Gu kura agamahe kinaho du na nyanyakipaha furani mbiko gu boro fuhe nga kikiipa boro watadu gu boro ani airisa ni airisa. Gu kura agamahe kinaho du naumba paha, ono ani nabihe na nyanyakipaha mbiko gumerani watadu wene bakurearani fuhe. Kina gu bangisapai re naadu tipa gu gamahe Russell afuhe fu Jordan nga gu i nifura tipaha rogo gu kekeapai gere naye fuoho. Ginipai gipai re ayugoho tipa gu gamahe nga ga motumo?

Nibambatapai, Ziazia Kekeapai nape gupai nga, ‘Mbori akedi bangisa Wiriko ku zegino, ani du ni ungarani mbiko ko.’ (1 Yoane 4:9) Si nga gu gopai nasa gu gamahe re si du na nyanyakipaha. Boro ho du na bakere pagbia susi Mbori te. Nibipa ko, gu Ebere nangia bake papara Atambuahe akepai ki ya: “Du rimoro nga Yekova, nga gu Ko nga Bahe ki susi auru kpotosende dunduko.” (Atambuahe 83:18) Ka ani gbianga gamahe be bakerepa boro kii kisusi ko te.

Uepai nga, Mbori nga “Barani.” (Yesaya 63:16) Wai gu duhe wo? Ko afu unga furani. Kurigure, ko nangera fuo rani kina wai baagude ninaangera fuo awirini. Ko afura tipa gu gako aboro naadu mbata wa Efuraima, Mbori asanahe nga: “Gu wire nga Efuraima, ngba ko ti re gbe? Ko nga gu wire nga mangure? . . . kpotore yo du ni fudifudi he tipa ko; mi aína pai aina fu ko ni rengo.” (Yeremaya 31:20) Kina wo Mbori abi airisiko areme. Anga ko sa nga kina Bakusirani te, ono ko a nga ruru Barani na ni Bakurearani. Ya mo gere asanga gu gamahe du beko fu rani na nyanyakipaha te?

Gu kura agamahe kinaho du na nyanyakipaha mbiko i afunga ha ni dingisoro te ono mbiko ndikidi nyemuse. Ndikidi boro gamahe aidanga i tumo tipa gani wenesino te.

Mbori afu Wiriko tipa rani bambiko ko aima kpinyemu rani. Baibiri naya: ‘Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino.’ Tipa gini ndupai? “Ani du ni ungarani mbiko ko.” (1 Yoane 4:9) Ya mo dingisoro du naadu fu Mbori ko mangi gipai re? Wagusa te! “Gako undahe rogo gu tumori yo du rogo Kristo Yesu yo.” Nayugopa ga Mbori ‘undahe.’—ARomo 3:24.

Tipagine du ga Mbori gamahe ti ni ni “undahe”? Baibiri naya: “Mbori amoi dezire gako nyemuse fu rani nikpi Kristo tipa rani wa ani adu ni aboro ingapai.” (ARomo 5:8) Gu nyemuse zanga gbangbati naasa Mbori ko mangipai kuba agu aboro du ni rurungbura yo, adunga boro ho ka undo yo ya, na aboro ingaapai. Ani aarẽnga tipa gu nyemuse re te, na ka ani tumongo ko tipaha a te. Kina gako gamahe sa nga gu bakere gamahe nga ga nyemuse.

Gu kura agamahe kinaho du na nyanyakipaha furani mbiko guhe gu boro re ambupaha tipa ka fu gu gamahe re furani. Ho boro afu guhe ni furani du na nyanyakipaha fu ni, ani nabi gu gamahe re na nyanyakipaha bambiko agu apai mbu ni paha tipa ka fuhe.

Mbori ‘afu bangisa Wiriko.’ (Yoane 3:16) Ko arengbanga ka fu wiriko naadu na nyanyakipa ko tipa rani te. Tipa gu dungu agarã Mbori aakusa ahe, Yesu aamangasunge pati ko na “rago angba ti ko.” (Asanza 8:30) Yesu nga gu wiri Mbori “du nyemuko ti ko gbe” na “nayugo Mbori nga gu ko ka i abi nga ko” ya. (AKorosaio 1:13-15) Gu bakure du dagba Mbori na Yesu nga nyanyakipa bakure.

Wa si avura duwo, Mbori “nahe Wiriko.” (ARomo 8:32) Yekova afu kina boro guhe paha anyaki anyaka gbe fu ko tipa rani. Gamahe ho paha anyaki susi gure fu ko te.

Gu kura agamahe kinaho du furani na nyanyakipaha mbiko i fuhe kina boro ti regboho, kina boro ti gu regbo ani aidaha ti ni. Ni kpiapai, wai gu rengbe mo ka du ka boro tumo marã adawa foro nga gu mo arengbanga ka tumoho ya! Gu gamahe he re nadu foro na nyanyakipaha, nga wo te?

‘Wa aboro nakpi akpi dunduko rogo Adama yo, a wo rogo Kristo yo i adu adu ni ungayo dunduko.’ (1 AKorindo 15:22) Wa ngia ani atita Adamu, ani dunduko “nakpi akpi,” gene aadunga berani ani ne kaza, kpio, watadu ka mbakadapai dagbarani na Mbori na ki ru ni gigiri rani bara bangiriko te. Na wangia ani rungorungo aboro, ka ani batasinga “unga” rani watadu ga kura aboro te. Ziazia Kekeapai naya: “A nga boro ho sa rengbe na tumo wirinani te, watadu ka fu motumo fu Mbori tipa ni a te . . . gasi pa ha agasa kindi.” (Atambuahe 49:7, 8) Ani aaida undo ni bakerehe gbe bambiko ani aarengbanga ka tumo tipa motumo te. Kuti tirani, he aadunga ho ka undo rani te.

Mbiko nyemuse, Yekova atumo tipa gu “batasahe” ani aaidaha, bambiko rogo Kristo yo, aboro “adu adu ni ungayo dunduko.” Wai gu motumo adigiso gipai re? “Kure Yesu nga Wiriko ki nigirisi rani  ti ingapai dũ.” Nirengo, idapase kuti kure Yesu nazaka gene furani tipa i mbupai furani tipa gaani ingaapai na ani ki gbia nyenye unga. (1 Yoane 1:7; 5:13) Na ginipai motumo tumorii nika mangaha tipa gu gaani aboro naima kpiko? “Bambiko wa kpio aye be boro, a wo zinga kangba aboro be kpio aye be boro [Yesu].”—1 AKorindo 15:21. *

Gamahe ho kikiipa boro afuhe rogo nyemuse yo wa ga Yesu motumo tumorii te. Boro ho nafu nyanyakipa he tipa rani wa gu Yekova Mbori afuhe te. Gamahe ho i aafuhe kina boro ti regboho susi motumo tumorii tipa ka batasa rani be ingaapai na kpio te. Nirengo, gamahe ho kiipaha ki susi motumo tumorii te.