Tidxó buñ ni nap xiroʼ Galnan nacyibu chop tzón cristianos ni rasanir lainy xcudx testigos xtuny Jehová ni noʼ ló guidopynac Gudxlio. Ronyibu chop dxiin:

•   Rabitzaayibu né ronytzaayibu información ni sieed ló la Biblia né ni rarecaa ló stipnés publicaciones, ló reunión né scuel ni rony testigos xtuny Jehová (Lucas 12:42).

•   Rasaniryibu ló dxiin ni rony testigos xtuny Jehová ni noʼ ló guidopynac Gudxlio. Ndeʼ radudy diitz rabiʼyibu ximod rac predicar né ximod rac gaxt guirá donaciones.

 Tidxó buñ ni nap xiroʼ Galnan rasuʼyibu mod buny «apóstoles né ancianos» ni goyoʼ lainy gudx Jerusalén ló siglo primero. Layibu goloʼyibu guicyibu gonyibu tipnés cós ni rasac ló laa congregación cristiana (Hechos 15:2). Ni noʼ lad Tidxó buñ ni nap xiroʼ Galnan diti layibu rony mandaryibu xcudx Jehová, xomodca diti buny tipnés buñguieeu ni bibany ló dzú ni see. Layibu guirá ór rayopyibu ló la Biblia ni labúu conés layibu né nanyibu que Jehová ma golú a Jesucristo par gac guic congregación (1 Corintios 11:3; Efesios 5:23).

 Tidxó buñ ni nap xiroʼ Galnan layibu ngú, Kenneth Cook xiin, Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane né Jeffrey Winder. Guiráyibu ronyibu dxiin ló central mundial xtunyno ni noʼ Warwick (Nueva York).

 Tidxó buñ ni nap xiroʼ Galnan ma goloʼyibu xhoop comités ni rabiʼ xidal dxiin ni ronyno. Tigaagayibu rony dxiin ló toib o más de toib comités.

•   Comité de Coordinadores. Rabiʼyibu ximod rony asuntos legales dxiin, né rayopyibu mod ximod gacnéyibu herman órni rioʼ desgrasy o órni diti noʼ permís par guiniʼ herman xtiitz Dios.

•   Comité de Personal. Rabiʼyibu ximod rony guirá betelitas dxiin, ndeʼ radudy diitz, guirá ni rony dxiin lainy guirá Sucursal de Testigos.

•   Comité de Publicación. Rabiʼyibu ximod rac imprimir né ximod raxelyibu publicaciones, láaca rabiʼyibu ximod riaʼ salones, oficinas de traducción né sucursales.

•   Comité de Servicio. Rabiʼyibu ximod rac predicar «diitz sacró xtuny Gobierno» (Mateo 24:14).

•   Comité de Enseñanza. Xchiinyibu láani guibiʼyibu xi guireʼ ló reunión, ló scuel né ló programas de audio né video.

•   Comité de Redacción. Ronytzaayibu ni guireʼ ló publicaciones né ni noʼ ló sitio de internet ni napno láaca rabiʼyibu guirá dxiin ni rac loguiaʼ traducción.

 Per diti nosi dxiinreʼ rony guirá comités reʼ, ni racné a Tidxó buñ ni nap xiroʼ Galnan radopyibu guirá xomal par guibiʼyibu ni caquiin xcudx Jehová. Ló guirá reunión reʼ, rabiʼtzayibu ni ná la Biblia né radudyibu lagary conés espíritu santo xtuny Dios layibu. Guirá ór ronyibu rutirigaʼlni layibu par tzoʼyibu de acuerdo né ni ma goloʼyibu guicyibu gonyibu (Hechos 15:25).

 Tigaaga comité ni noʼ lad Tidxó buñ ni nap xiroʼ Galnan napyibu xcalrracné tipnés cristianos ni nan rony dxiin né nap experiencia ló dxiin ni rony supervisar o ni rabiʼ comité ro cayacnéyibu (1 Corintios 4:2). Guirá ni racné reʼ radopyibu né comité ro cayonyibu dxiin. Ná diti layibu raniʼyibu xi ni gac, radudyibu tipnés sugerencias né raniʼyibu tipnés cós ni raquiin ganyibu ló ni cabiʼyibu, ronyibu ni ma goloʼ comité guic gony né rabiʼyibu ximod carecaani. Tidxó buñ ni nap xiroʼ Galnan labúu guinabyibu tipnés ni racné layibu tzáguenyibu Testigos ni rabés stoib lad o tzoʼyibu ló programas especiales xomod reunión anual o órni rac graduar herman de Scuel de Galaad.