GU FUGO sayo ho nga “ngbagida” rogo Baibiri yo, si ima rengba ka yugopa dungu angbagida. (Amo. 8:28, 29, 38) Ono tie, si nawiraha wa gu boro Etiopia re aazubo rogo kikii ngbagida nga guru naima kio kisusi gu rukutu wiri angbagida i anaamangasunge na ami ti regbo vura watadu ti regbo ambaro. Ani bingo bete andu apai tipa gi digisopai re.

Gu boro Etiopia re angia bakerepa boro nandu nunguro ku rogo tuturũ rago. Ko angia ‘banyaki nadu na bakere tandu fu Kandake, nangia nakindo aEtiopia, ko adu ni ira gari ũkumuko dunduko.’ (Amo. 8:27) Gu Etiopia naadu mbata nakoda gu Sudan du awere na papara gu Ezipeta du awere ku sudiyo. Wa vura duhe nga si nawira gupai nga gu kumba re aandunga kina rogo gu bangisa ngbagida re tipa gako nunguro dunduko te, si nawiraha wa ko aima roga dungu ahe nga gu si aaidaha. Bete agu angbagida i anaamangasunge na ami tipa kaa tinda aboro rogo bambata sa kama agarã Mbata fu Batikayo Kristo anidu na andu ra biama gbiati he ariyo naadada rago. Ringbisihe kuti gu kura buku sa nafura tipa Amokedi, si ape gupai nga, “Gi ngbatunga ngbagida re anidu na kiki ba tipa ka tinda amangu na gu kura ahe. Si kini sa gupai nga boro ndu gbanga nunguro.​—An Exegetical Commentary.

Gu boro Etiopia re aagedapai ho Firipo aye ni fuoko. Gu pangbanga re nape gupai nga, “Firipo ki oro koyo du [gu banyaki re] ni, ki gi pako ko nigedi gu pai Yesaya ake nga nebi.” (Amo. 8:30) I anaambakada nga gi ngbatunga angbagida re tipa gu nunguro du ni ipiipihe te. Mbiko gupai nga gi ngbatunga ngbagida re aandu yee, si ambu gene fu banyaki ko gedipai na ki sa Firipo ko gbia gako ngbagida kuti gako ru.

Gu boro Etiopia re ‘akpari fu Firipo ko biti i sungu na ko.’ (Amo. 8:31) Ka i aya u angia gu ngbagida nga ga ambaro ru, ka si aidi gupai nga gu boro nazubo na u ru mbata. Ono tipa gu ngbagida i ambakadi ru tipa nunguro, ba adu kinaho fu banyaki gbiati Firipo tipa i sungu rogoho.

Mbiko gupai Amokedi kapita 8 apehe, gbiati gu kura agopai nga gu du tipa kuru apangbanga, gaani awaraga ti agi aregbo ninaasusa re ima yugo asura gu banyaki nangia boro Etiopia ko ni zubo rogo kiki ngbagida angianga gu rukutu angbagida i anaamanga sunge na ni tipa vura watadu ambaro ya.