ÓRNI toib buñ rascú tzeʼel nigolú ratudybu tzeelbu ló galrrioʼob. Noʼ buñ labúu ratudy scásiʼ ni rony tzeʼel né diti rasian saʼyibu. * Per ná pal racni scú o yaca, ni ditca biché nigolú rioʼob xcalnabany. ¿Xí labúu gacné layibu órni nigolú cayoʼob xcalnabanyibu?

Ná nigolú rioʼob xcalnabanyibu, la Biblia rasialdó xcalnabany xidal buñ ni ma godudy ló galnagan de clas reʼ. Órni roʼolyibu la Biblia, radudyibu cuent que Dios rabiʼ layibu órni ribdxaʼyibu né rien galrrioʼob ni rasacyibu (Malaquías 2:13-16).

«Órni godudy midid goyoʼya ló galrrasaʼ, looy gocnélo naʼ né bisialdólo xcalnabani» (Salmo 94:19).

«Órni biila versículo reʼ, gosaca suusi Jehová caguʼdx naʼ xomod raguʼdx toib buñ xiin», scá goniʼ Bill.

«Looy diti sasianlo buñ ni diti rasian looy» (Salmo 18:25).

Tzeʼel Carmen biscú láabu né stoib buñ por xidal beʼo. Carmen ná: «Tzeʼela biscú naʼ per gondxichi que Jehová dipa sasian naʼ, Jehová dipa sasioʼob xcalnabani».

«Diti tzoʼto ló galrrasaʼ por nitisi cós, ni gonyto ngú guininéto, guinabto lóo Dios [...], modreʼ Dios gan xi canabto; né paz xtuny Dios ni rony gan guirá pensary san xcalnabanyto» (Filipenses 4:6, 7).

«Guirá ór biila texto reʼ. Laʼga más goninéya Dios más cuaʼya paz xtuny Dios», ná Sasha.

Guirá buñ ni ma bisetlano goyoʼ ór bunyibu pensary que ma cuti biloxni, per gopyibu confianz lóo Jehová, né la Biblia gocné layibu. Bill bisetlaa láani scareʼ: «Fe gocnéni naʼ par nasaca sacró dzú ralooypa ma nac nacsi nabani. Ná por goxeʼsi tiemp gosaaya ló néz ni nacayasquin, Dios dipa bislaʼña naʼ» (Salmo 23:4).