BARA rogo gu garã nangia 670 Mbata fu Batikayo Kristo, Asura aima da ni bariwara ngbii rogo zegino, gu bambu banda kuruahe tipa yugoho du rimoho nga The British Museum Blog asaki gupai rogo gayo bangiriba nga ga Internet nga, “si agbataka tona Kupurio yo ku dioyo ki da ku Iran yo ku uroyo, na tifuo bete agarã, si aima koda Ezipeta.” Na gaha bakere gbata nangia Nineve angia bakere gbata kisusi rogo zegino. Si adu na badungu wene aati, kikindigi wenewene abambu, gbiati ba banda abuku tipa gedaha. Kekeapai ti vuro agu abambu nga ga gu Nineve naadu mbata nayugo gupai nga, Bakindo Ashurbanipal wakina kura abakindo aAsuro, aayamba tiko nga “bakindo zegino.” Ti regbo gako zogarago, si aangera wa boro ho narengbe ka diabe Asura na Nineve te.

Ono ho aAsuro adu ni na bakere ome kisusi, ga Yekova nebi nangia Zefania agumba gupai kumbatayo nga: ‘[Yekova] nika gbarasa aAsuro; ko amanga Nineve ni gbarasigbarasi he, ni kungba rago wa ngbi ngume.’ Kurigure, gu ga Yekova nebi nangia Nauma agumba gupai kumbatayo nga: “Oni gbú feda ni gbu ahe, oni gbú dahabu ni gbu ahe! . . . Kungba rago du! Bate na gberã rago! . . . Agu yo dunduko nikabi ro i aóra be ro ki ya, Nineve du ni kungba rago!” (Zef. 2:13; Nau. 2:9, 10; 3:7) Ho aboro agi agu asangbanebi ni re, i aima rengba ka bakabangiriyo nga: ‘Ya mo ka pai wa gure mangi amanga nirengo? Ya mo i rengbe ka diabe Asura du na bakere ome ti ni kisusi?’ Si aima rengba ka ngera wa gupai kaa manganga ya.

Wa si avura du wo, i aima diabe aAsuro! Fuo bete regbo tifuo gu garã nangia 600 Mbata fu Batika yo Kristo, aBabero gbiati aMadaio aima zio Asura. Aboro ambu raka Nineve yo na niyangaraha, bangiri aboro ki go tipa gu gbata re! Ringbisihe kuti gu waraga nga ga The Metropolitan Museum of Art du Amerika yo, aboro aatingidanga pa gu gbata re berewe te, na aboro ainipa Nineve kina rogo Ziazia Kekeapai yo. Biblical Archaeology Society Online Archive, agumba gupai nga, ti tonatona 1800, “boro ho naini singia gu bakere gbata nangia ga aAsuro adu nzunzu ti ni te.” Ono ti gu regbo re, rogo 1845, gu bageteke kuruahe sende yo nangia Austen Henry Layard atona ge rago sende yo rogo gu gbata i agbarasihe nangia Nineve. Gu he ko abi he yo ayugu gupai nga Nineve angia bakere gbata kisusi.

Pa digiso gu sangbaanebi naadu tipa Nineve re nanyakasa gaani kido kuti agu asangbanebi nga ga Ziazia Kekeapai nga gu du tipa pa digido agu azogarago du areme nga si nika digiso tihe adigiso a.—Dan. 2:44; Yugo. 19:15, 19-21.