La Biblia rony animar lóono guidudyno ni napno né guidopy xcalnabanyno. Órni ronyno láani diti nosi racnéni buñ ni racaʼ, láaca racnéni lóono (Proverbios 11:25; Lucas 6:38). Jesús goniʼ: «Noʼ más galrrabaladx órni radudy buñ que órni racaʼ buñ» (Hechos 20:35).

•  ¿Pu ór non guidudyno?

•  ¿Pu ór diti non guidudyno?

•  Textos ni sieed ló la Biblia ni rasetlaa guidudyno ni napno

 Órni radudyno né guidopy xcalnabanyno racaʼno galnasác. La Biblia ná: «Cada toibto guidudy xomod ma goniʼ lainy xcalnabany gony láani, diti de mal gan ni lafuers, portín Dios nadxiʼ buñ ni rioʼ nakit órni radudy» (2 Corintios 9:7).

 Dios ranab lóono ni rony adorarno láabu guidudyno né guidopy xcalnabanyno (Santiago 1:27). Pal racnéno buñ ni caquiin láani, cayonyno dxiin toibsi né Dios, né láabu rasacbu que rioʼbu ló diʼin né lóono portín radudyno ni napno (Proverbios 19:17). La Biblia ná que Dios sadudy galnasác lóono (Lucas 14:12-​14).

 Órni diti ronyno láani né guidopy xcalnabanyno. Por ejemplo:

•   Par guidziguiaʼ stipnés buñ lóono (Mateo 6:2).

•   Par gonyno gan toib cós (Lucas 14:12-14).

•   Par siino mod guilaano (Salmo 49:6, 7).

 Órni rony apoyarno cós mal ni diti rioladx Dios. Por ejemplo, mal láani nadudyno bidxiich buñ par naguit buñ por bidxiich, par nasoch o par naquiin droga (1 Corintios 6:9, 10; 2 Corintios 7:1). Láaca mal láani pal nadudyno bidxiich toib buñ ni labúu gony dxiin, per diti ná gony dxiin (2 Tesalonicenses 3:10).

 Órni diti labúu ronyno dxiin ni radudy Dios lóono. La Biblia ná que buñ ni rasanir lainy xfamil non guidudybu ni caquiin xfamilbu (1 Timoteo 5:8). Diti láani ngú órni buñ diti nadudybu ni caquiin xfamilbu par guidudybu láani stipnés. Jesús goniʼ que mal ni buñ tipnés buñ ni diti goniiny ñan bixios ni ma nac buñgol portín goniʼyibu que guirá ni napyibu «nacni par Dios» (Marcos 7:9-13).