Toib encuesta rasetlaa que 80 por ciento de mbioxhlas ni rabés Estados Unidos rony oración per nosi tigalaʼ de guirá mbioxhlas reʼ rony láani guirá dzú. Sigory tipnés ranabdiitzyibu ndeʼ: ¿Oración nacni nosi par guisaca sacró la?

•  ¿Xipa ngú oración?

•  ¿Racadiag Dios naʼ la?

•  ¿Xí láani labúu gaabi Jehová?

•  Ni raniʼ stipnés mbioxhlas

 Oración nacni órni raninéno Dios, Dios ni bisaʼ guirá cós. Buny pensary xi radudy diitz ndeʼ: diti noʼ ni toib buñ ni rigaʼl láabu, ná scú «diti noʼbu sit de cada toibno» (Hechos 17:27). La Biblia raiby lóono ndeʼ: «Colguibig ronoʼ Dios né láabu sabigbu ronoʼto» (Santiago 4:8).

 ¿Xí labúu gonylo par guibigaxlo Dios?

•   Oración. Nacni toib mod par guininélo Dios.

•   Órni rasuidylo la Biblia. Modcu «raniné» Dios looy.

 Órni raninélo láabu né órni roʼolo la Biblia, ngú sacné looy par gaclo ximigbu.

 «Órni raniné buñ Jehová, órni raninéno ni noʼ más Guiaʼ, nacni toib privilegio rodann ni nap guirá buñgudxlio» (Jeremy).

 «Órni raabi Jehová ximod rasaca, ngú ronyni que guibigaxa más láabu» (Miranda).

 Ná ronylo crer lóo Dios né ronylo oración, sigory rasac naganlo gonylo pensary que cacadiagbu looy. Per la Biblia ná que Jehová «racadiag oración» (Salmo 65:2). Raibybu looy guiniʼlo xi galrrasaʼ cacalólo. ¿Xigony? Portín Dios rioʼ galrrasaʼ por looy (1 Pedro 5:7).

 Buny pensary ló ndeʼ: ¿Raninélo ximiglo guirá ór la? Ngúca labúu gonylo né Dios. Goniné láabu guirá ór, né biquiin laabu, Jehová (Salmo 86:​5-7; 88:9). Scú láani, la Biblia raiby looy guininélo láabu guirá ór (1 Tesalonicenses 5:17).

 «Oración nacni órni raninéya Bixiosa ni noʼ guibá, ro raabi láabu guirá ni noʼ lainy xcalnabani» (Moises).

 «Raabi Jehová cós ni rasacgoluʼ, modca rooni láani né xinaʼya né ximigdxina» (Karen).

 La Biblia ná: «Ló nitisi cós colguinab lóo Dios né colguidudy guixquix láabu, colgaiby láabu ni caquiinto» (Filipenses 4:6).

 ¿Radudyni diitz que labúu gaibylo láabu galnagan ni cacalólo la? ¡Labúu! La Biblia raiby lóono gonyno láani: «Bisal xquiixlo laidy Jehová, né láabu sacnébu looy» (Salmo 55:22).

 Per diti nosi galnagan ni cacalólo gaibylo láabu. Toib mbioxhlas gonaʼ ni laa Chantelle ná: «Diti ñaca toib galán amig de Jehová, pal nosi naninéya láabu órni caquiinna galrracné. Né nábu: Xpensari ni más rasac ngú guidudyno guixquix láabu, scú láani noʼ xidal cós ni labúu guidudyno guixquix láabu».

 Buny pensary ló ndeʼ: ¿Por xi cós labúu guidudylo guixquix? Buny pensary ló tzón cós ni labúu guidudylo guixquix Jehová dzureʼ.

 «Labúu gacni toib cós mitien, xomod órni guidziguiaʼno toib guieʼyen, ndeʼ labúu guichiin lóono guidudyno guixquix Jehová» (Anita).

 «Buny pensary ló toib versículo de la Biblia ni rioladxgoluʼlo o ló toib cós ni bisaʼ Jehová ni radziguiaʼlo. Bidudy guixquix láabu por ngú» (Brian).