Nicolas na Céline agbiatiyo na gu kpakarapai naadu kia. I aidi gu sunge gu be-basunge nga ga France afuhe fuyo nga i ga ku rogo vovo dungurati. I ape gupai nga: “Ti tonatonaha, ani adu na bakere ngbarago, ono ani atona ka zingo tipa abakurearani. Ani aadunga kindi mbembedi na agu awirina naadu rogo gaani vovo dungurati te.” a Mbiko gupai nga si ima rengba kadu ni kpakarakpakaraha, waigu rengbe mo kadu na ngbarago na kini mangi gamo apai wenengai ho mo aga ni ku rogo vovo dungurati? Ginipai rengbe kura aboro ka mangaha ka undo? Na ngba gini agene rengbe mo ngbaha ka nyakasa kura aboro rogo gamo vovo dungurati na i ki nyakasi ro?

ABANGUA ARUGUTE BIATA NIKA UNDO RO MO INIDI TIRO NA GAMO VOVO DUNGURATI

1. Mo kido kuti Yekova. (Tam. 37:5) Kazumi, du Japan yo, aguari rogo gu dungurati ri aima dia agarã 20 ku rogoho ho kumbari agbia sunge ni nga gu nasa ko ko ga ku rogo kura ba. Waigu ri afu gari “pai ku be Yekova”? Ri aya: “Mi auka kpotore yo fu Yekova tipa gu gberãrago, du nisase, gbiati bakabangirise mi adu rogoho. Ai gu regbo mi anaamanga gipai re, mi anaagbia gu ome mi anaaidaha.”

Waigu rengbe mo ka kiiso gamo kido kuti Yekova? Kina wai kurukuru ahe aida na ime gbiati sende tipa ka sona wenengai, kina wo a si aida ani naariga gaani idapase tipa si naasona. Nicolas, i nipepa ko kusayo abi gupai nga pa berãko kurii agu akpiapai nga ga Abarayama, Yesu, na Pauro​—nga agu akumba nambupa gayo apai ka manga gupai Mbori akpinyemuhe​—anyakasi gako kido kuti ga Yekova undo. Ka mo aawisigo Baibiri dedede, gipai re  nika undo ro mo dibe ai kpakarapai rogo gamo raka yo, na mo nika wirika agu apai nga gu rengbe mo ka mangasunge na ni ka ngarasa kura aboro rogo gamo vovo dungurati.

2. Ka mo naaringbisanga gamo kuru dungurati na gamo vovo dungurati ya. (Batu. 7:10) Jules amangi ariapai kuti gu sino mangaapai naadu kia ti gu ko ainihe ho ko aguari ni Benin yo ka ga ku Amerika yo. Ko aya, “Mi aabihe nga si naida mi pepa agu apai dunduko du tipa tire fu ai gu vovo boro mi anaagbia ni.” Mbiko gipai re adu kia ti gupai ko ainidi he, ko atona kpara tiko ti dungurati. Ono tie, tingbafuo ko tona inido tiko na awirina wenengai, ko aˈaria gako bipai. Ko aya: “Awere, mi ima ye ka ino gupai nga, ai gu ba du ani rogoho auru kpotosende, aboro dunduko kina sa. Gupai gbua duho nga i nafura na kini mangipai kia. Si ni nyanyakipa pai ka mbu aboro i du kina wai du yo.” Sidu, si naida mo ne ringbisa gamo kuru dungurati na gamo vovo dungurati. Wa gu kura wirina sa ni nazakigene nga Anne-Lise, apehe, “Mi aga ku rogo vovo dungurati mbiko mi aaida ka wirika vovo apai, angianga mbiko gupai nga mi adu na gu maabangirise nga apai dunduko rogo gimi vovo dungurati nika du kina sa nzunzu wakina wai si adu rogo gu ba mi aguari rogoho ya.”

