¿Nap bidxiich dool por guirá cós mal ni cayac la?
Mod rabexa la Biblia láani
Yaca. La Biblia diti ná que bidxiich malni, nili raniʼni que mal gapno bidxiich. Noʼ toib refrán ni ná: «Ló bidxiich ralainy guirá cós mal», né buñ rony pensary que refráncu sieedni ló la Biblia. Per ¿scú láani la? Yaca. La Biblia ná: «Órni buñ nadxiʼ bidxiich loni ralainy bisaʼsi cós mal» (1 Timoteo 6:10). a
¿Xí rasetlaa la Biblia de bidxiich?
La Biblia ná que pal raquiinno bidxiich galán, labúu sacnéni lóono (Eclesiastés 7:12). Láaca raniʼni sacró de buñ ni radudy ni nap, né ni racné a stipnés né xpidxiich (Proverbios 11:25).
Per cuá cuidad, la Biblia raiby lóono que bidxiich diti non tzoʼni primer lagary ló xcalnabanyno. Hebreos 13:5 ná: «Mod nabanyto diti non guislooyni que rasobladxto bidxiich, né coltzoʼ nakit né ni napto». ¿Xí rasuidyno de láani? Bidxiich rasacni, per diti láani tzoʼni primer lagary ló xcalnabanyno. Non tzoʼno nakit né cós ni raquinpano: galrro, lairy né toib yoʼ (1 Timoteo 6:8).
¿Xigony nacni toib riesga gandxiʼ buñ bidxiich?
Buñ ni rasobladx diti sacaʼ galnabany tipzó (Efesios 5:5). Primer la, portín galrrasobladx nacni idolatría (Colosenses 3:5). Ni rarop, portín buñ ni rasobladx par guicaʼyibu ni nainy layibu, guirá ór diti rasobyibu ni rony mandary Dios. Proverbios 28:20 nayadit rasetlaa: «Ni ná gac ric naguel, diti salaa de castig». Labúu guichiinni láabu guiscúbu buñ par guicaʼbu bidxiich o dada cuanbu buñ o guigaitybu.
Ná pal diti ronyno cós mal, pal nadxiʼno bidxiich labúu coʼni lóono ló galnagan. La Biblia raiby lóono ndeʼ: «Buñ ni ma goloʼ guic gac ric riabyibu ló tentación né ló toib tramp né ló xidal galrrasobladx ni rony mal layibu» (1 Timoteo 6:9).
¿Ximod racné lóono guisobno ni ná la Biblia?
Pal guirá ór rapno respet ni rony pensary Dios né diti ronyno cós mal par gapno bidxiich, diti sasnitno dignidad xtunyno né sagoʼ nakitno láabu. Né pal ronyno xtem por gonyno ni nábu, Dios raiby lóono ndeʼ: «Dipa sasiana looy, né diti sioʼ dzú sialadxi looy» (Hebreos 13:5, 6). Né láaca nábu ndeʼ: «Buñ ni nac fiel sacaʼ xidal galnasác» (Proverbios 28:20).
a Versículo reʼ láaca góc traducirni modreʼ: «Portín órni buñ nadxiʼ bidxiich loni ralainy bisaʼsi cós mal».
