Ya Mo ga Mbori Kindo Ngbaduro Yo?

SI TONA MANGASUNGE

Gu Karagapai nga ga Baibiri

Oó, anga ga Mbori Kindo gbua nga gu pai du ngbadu Kristano yo te. * Baibiri nayugo gu ndikidi ba du he rogoho ho si aya ni tipaha wẽ si nga “gu ngbi nga ga ngbangbaturũ.” (Matayo 4:17) Mo bingo wai Baibiri ayugoho ni gu ndikidi zogarago du ngbangbaturũ yo.

Ga Mbori Kindo na gaha abazogo, avuruhe, gaha arugute, na si namanga gu sunge nga ga sa gupai Mbori akpinyemuhe si mangi ngbangbaturũ yo na auru kpotosende no.—Matayo 6:10; Yugoti 5:10.
Ga Mbori zogarago, watadu gako Kindo, nika zogarago kurii “arikaaboro, na ngbatunga aboro na afugoyo” nga agu yo du auru kpotosende. (Daniere 7:13, 14) Gu pagbia du tipaha gaha zogarago ayengo be avuruhe te, ono si naye be Mbori nitiko.—Atambuahe 2:4-6; Yesaya 9:7.
Yesu aya fu gako ruru amokedi wẽ i nika gbiatiyo na ko rogo ga Mbori Kindo du ngbangbaturũ yo ka sungo “auru ambataabakindo.”—Ruka 22:28, 30.
Gu Kindo re na avura ha ti ni nga aguyo si nika gbarasa yo.—Atambuahe 2:1, 2, 8, 9; 110:1, 2; 1 AKorindo 15:25, 26.

Baibiri ayugongo gupai nga ga Mbori Kindo nga gu du ngbangbaturũ yo si ngbaduro yo rogo gu gene nga si nazogarago ngbadu boro yo te. Ono tie, si nayugo gupai ayugo nga ‘gu pangbanga nga ga ngbi,’ watadu “wene pangbanga nga ga ngbi” si naida aida si zi ngbadu rani yo.—Matayo 13:19; 24:14.

Rogo gupai yo nga “ga Mbori kindo gu du rogo ro yo” nga gine?

Gu kura aboro ima gbiatiyo na kpakarapai nibipa wari du ga Mbori Kindo ni mbiko wai gu kura sasa afugo Baibiri nasa gupai du rogo Ruka 17:21. Ni kpiapai, gu sasa fugo Baibiri nga King James Version naya “ga Mbori ngbi du kpotoroni yo.” Tipa ani rugutirani na gi veresi re wenengai, ani du wa ka ani rugutirani na ginipai si afura tipaha na agu apai du mbata fu gu veresi re.

Ga Mbori Kindo aadunga kpoto gu gbegberẽ asogo Yesu yo nga aguyo naida ka imoko te

Yesu aafura fu aFarusi, nga gu badona nga ga abangbembatayo rogo pambori naasoga ko na kini fubee sa imo ko. (Matayo 12:14; Ruka 17:20) Ya mo si ruaru ani berẽ gupai nga ga Mbori Kindo adu rogo gu kpotoyo yo naadunga ni ruruhe ya? Yesu aya fu yo wẽ: “Kpotoroni yo hi be biriki na ingapai.”—Matayo 23:27, 28.

Gu kura asasa afugo Baibiri ima maa agu afugo Yesu zukazuka du rogo Ruka 17:21: “Ga Mbori Kindo kina ane na oni.” (gu kekepai duni bibiri he re, ani du moihe wo; Contemporary English Version) “Ga Mbori Kindo kina dagba roni.” (New World Translation, footnote) Gu Kindo du ngbangbaturũ yo adu “na” watadu “dagba” aFarusi, rogo gu gene yo nga Yesu nga gu boro Mbori nasia ni ni gaha Bakindo, naru barabangiriyo.—Ruka 1:32, 33.

^ par. 1 Dungu ariigbu pambori nga ga aKristano nayugo gupai nga ga Mbori Kindo rogo boro yo watadu ngbadu boro yo. Ni kpiapai, Amerika yo, gu riigbu pambori nga Southern Baptist Convention agumba gupai nga, ga Mbori Kindo “nga gu zogarago nga ga Mbori du ngbadurani yo gbiati gu raka nga ga boro nitini.” Wa kina gure a, gu buku nga Jesus of Nazareth, Pope Benedict XVI nape gupai nga “ga Mbori Kindo naye ka ani du ni agu aboro nagiasangba kpotorani yo.”