi la?

•  Pal ma bisudi né testigos xtuny Jehová nírcu, ¿labúu guisudi stoib la?

•  ¿Noʼ toib lagary ro labúu guisudi tobi la?

 Toib testigo xtuny Jehová labúu guisuidy looy tema por tema par ganlo ni ná la Biblia. Né xcalrracné libro ni laa Bibany goxtiguie, dxoga dxoga labúu sasuidylo ni ná la Biblia né sanlo ximod labúu gacnéni looy. Pal nainy ganlo más bibiʼ video reʼ.

 Yaca. Ronydo mod góoch Jesús xpiin ñony: «Cuaʼto scásiʼ, colguidudy scásiʼ» (Mateo 10:8). Láaca, diti saguiixlo pal guinablo toib Biblia o pal guinablo publicación ni laa, Bibany goxtiguie.

 Librocu napni 60 lesiony. Labúu guisuidylo tiemp ni nainy looy. Noʼ buñ ni rioladx guisuidy toib lesiony por xomal né noʼ stipnés ni rasuidy más.

1.  1. Bistzaa formulario ni sieed ló internet. Nosi saquiindo datos xtunylo par guiyopy toib testigo xtuny Jehová looy.

2.  2. Buñ ni guisuidy looy sayopy looy. Sabexabu ximod guisuidyto la Biblia né xcalrracné librocu né sacapybu nitisi galrranabdiitz ni gonylo.

3.  3. Ma lóoto guiniʼto xi dzú guisuidyto. Labúu tzeebu lidxlo, guininébu looy por teléfono, por videollamada, correo o correo electrónico. Labúu guisuidyto tip ór, o pal nainy looy labúu gaclato más o diti tampa gaclato; ma looy guiniʼlo balac tiemp guisuidyto.

 Scú. Par labúu gacni scú la, bistzaa formulario ni sieed ló internet. Órni xomextralo guininé looy, góoch láabu que nosi nainy looy guisuidylo tipbueltsi par ganlo pal sioladxlo láani o yaca. Órcu sasuidyto follet ni laa, Bibany goxtiguie, follet reʼ nosi napni tzón lesiony.

 Yaca. Testigos xtuny Jehová rioladxyibu guisuidyibu buñ la Biblia, per diti rony lafuersyibu buñ gac de xireligionyibu. Layibu nosi rabexayibu xi ngú ni rasuidy la Biblia né ronyibu láani respet, nanyibu que ma tigaaga buñ guiniʼ xi láani gony crer (1 Pedro 3:15).

 Scú. Labúu guiquiinlo nitisi traducción xtuny la Biblia ni rioladxlo. Ná lóodo raquiindo Traducción del Nuevo Mundo portín diti ma bireʼ o ma bisaʼ loni né naguel rien buñ láani, per nando que buñ rioladx guiquiin Biblia ni ma biané.

 Scú. Labúu guiruʼlo xfamilo o ximiglo par gony compañer looy.

 Scú. Né dada sigory más sioladxlo láani nigoreʼ. Portín nigoreʼ rasuidydo buñ temas ni más rioladxyibu ganyibu. Libro reʼ racnéni buñ guiniʼ ni rony pensary né nigoreʼ napni xidal dibuj, retrat né videos.

 Scú. Ná xidal buñ más rien órni noʼ ni rasuidy layibu, stipnés más rioladx guisuidy toib. Lagary ni ná «Ni gacné looy guisuidylo la Biblia» noʼ tipnés herramientas ni labúu gacné looy né diti saguiixlo xitcal. Ndeʼ nac tipnésni:

•   Videos par guisuidyno la Biblia. Nacni video dop ni rabeʼ loguiaʼ xcalrrasuidy la Biblia.

•   Mod rabexa la Biblia tipnés galrranabdiitz. Nacni tipnés artículos ni rabexa tipnés galrranabdiitz ni racapy la Biblia.

•   Mod rarexa tipnés textos. Gon ximod rarexa tipnés textos ni más rimbuno.