Ii, Bakitingbanga nga ndikidi boro. Ko nga “kindo zegino,” gu boro ni toro nada ni gbegberẽ boro na ki samungu kuti Mbori. (Yoane 14:30; AEfeso 6:11, 12) Baibiri nayugo agu asino du ti Bakitingbanga vurube agi arimo du re gbiati asaka rogo pai yo:

•   Satana, du rogoyo nga “Basovura.”—Eyobo 1:6.

•   Bakitingbanga, du rogoyo nga “Irasoapai.”—Yugoti 12:9.

•   Bakuruwo, nga gu fugo i namangisunge na ni rogo Baibiri si rukuba “Banangi he.”—2 AKorindo 11:3.

•   Iraasada.—Matayo 4:3.

•   Iraziree.—Yoane 8:44.

Anga Ko nga gu sino nga ga gbegberẽpai du rogo boro yo te

 Gu kura aboro nabi Satana Bakitingba gbua wa gu kungbo sino nga ga gbegberẽpai du rogo rani yo. Ono tie, Baibiri ima fura tipa gu fugodagbase nadu dagba Mbori na Satana. Mbori nga rengberengbe boro, sidu, ko aarengbanga ka fura fu gu kura gbegberẽ papara ko nitiko te. (Pa Fu Rugute ni Ue he 32:4; Eyobo 2:1-6) Wakina gure a, Satana aasadi Yesu naadunga na ingapai tiko ya. (Matayo 4:8-10; 1 Yoane 3:5) Sidu, Baibiri nayugoho nga Bakitingbanga nga ndikidi boro angianga gu kungbo sino nga ga gbegberẽpai gbua ya.

 Ya mo si naida ngbarani zere be gupai nga dungu aboro aidanga kuti gupai nga Bakitingbanga nga ndikidi boro te? Wa gu sa te, mbiko Baibiri naya Satana namangasunge na aziree tipa ka da ti gako sasa. (2 ATesaroniko 2:9, 10) Birĩ sa dagba gako abirĩ yo nga ka kiso bangiri aboro ka i iningo wai du ko ya.—2 AKorindo 4:4.

Iraira aberãpai: Gu kura rimo Bakitingbanga nga Lucifer.

 Rengo: Gu fugo pa-AEbere i nasaha rogo kura aBaibiri nga “Lucifer” rogoyo nga “kerekuru Uru.” (Yesaya 14:12) Agu afugo du mbata fu gere nayugo gupai nga gi fugo re i amangisunge na ni si rukuba gu gene zogarago nangia ga agu abakindo nangia ga aBabero yo, nga aguyo si adu nga Mbori nika wasi yo mbiko gayo rukö. (Yesaya 14:4, 13-20) Gu fugo nga “kerekuru Uru” i amangisunge na ni ka sawia gu gene zogarago nga ga aBabero tingbafuo zogarago guari beyo.

Iraira aberãpai: Mbori namangasunge na Satana “ni gu boro nafu mbusa fu aboro” tipa ka digiso gu gako ringbisapai du tipa sapangbanga aboro.

 Rengo: Bakitingbanga nga vura Mbori, angianga gako moyambu ya. Satana Bakitingbanga nasoga agu aboro nairisombori na kini kitingbanga yo ni ziree.—1 Petero 5:8; Yugoti 12:10.