TIPA agu aYudo naadu Ringara Mokido yo, garã anaatona ti regbo sopabino na regbo rũ ahe, nga gu nanaamanga rogo agu adiwi du awere nga Mbirinvuo watadu Tanvuo.

Aboro anaainopa gbanga diwi nibiyo diwi, naanidu na aˈuru nga 29 watadu 30. I anaainopa gbanga garã nibiyo uru. Ono tie, gu garã i anaabihe kuti pa kura diwi anidu ni guruhe ringbisihe kuti gu garã i anaabihe kuti uru. Sidu, si aaida i bi wai rengbe yo ka sa gi gene geda aregbo naanidu ue re si naandu kina sa. Ngba gi gene re, gu karendaria re aima rengba ka ndu kina sa na agu aregbo naanidu tipa rũ ahe na ke ahe.

Ono ti regbo Moize, Mbori ape gupai fu gako aboro nga gu garã nga ga pambori nika tona rogo gu diwi nangia Abiba watadu Nisana, agu adiwi re rengbe kadu areme nga Marungu watadu Zerekpe. (Gate 12:2; 13:4) Gu pumbo nanaamanga rogo gu diwi re aakoda ke zende ahe du wa mapunga.​—Gate 23:15, 16.

Kura bawene bawirikipai sa aya, “Si anidu taata ka ino gu regbo si aida i moi kura diwi ku rogo karendaria.” Ko aya berewe a, “Si anaaida i mangi Pumbo Susiri ti gu regbo diwi naima kura dunduko rogo gu diwi naaningia Nisana (Nisana 14) na si anaaida si naamanga ti aregbo dunduko tifuo ti uru rogo Marungu watadu Zerekpe ho bagizo uru gbiati yuru anidu ni kina sa. Na, ka si anidu nga i bihe mbembedi kuti digido garã nga uru Pumbo Susiri nika ti ku rogo gu uru naanidu mbata fu gu uru si aida si ti kurogo ho, aYudo anaamaa kura diwi berewe nga gu ru naanidu mbata fu Nisana.”

ADezire Yekova namangasunge amanga na gi gene geda regbo re ho i aida ka bi gu ramediwi ni ngba tipa Tingidapa Kpio Yesu, nga gu ninaamanga rogo Marungu watadu Zerekpe na si kini ndu sa na gu diwi nga Nisana 14 nga gu ru du rogo gu karendaria nga ga aEbere. I naagumba pa gi ramediwi re fu adungurati rogo zegino dunduko mbu regbo kindi koyo. *

Ono waigu tie aEbere anaaino gu regbo gu kura diwi nadigi ti ni na vovo ru ki tona? Areme, mo ima rengba ka bi ramediwi rogo karendaria watadu rogo gamo terefuni. Ono ti agu aregbo i ake Ziazia Kekeapai ti ni, si aadunga taata wa gure te.

Ti regbo Ime Akangbii, aˈuru 30 naaningia diwi sa. (Bam. P. 7:11, 24; 8:3, 4) Kusa, dagba aEbere, gu karendaria nga ga diwi anaadunga sa nga kina aˈuru 30 te. Tipa aEbere, ramediwi anaatona ho si anidu ni nga aboro ima rengba ka bi vovo diwi. Gure aningia aˈuru 29 watadu 30 tifuo tona kura diwi.

Ti kura regbo sa, aDavide na Yonatana afura tipa vovo diwi nga: “Fogo diwi akúra gba.” (1 Sam. 20:5, 18) Si nawiraha wa rogo 11 agarã Mbata fu Batikayo Kristo, i anaageda adiwi mbu regbo kindi koyo. Ono waigu aYisaraere anaaino gu regbo vovo diwi anaatona ti ni? Misina naaningia dungura dungura andiko gbiati asino mangaapai nga ga aYudo anaafu bete atingidapai afu. Si nayugo gupai nga fuo aYudo karagatiyo Babera yo, ga aYudo abororondo (ga aYudo kikindigipa agbia-ngbanga) anidu kina rogo pa geda adiwi. Rogo saba adiwi nga gu i anaamanga apumbo ti ni, ga aYudo kikindigipa agbia-ngbanga anaadungura tiyo rogo 30 uru nga ga diwi. Agu akumba re du nanaadia berã tipa gu regbo kura diwi nika tona ti ni. Waigu i anirengbe ka diaberã tipa gipai re?

Agu akumba nanaaraka rii abaagangara yo mbembedi na Yerusarema anaangera kuari yo yuru tipa ka bi gu bambata regbo vovo diwi nika kura ti ni. I anaapehe niipo fu ga aYudo Abororondo. Ho agu abororondo re anaabi gupai ni nga gipai re nga rengo nga agu akumba re ima bi vovo diwi, i anaape pa gu regbo nibasa vovo diwi nika tona ti ni. Ono na ka si anidu nga nduro watadu dubo anaakiso rago ka agu akumba nanaaraka  rii abaagangara yo abingo fogo diwi ya? I anaape gupai nga gu diwi re na aˈuru 30, na vovo diwi kini tona.

Tipa ka pepa gu regbo vovo diwi natona ti ni, i anaagindo we rii Bagangara Aeraya yo nga gu naanidu mbembedi na Yerusarema. Agu aboro naanidu tuturũ Yisaraere yo anaamangasunge na we tipa si gbataka gi pangbanga re. Kusa, i anaamangasunge na aboro kaa keda yo i naandu kaa pe agi apangbanga re. Ngba gi gene re, agu aYudo naanidu Yerusarema yo, Yisaraere yo, na rogo kura aba, anaaino pa tonatona vovo diwi. I dunduko anirengbe ka manga apumbo ti kina bangisa regbo sa.

Gu kekeapai du na gbakigbaki ahe ima rengba ka undo ro mo rugu tiro na pa wai ga aEbere adiwi, regbo apumbo, na regbo kura apai anidu kina sa.