Da nga Mbori? Rimo Mbori Nga Da? Mbori nitiko naya: “Mi nga Yekova, gere nga rimore.” (Yesaya 42:8) Rimo Mbori kuru rogo Ziazia Kekeapai yo wa bara 7,000. Ono tie, badungu asasa-fugo Ziazia Kekeapai ima aria gi rimo re ngba gu gene angbanga ya na agu arimo nga ga sunge du wa, “Gbia.” Mbori naida gupai nga mo du ni bakureako, sidu, ko nangarasa ro nga mo “kpári ti rimoko.”​—Atambuahe 105:1.

Agu Arimo Yekova Nga ga Sunge. Ziazia Kekeapai nayamba Yekova na agu arimo nga ga sunge du wa, “Mbori,” “Mbori Tanduapai Dũ,” “Bakusiahe ,” “Barani,” “Gbia,” na “Bakere Bakindo.” Badungu akparakpee du rogo Ziazia Kekeapai yo i nafura tipa Yekova rogoho na gu rimoko nga ga sunge gbiati ndikidi rimoko, nga Yekova.​—Daniere 9:4.

 Wai du Mbori. Mbori nga toro ka boro bingo ko te. (Yoane 4:24) Ziazia Kekeapai nagumba gupai nga “a nga boro sa nabi Mbori wa sa te.” (Yoane 1:18) Ziazia Kekeapai nayugopa gako aberãpai. Aboro ima rengba ka sako ko du na gberãrago, watadu i ima rengba “ngba ti ko.”​—Asanza 11:20; Atambuahe 78:40, 41.

Gu Wene Asino du ti Mbori. Mbori akparanga aboro te. (Amokedi 10:34, 35) Ko berewe a na ‘nunga aboro na undahe ti ko, na ni bayee ko tipa zinga, ki du na inapai kpaima na rengo.’ (Gate 34:6, 7) Ono tie, asinoko gudu ho biama nga gu ngbaangba gbe.

Ome. Wadu he nga ko nga “Mbori Tanduapai Dũ,” ko na gu ome tiko adunga digidoho tini ya tipa ka manga ai gupai ko nakidohe tipaha.​—Bambata Pai 17:1.

Tatamana. Ga Mbori tatamana ima susa ga aboro dunduko. Si nga ndu gupai Ziazia Kekeapai aya tini tipa ko ko nga “bangisa tatamana” Mbori.​—ARomo 16:27.

Ruru Sarangbanga. Mbori namanga agu apai du ni ruruhe ti aregbo dunduko. Gako mangaapai “ziazia,” na ko “zanga irairapai.”​—Pa Fu Rugute ni Ue he 32:4.

Nyemuse. Ziazia Kekeapai nagumba gupai nga “Mbori nga nyemuse.” (1 Yoane 4:8) Mbori ayugungo kina nyemuse gbua sa te​—ko ni tiko nga nyemuse. Gako nyemuse na ome kurii agu apai dunduko ko amangaha, na si nafu undo furani ngba dungu agene.

Gu Pabakure du Dagba Mbori na Aboro. Mbori nga gu barani du ngbangbaturũ yo du na nyemuse. (Matayo 6:9) Ka ani du na idapase kuti ko, ani ima rengba kadu ni abakureako. (Atambuahe 25:14) Nirengo, Mbori nayambaro nga mo mbedi na ko rogo kparakpee yo na ki ‘bá agu apai nafuda ro ku auru ko yo; mbiko ko naberã pa ro aberã.’​—1 Petero 5:7; Yakoba 4:8.

Yesu Nga Mbori Te. Agu apai du tipa Yesu kia​—ko nga gu yangada boro kina Mbori ambakadi ko ni beko. Si nga ndu gupai Ziazia Kekeapai ayambako tini nga Wiri Mbori. (Yoane 1:14) Tingbafuo Yekova kusi Yesu, ko amangisunge na bambata wiriko ni “bangbasia boro sunge” tipa ka kusa ahe dunduko gbiati aboro.​—Asanza 8:30, 31; AKorosaio 1:15, 16.

 Yesu aapenga gupai nga ko nga Mbori te. Kuba gure, ko asaki gupai nga: “Mi du yo du ko ni [Mbori], ko nakedi re.” (Yoane 7:29) Ho Yesu aafura ni fu boro sa dagba gako abawiriki yo, ko ayambu Yekova nga ‘Buba nga Baroni’ na “gi Mbori nga gaoni Mbori.” (Yoane 20:17) Tingbafuo Yesu kpi, Yekova azingisiko be kpio ku rogo raka ngbangbaturũ yo na ki fu bakere pagbia fuko ku kumbabeko yo.​—Matayo 28:18; Amokedi 2:32, 33.

Yesu Kristo na Rengba ka Undoro Mo Mbedi na Mbori

Yesu aye ku auru kpotosende ane tipa ka yugopai furani tipa Bako. Yekova nitiko aya tipa Yesu: “Wire du re, nyemuko namanga re; oni gí pako.” (Marako 9:7) Yesu ima ino Mbori kisusi ai boro. Ko aya: “A nga boro sa ini da nga Wiri te, kina Mbori nga Ba na gu ni Wiriko nakpi nyemu ka yugo ho fu ni.”​—Ruka 10:22.

Yesu nayugo agu asino du ti Mbori teketeke. Yesu awiriki agu asino du ti Bako teketeke si ki sako ko gumba gupai nga: “Gu ni bi re ni bi Buba.” (Yoane 14:9) Yesu agbe aboro koyo du Mbori ni ni wirikako gu nyemuse nga ga Bako rogo agu apai yo ko agumbaha na kini mangihe. Ko aya: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” (Yoane 14:6) Ko ape kurapai berewe nga: ‘Ndikidi aboro nika irisa Mbori nga Ba ni toro na rengo, bambiko Mbori nga Ba nakpi nyemu kina yo i du ni gako aboro irisa.’ (Yoane 4:23) Mo berẽnga kurii gupai re! Yekova nangera tipa ngbatunga boro wa mo were nga guni naida ka ino rengo tipa ko.