Galkié nacni nitisi cós ni ronyno, ni rasacno né ni ronyno pensary né ni diti radzak mod rony mandary Dios (1 Juan 3:4; 5:17). La Biblia ná que toib galkié láani ngú órni ronyno toib cós mal o órni diti ronyno láani xinésni nisló Dios (Santiago 4:17).

 Ló diitz ni cuá la Biblia nírcu, diitz galkié radudyni diitz órni toib buñ diti racaʼ toib flech ro náapabu, o diti rarebuʼ mod nábu. Por ejemplo, la Biblia raniʼ de tipnés soldad ni goyoʼ lainy gudx Israel ló dzú ni see ni biquiintzay honda, layibu bicaʼyibu guiee ro goniiny layibu né diti bichéyibu. Pal ñac traducir diitz reʼ xomodpa goniʼyibu láani, labúu nacaani: «diti bunyibu galkié» (Jueces 20:16). Por ngú, galkié láani ngú órni diti ronyno ni rony mandary Jehová lóono.

 Dios bisaʼ lóono, por ngú napbu derech gony mandarybu xi láani ngú ni gony buñgudxlio (Apocalipsis 4:11). Né lóono non gonycuentno nisló Dios ni ma bunyno (Romanos 14:12).

¿Labúu diti gony buñ galkié la?

 Yaca, portín la Biblia ná que «guirá buñ nap galkié né diti rigaʼlyibu gloria xtuny Dios» (Romanos 3:23; 1 Reyes 8:46; Eclesiastés 7:20; 1 Juan 1:8). ¿Xigony rac ndeʼ?

 Nírcu Adán né Eva diti gopyibu galkié, portín Dios bisaʼ layibu sin galkié, xomodpa nac Dios (Génesis 1:27). Per gopyibu galkié órni ma diti bisobyibu Dios (Génesis 3:5, 6, 17-19). Órni gopyibu xiinyibu bitudyibu galkié reʼ xiinyibu gocni suusi ñacni toib galguitz ni ratudy buñ xiin (Romanos 5:12). Xomod goniʼ rey David: «Né galkié goola» (Salmo 51:5).

¿Tipnés galkié nacni más nirodann que stipnés la?

 Scú. Por ejemplo, la Biblia rasetlaa que buñ ni bibany lainy gudx Sodoma «gocyibu nigolú mal», né «xcalkiéyibu nirodann gocni» (Génesis 13:13; 18:20). Guisuidyno tzón cós ni radudy diitz pal galkié nirodanni.

1.   Nirodann. La Biblia ná que galyoxh, buñ ni rien dioxh, galgobáan, galrrasoch, buñ ni rasobladx, buñ ni ragaity né galchiser nacni galkié rodann ni diti non gonyno (1 Corintios 6:9-11; Apocalipsis 21:8). La Biblia rabeʼ loguiaʼ galkié reʼ né stipnés galkié ni diti cayony buñ pensary gony láani, por ejemplo, guiniʼ buñ o gony cós ni labúu gonynaa stipnés (Proverbios 12:18; Efesios 4:31, 32). Per la Biblia rony animar lóono que diti gonyno pensary que ni cayonyno diti nacni toib galkié, portín ndeʼ labúu gony que gonyno stipnés galkié rodann (Mateo 5:27, 28).

2.   Xigony rony buñ láani. Tipnés galkié racni portín diti rimbu buñ ni rony mandary Dios (Hechos 17:30; 1 Timoteo 1:13). La Biblia diti rasetlaa que labúu gony buñ láani, per rabeʼ loguiaʼni galkié ni nompa rony buñ órni diti rasob buñ ni rony mandary Dios (Números 15:30, 31). La Biblia rasetlaa que buñ ni nompa rony toib galkié nap toib «galnabany mal» (Jeremías 16:12).

3.   Balac buelt rony buñ láani. La Biblia nayadit rabexa órni toib buñ rony toib galkié toibsi buelt né órni buñ rony galkié cuca xidal buelt (1 Juan 3:4-8). Dios rabeʼ tiplad guirá buñ ni ma goloʼ guic gony galkié ná maca nanbu xi láani ngú xinésni (Hebreos 10:26, 27).

 Buñ ni ma buny galkié rodann sigory rasioʼobni xcalnabanybu por guirá ni ma bunybu. Por ejemplo, rey David bicaʼ: «Portín guirási ór cayoni pensary ló xcalkiéya; nacni toib guix nanaʼ, nigolú nanaʼni par naʼ» (Salmo 38:4). Per la Biblia radudy esperanza reʼ buñ: «Colgac arrepentir portín Dios puextca noʼ par gony perdonar; láabu ronladxbu lóoto. Buñ mal non guitzaʼbu mod ronybu pensary né guisiambu cós mal ni ronybu» (Isaías 55:7).