Wai ka Yugo Nyemuse fu Kura Aboro
Wa duhe nga ani aenge ti bangisa kumba sa nga Adamu, ani nga aborokporo sa. Wa vura duhe nga si naida aborokporo yugu nyemuse na irisa dagbatiyo, si ima kpakara ka gbia gi ngbatunga nyemuse re ti agi aregbo re. Gere nga gupai gaani Mbori nga boro nyemuse aidaha te.
GUPAI ZIAZIA KEKEAPAI AGUMBAHA TIPA NYEMUSE
“Oni akpí nyemu akuaroni wa oni akpi nyemu tironi.”—PA AMOTUMO 19:18.
“Oni kpí nyemu avuraroni.”—MATAYO 5:44.
GUPAI KPINYEMU KURA ABORO AYUGOHO
Mo bingo wai Mbori nafura tipa nyemuse rogo Fugoko rogo 1 AKorindo 13:4-7:
“Nyemuse nahi pai ni gbanga ha, ki du na weneringise.”
Mo makianga gipai re: Wai gu mo nidu ho kura aboro amangapai ni na mo na zerangbaduse gbiati weneringise na ka i akaraganga pai na zinga ho mo amanga aingahe ni ya?
“Nyemuse akpi nga he te.”
Mo makianga gipai re: Wai gu mo nidu ho kura aboro abiro ni na kapa watadu ka kpi ro?
Nyemuse “agbata nga gaha pai te.”
Mo makianga gipai re: Wai gu mo nidu ho kura aboro ni du ni na nyemu ka du na irisa kuti gamo abipai na ka i akanga kina kuti gayo aberãpai ti aregbo dunduko ya?
Nyemuse “aberã nga gbegberẽpai kuti boro te.”
Mo makianga gipai re: Mbori na nyemu ka mbupai fu agu aboro ingipai na i ki saberã yo. “Ko azá nga aboro dedede te; ko aká nga kuti gako zinga kindi a te.” (Atambuahe 103:9) Ani nidu na tambuahe ho gu boro ani naingi kuti ni ambupai ni furani. Sidu, si naida ani du nga regerege ka mbupai fu kura aboro ho i aingapai ni kuti rani.—Atambuahe 86:5.
Nyemuse “angi nga mbiko irairapai te.”
Mo makianga gipai re: Ani aidanga gupai nga aboro ngi na ngbarago ho gbegberẽpai amanga rani ni te. Sidu, si aidanga ani ngi na ngbarago ho kura aboro arungo ni te, ka si vura du nga agu aboro re aima rungosi rani mbata vurũ.
Tipa gupai nga ani gbia ga Mbori maku, ani du wa ka ani kpinyemu kura aboro ngba agi agene re ka i vura ngia kina ada vurũ. Gu gene rengbe ani ka manga gipai re ngbaha nga ka undo agu aboro du rogo zingo.
