Oó. Ringbisihe kuti gu kuru kekeapai nibee nga ga Baibiri, si nayugo gupai nga i a′arianga ha te, wa vura duhe vurũ nga i aima digo ni fuguhe tipa kutu agarã ti agu akpewaraga paha agberã gberã.

 I aima kura bara akutu gu kuru kekeapai nibee nga ga Baibiri nadu bakuru kusayo. Na betehe na apai rogoyo ni bakiakia, nga gu nayugo gupai nga wiri aingahe aima manga ho i aafugo kehe ni. Dungu agu apai du ni bakiakia re ni gu pai angianga ba pai ya, na si a′arianga rogo gupai yo du ni kekehe rogo Baibiri te. Ono wa vura duhe wo, i ima bi bete agu apai nga gu andunga sa ya, bete agi apai re nangera wa ka i ya i amangihe ni kina wia bakuru kusayo tipa ka aria gu pangbanga nga ga Baibiri. Mo bingo akpiapai ue:

1.   Rogo 1 Yoane 5:7, bete kura kuru sasa afugo Baibiri na agi afugo re rogoho: “ngbangbaturũ yo, Ba, Wiri, na Ziazia Toro du yo: agi aboro biata re dunduko nga boro sa.” Ono tie, kuru keke Ziazia Kekeapai nibee nayugo gupai nga agi afugo re aadunga rogo gu bambata kekeapai i ake Baibiri rogoho te. I arimisi agi afugo re ko yo kusa. * Ni sangbana gipai re, gu sasa afugo Baibiri du awere re ima dia agu afugo re kusayo.

2.   Rogo gu kuru keke Ziazia Kekeapai nibee nadu mbata kusayo, rimo Mbori akuru yo bara akutu. Ono wa vura duhe wo, badungu sasa afugo Baibiri aima diaha kusayo na ki moi kina agu arimo nga ga sunge du wo “Gbia” watadu “Mbori” kubaha.

 Ka da ku awere, i ima kura bara badungu kuru kekeapai nibee nga gu nasaha taata ka ino gu kekeapai du ni irairaha ki susi gu nadu mbata. * Ho i aringbisa agi awaraga re ni sa, ginipai si ayugoho nibi pa wai du Baibiri ni ruruhe areme?

•   Ho gu wene bawirikipai nangia William H. Green aafurani tipa (“Kuru Ndika,”) ko aya: “Ani ima rengba ka gumba gupai nga gu kura kekeapai ho i nasaha ni ruruhe susi he te.”

•   Nibipa “Vovo Ndika,” wene bawirikipai tipa Baibiri nga F. F. Bruce ake gupai nga: “Gu goapai du tipa gaani Vovo Ndika ima du ni bakerehe kisusi gu goapai nga ga gu kura kekeapai kura aboro akehe, boro ho rengbe ka berãpa kapa kuti ni te.”

•   Sir Frederic Kenyon, nga gu ko nadu na pagbia kurii gu kekeapai nibee i ake Ziazia Kekeapai ku rogoho aya, boro “ima rengba ka dia Baibiri naabaha dũ ku be ni zanga gunde ki pe gupai nga ni zadi Fugo Mbori nga rengo nga gu ko afuhe naima raka tipa akama agarã dagba rika ngbatunga aboro kuti kura rika ngbatunga yo.”

•   AYudo gbiati agu aKristano na fugu ke Baibiri aima banda agu apangbanga rogoho nga gu naayugopa gu kere aingahe ga Mbori aboro amangihe. * (Pa Geda Aboro 20:12; 2 Samuere 11:2-4; AGaratio 2:11-14) Kurii gure a, i aima banda agu apangbanga ku rogoho nadu tipa gu zahe nadu fu gu rikaaboro nangia aYudo mbiko gayo basasangba na agu azahe a naakusa agu arugapai ku yangara kina aboro anaamaha nitiyo. (Osea 4:2; Maraki 2:8, 9; Matayo 23:8, 9; 1 Yoane 5:21) Ho agu aboro nafugu ke agi apangbanga re ni afuguhe ni ruruhe kina wai du he ziazia, i ayugu gayo du ni ruruse na ki yugu gayo iriso tipa Fugo Mbori du ni ziazia ha.

•   Ya mo si arunga ani idi kuti gupai nga Mbori nga gu ko naenge pa ke Baibiri ima rengba ka banda pa duhe ni ruruhe te? * (Yesaya 40:8; 1 Petero 1:24, 25) Nirengo, anga gako bipai adu nga si fu undo fu kina agu aboro nadu mbata kusayo te ono zavura ani areme a. (1 AKorindo 10:11) Ka pe rengo, “agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.”—ARomo 15:4.

•   Yesu gbiati apefuoko anaadiapai rogo gu Kuru Ndika nga gu i afugu kehe zanga du na kapa singia gu kuru kekeapai re ni ruruhe.—Ruka 4:16-21; Amokedi 17:1-3.