Ani na ngbarago ka tingida gupai nga Yekova nafu maku afu fu gako aboro Ukraine yo si du nga ndu gupai awirinarani adu ti ni na rengba rogo gu gbata re naabaha ka manga Tingidapa Kpio Kristo. Badungu aBambu Kindo Ukraine ku putu yo i amangi Tingida Pakpio Yesu rogo yo fu agu awirina nazubo koyo. Awirina amangi Tingida Pakpio Yesu yo gbe rogo abadona, kini yambu agu aboro rogo vidio yo naadu nga na rengba ka ndu ya.

Rogo badungu apapara gu gbata re, woro ambanya ka fu zahe fu aboro apoi rogo gu uru nangia ga Tingida Pakpio Yesu re naabaha. Ho nyemu ada ni, si aongo. Sherhiy du Druzhkivka yo, Donetsk Region yo aya, “Ani aima digo nimangi kparakpee nga ka pa Tingida Pakpio Yesu gberẽnga mbiko woro bombu ya.” Ngbutuko mbata fu Tingida Pakpio Yesu, woro bombu aongo na ka woro ambanya adunga a ya.”

Badona agu abatungusipai du nigbinza yo na gu kpokorokpokoro yo du Nemishaeve yo, mbembedi na Kyiv, aadunga na rengba ka manga adunguratise te tipa he niima susa diwi. I aima digo ni mangi kparakpee tipa kadu pati Tingida Pakpio Yesu. Vitaliy, nga bakumba, aundo gi badona aboro re tipa i mangi Tingida Pakpio Yesu. Ko aya, “We karaba aadunga te, si du ani amangi Tingida Pakpio Yesu ima bataria watadu baro. Rago afaanga te. Manzigo aadunga berani te, sidu, wire ata gu kundi nga violin tipa si undo rani ani bi abia.”

Oleksandr, nga bakumba naraka rogo gu rago du vura rogoho, aya: “Ti regbo tua nga ga yamba aboro tipa Tingida Pakpio Yesu, ani aarengbanga ka keka awaraga fu aboro rogo gu dagbarago nga ga gaani dungurati te mbiko i aima bafa bombu ku rogo agu akporo re na airaha ki ima ora. Sidu tie, ani ayambu agu aboro ani aini yo, agu aboro ani agbiayo tii agu abambu du sende yo, na fu agu aboro ani aoro na yo. Gu badungu aboro ani agbia yo yo aDezire Yekova aatungusanga pai fuyo mbata te. Badungu yo naye fuo rani tipa ani mangi Tingida Pakpio Yesu na yo.”

Wa vura duhe nga ani ata gbianga tingidapai be agu adungurati dunduko du Ukraine yo te, gupai ani nainihe nga aboro bange yo niima susa 210,000 naye tipa Tingida Pakpio Yesu.

Wirinarani sa dagba agu awirina du Ukraine yo nape pa gako abipai tipa Tingida Pakpio Yesu, ko aya: “Kina wai bambu imarago naafu kidohe fu abakama kurungba nga i ima mbeda kada pangba ime, kina wo a Tingida Pakpio Yesu akido re nga gu uru nga ga Yekova ima mbeda kada. Gu Tingida Pakpio Yesu du rogo gi garã re, ima sa gimi ida si du ni nyanyakihe gbe.”

Dakuti Zerekpe 21, 2022, agi atingidapai du kusende re ani nagbia ha Ukraine yo. Agi anamba re mburuhe rii agu atingidapai ani nagihe ngba agu awirina du rogo gu dagbarago re. Ono tie, ndikidi agi anamba re ima rengba ka susa gure, mbiko si ni kpakarakpakaraha tipa kaa fura na awirina rogo agu arago dunduko nga gu ringara re.

• Abatungusipai 35 ima kpiko

• Abatungusipai 60 ima õka

• Abatungusipai 43,792 ima ora kusayo rogo akpuyo kurogo agu aba du zezeredi

• Akporo 374 paha nagberẽ

• Akporo 347 abarapaha nakuadi ni bakerehe

• Akporo 874 abarapaha nakuadi tooni

• Bambu Kindo 1 paha nagberẽ

• Abambu Kindo 10 abarapaha nakuadi ni bakerehe

• Abambu Kindo 27 abarapaha nakuadi tooni

• Bange agu ARondo du Tipa fu Undo ti Regbo Gberãngo (DRCs) 27 namangasunge Ukraine yo

• Abatungusipai 44,971 gbia undo vurube gu Rondo du Tipa fu Undo ti Regbo Gberãngo ka ora kurogo agu aba du zezeredi

• Abatungusipai 19,961 zubo kurogo kura aringara na i nagbia undo be akurayo airisimbori