«Órni góca mbioxgonaʼyen bisana godimbu naʼ né goninaabu naʼ. Né órni buni galtzeʼel suegriya bunynaa naʼ. Láabu né suegriya ni nac buñguieeu nigolú buny mandaryibu naʼ. Buni pensary nagati naʼca» (Madhu, a India).

 Organización Mundial de la Salud rasetlaa que «ló guidopynac Gudxlio buñ ronynaa buñgonaʼ». Láaca rasetlani que 1 de cada 3 buñgonaʼ buñ ronynaa o raxin layibu.

 Pal naclo toibtica de buñgonaʼ reʼ, sigory ronylo pensary que rotísi tzeelo noʼlo ló riesga né tzoʼ ni gonynaa, guininaa o guixin looy. De guirá cós ni ma bisetlano ni rac né buñgonaʼ, sigory ronylo pensary que diti noʼ ni toib buñ ni rioʼ galrrasaʼ por buñgonaʼ. Per ¿rasacyibu par Dios la?

 Texto bíblico: «Buñguieeu né buñgonaʼ» (Génesis 1:27).

 Mod rarexani: Dios bisaʼ buñguieeu né buñgonaʼ, par láabu guiropcayibu rasacyibu. Láaca rabésbu que buñguieeu non gandxiʼ tzeʼel xomodca nadxiʼbu láacabu, diti ni gony mandary láabu né diti par guininaa o gonynaa láabu (Efesios 5:33; Colosenses 3:19). Riendxichni que Dios raniiny que buñgonaʼ tzoʼbu sacró.

 «Órni góca mbioxgonaʼyen, tipnés xfamila bixin naʼ. Órni gopa 17 íz patrón xtuni gochbu naʼ que ma diti ñoʼni dxiin né láabu pal diti ñatnéya láabu. Né ni ma naca nigox, tzeʼela, bixiosa né xinaʼya né xpesina ronynayibu naʼ né rasaca que diti noʼ pu raquiinna. Per después bimbuya Jehová, b ni Bisaʼ lóono. Bisudi que láabu rioʼbu galrrasaʼ por buñgonaʼ, né que láabu ronladxbu né rasaca par láabu» (María, Argentina).

 Texto bíblico: «Noʼ toib amig ni más nadxiʼ saʼ que buchgolné» (Proverbios 18:24).

 Mod rarexani: Toib amig ni nigolú sacnégoluʼ looy. Góoch ximod rasaclo a toib ni raplo confianz pal nanlo que sacnéni looy.

 «Godudy 20 íz diti biseta que goyoʼ ni bixin naʼ. Diti goyoʼya goxt, nigolú goyoʼya ló galrrasaʼ né gopa depresión. Per órni goodxi láani a toib ni bicadiagtzay naʼ, bialdó xcalnabani» (Elif, Turquía).

 Texto bíblico: «Colguisian ladxñabu [Dios] guirá galrrasaʼ ni napto, portín láabu rioʼbu ló galrrasaʼ por lóoto» (1 Pedro 5:7).

 Mod rarexani: Órni raninélo Dios, láabu racadiagbu looy guirási ór (Salmo 55:22; 65:2). Dios ronladxgoluʼ looy, né por ngú labúu gacnébu looy par ganlo que nigolú rasaclo par láabu.

 «Ni bimbuya Jehová gocnéni naʼ par nasaca sacró por guirá ni bunyibu naʼ. Nigoreʼ labúu raninéya par gaabi láabu guirá ni rasaca. Dios nac xomod ximiga ni rientzaay ximod rasaca» (Ana, Belice).

 Texto bíblico: «Sonybu xinésni né buñ bisapy né buñ ni ma bidopy xcalnabany né modcu buñgudxlio diti guitzuiby layibu» (Salmo 10:18).

 Mod rarexani: Jehová mápa mer guinitlóbu cós mal né guirá galrrioʼob ni radudy buñgonaʼ.

 «Ni ma naana que mápa mer Jehová guinitló galrrioʼob ni radudy buñgonaʼ né mbioxgonaʼyen ngú rasialdó xcalnabani. Né ronyni que rasaca sacró» (Roberta, México).

 Pal nainy looy ganlo más xi esperanza radudy la Biblia, xigony labúu gaplo confianz ni gony Jehová ló dzú ni sietra né ximod racnédo buñ né la Biblia lóodo ni nacdo testigos xtuny Jehová, gonab ni tzáguen looy

 Bilit artículo reʼ par cueʼlo láani ló guiich.