Dios ma bisaʼ laidy buñ de toib mod par gac copyni. Órni toib buñ rachoc ña o rac beʼx laidybu, «nimaca laidybu rony que guicá bicuch loni né raxopbeʼelni stoib ná heridcu xiroʼni o mitienni» (Johns Hopkins Medicine). Órni toib buñ raroc nimaca laidybu ronyni que xirunybu raquetni né laidybu ronyni que guicá bicuch loni nimaca.

BUNYSI PENSARY: Pal Dios bisaʼ lóono modreʼ, ¿noʼ razón par diti gapno confianz que labúu guisialbu herid ni napno lainy xcalnabanyno o ló xpensaryno la? Salmista gopbu confianz que Dios labúu guisial guirá ni caxoʼ xcalnabany né guichelbu lairy xieridyibu (Salmo 147:3). Per, pal looy naplo toib herid lainy xcalnabanylo o ló xpensarylo, ¿ximod labúu gaplo confianz que Dios «guichel lairy xieridlo» nigoreʼ né ló dzú ni sietra?

Dios raiby lóono: «Diti guidzuibylo, portín naʼ noʼya né looy. Diti tzoʼlo ló galrrasaʼ, portín naʼ naca Dios xtunylo. Naʼ sonynadip looy, naʼ sacnéya looy» (Isaías 41:10). Órni nanno que Dios ronladx lóono rasacno sacró né raduidyni fuers lóono guicalóno nitisi galnagan. Apóstol Pablo goniʼbu que ni rasacno sacró nacni «paz xtuny Dios ni rony gan guirá pensary». Né láaca goniʼbu: «Labúu racalóya nitisi cós portín láabu raduidybu galnadip naʼ» (Filipenses 4:4-7, 9, 13).

La Biblia rony nadip fe xtunyno que guirá ni gony Dios sac cumplirni. Por ejemplo, Revelación 21:4, 5 (ni noʼ ló página ni sieed) raibyni lóono xí láani gony Dios, né xigony labúu gapno confianz láabu.

• «Sasiábu nís ni rareʼ bisalóto». Jehová sanitlóbu guirá cós ni ratuidy lóono ló galrrioʼob né ragoʼ lóono ló galrrasaʼ, sanitlóbu cós ni ralooypani mitien par stipnés.

• «Ni sob ló trono» lainy guibá, Rey ni nap xiroʼgolu galnadip ni bisaʼ guirá cós saquiimbu xcalnadipbu né xcalmandarybu par ma diti tudyno ló galrrioʼob stoib, né par gacnébu lóono órni caquiinno láabu.

• Jehová raiby lóono que «diitzreʼ diti rachéni né nigolúpani». Ndeʼ raduidy diitz, Jehová, ni nac Dios ni rony xinésni, por mod nacbu raslooybu que sony cumplirbu guirá ni ma goniʼbu.

«Né sasiábu nís ni rareʼ bisalóto, galgoity ma diti sioʼni más, ma diti sioʼ ni guisac maláy, láaca ma diti sioʼ ni guicalas rudx, láaca diti sioʼ ni tudy ló galrrioʼob. Cós ni ma góc ma godudyni. Né ni sob ló trono goniʼ: ¡Bibiʼ!, sony copy guirá cós. Láaca ná: Bicaʼ, portín diitzreʼ diti rachéni né nigolúpani» (Revelación 21:4, 5).

La Biblia né guirá ni bisaʼ Dios racnéni lóono guimbuno Bixiosno ni dxiip lainy guibá. Guirá ni bisaʼ Jehová raibyni lóono sin toib diitz gacno ximigbu, per la Biblia rony láani né diitzreʼ: «Colguibig ronoʼ Dios, né láabu sabigbu ronoʼto» (Santiago 4:8). Né Hechos 17:27 rasetlaa ndeʼ: «Diti noʼbu sit de cada toibno».

Conforma cueʼlo tiemp guimbulo Dios, más saplo confianz que láabu rioʼbu galrrasaʼ por looy (1 Pedro 5:7). ¿Ximod racné lóono gapno confianz lóo Jehová?

Buny pensary ló ni godudy Toru, toib buñguieeu de Japón. Ná xinaʼbu bisuidy láabu de Dios, láabu goyoʼbu lad toib grupo de buñ mal ni noʼ Japón ni laa yakuza. Láabu raniʼbu: «Buni pensary que Dios bianladx naʼ né guirá buñ ni goity nislóya gocni toib castig ni bixel Dios par naʼ, máspa órni goity buñ ni binladxi». Toru raniʼbu por ni goyoʼbu lad buñ mal bidxinbu «gócbu buñ ni bioladx gony mal a stipnés». Ndeʼ ni goniiny láabu ñonybu: «Goniiny naʼ ñati dzú nacsa mbioxhlas, né guirá buñ nimbu naʼ por ni nagati toib buñ ni más nadip que naʼ».

 Per órni Toru né tzeelbu, Hannah, gosaló bisuidyibu la Biblia, bitzaʼbu mod bibanybu né ma gadzé mod bibiʼ buñ láabu. «Bidziguiaʼ buñ ximod tzeʼela bitzaʼ mod góc», raniʼ Hannah. Nigoreʼ, Toru raniʼ, modreʼ: «Ná naana que noʼ Dios, né rioʼbu galrrasaʼ por tigaagano. Diti raniiny láabu que ni toib buñ gaity né noʼbu puext guituidybu scásiʼ xcalkié buñ ni rac arrepentir né guidopy galnabany. Labúu gaibyno láabu nitisi cós ni nainy lóono ni diti ñaibyno a stoib buñ. Mápa mer, Jehová sanitlóbu guirá galnagan né galrrioʼob. Láaca nigoreʼ Dios racné lóono de xidal mod. Rioʼbu galrrasaʼ por lóono né ranbu lóono órni noʼno nabann» (Salmo 136:23).

Xomod raslooy ni gosaclóo Toru, ni ganno que Dios labúu guinitló guirá ni rascudxaʼ lóono, né que mápa mer guinitlóbu guirá ndeʼ raduidyni toib esperanza sacróyen lóono, láaca racnéni tzeeni galán lóono. Scú láani, dada ló gudxliogoxreʼ ronoʼgolu galrrioʼob labúu sacné xcalnadxiʼ Dios looy.