Si naida abaakumba ne gupai a nga kaa ringbisa gayo vovo dungurati na gayo kuru dungurati. Mbiko gupai nga awirina namangapai kia rogo gamo vovo dungurati ti wai si adu rogo gamo kuru dungurati ayugongo gupai ti aregbo dunduko nga i namangapai ngba iraira gene te. Si adu ni patatamana ka ino agu apai mbata du rogo gu dagbarago re mbata fu mo fu berãpai. (Batu. 3:1, 7b) Si adu ni wenepai ka yugopai fu agu awirina du rogo gu dungurati re na gamo wene kpiapai susi gu nga ka ida ka sa yo ngbaome i ni berẽ kina wai mo aberã.​—2 Kor. 1:24.

3. Mo naamangapai rogo gamo vovo dungurati. (Frp. 1:27) Wa vura duhe nga si nadia bakere asadatise na regbo ho boro aga ni ku rogo kura ba, si ni nyanyakipa pai ka tona nduge nibasa ti kina tonatonaha tipa adunguratise rogo gamo vovo dungurati. Agu awirina du rogo gamo vovo dungurati naida kaa bi ro dedede tipa wa ka i mbedi na mo na i kidu na rengba ka undo ro. Lucinda, nga gu ri naga na awiiri ue ni adegude ku rogo bakere gbata sa South Africa yo, aya: “Abakureami aundo re nga, si nika ida mi moiberãre wenengai kuti agu aboro du rogo gimi vovo dungurati, kini tungusipai na agu akurayo, na kini fu akaragapai ti regbo adunguratise. Ani ape gupai a fu awirina nga i ima rengba kaa manga gu dunguratise nga ga sunge tungusapai kpurani.”

‘Niru’ mo nyanyaki watadu ni manga mo agu asunge nga ga dungurati wa sa na awirinamo, si nika undo ro mo nyakasi tiro gbiati kura aboro. Anne-Lise, i nipepa ri kusayo agbia ngarasaro be abaakumba tipa ri asadi kaa tungusapai na aboro dunduko rogo gari vovo dungurati. Sangbanaha angia gine? Ri aya, “Mi aye ka rugatire niipo na gupai nga, gere nangia bawene gene tipa kadu ni papara dungurati.” Na berewe a, pa fu mo tiro kaa manga agu asunge du wa giriso Bambu Kindo na kini bandaha nika yugo gupai nga mo nabi gu dungurati du mo  rogoho awere re nga si nga gamo dungurati. Wa mo nika tona manga agi apai re ni ipiipihe, awirina nika du wenengai na mo zanga gunde na mo nika bihe nga gamo aborokporo du re.

4. Mo sonosi vovo pabakure. (2 Kor. 6:11-13) Ka aboro ini gupai nga mo naberãpa yo aberã, si nadu taata mo du ni bakurea yo. Sidu, mo mangi mbakadapai kaa ndu tipa adunguratise mbata fu si tona na ki sungu tifuo nyasa dunguratise tipa wa ka mo du na regbo ka fura na aboro na ka ino yo. Mo asadi ka ino arimo yo. Ho mo atingida rimo aboro ni na kini fura na yo zaaza, na si kidu taata fuyo i fura na mo, i nika ida ka ino ro na si nawiraha wa oni nika daada ni abakure.

Kuba gupai nga kaa bakabangiro singia agu awirina du rogo gamo vovo dungurati aida na mo, mo mbu awirinamo i ini ro kina wai du mo. Mo wirikipai be Lucinda naya, “Ani na mbembedi pabakure awere mbiko ani amangi diandue ka yamba kura aboro ku kpurani.”

‘ONI DI AKUARONI KU GUME’

Rimo ku Bambu Kindo yo ki bi kina vovo kpakpu aboro dunduko ima rengba ka gundesi kura aboro. Sidu, waigu rengbe mo ka saha taata fu agu aboro yego ku rogo gamo dungurati? Gu mokedi nangia Pauro afu gu ngarasaro nga ‘oni di akuaroni ku gume,’ “wa di Kristo roni a ku gume.” (Rom. 15:7) Ni wirika abaakumba Kristo, i ima rengba ka undo vovo aboro i bihe nga i ima dia yo kugume. (Oni bi gu sanduki nga, “ Ginipai Nika Undo na pa ga mo ku Rogo Vovo ba si Susi Wenengai?”) Ono tie, aboro dunduko rogo dungurati kodihe na agude, ima rengba ka undo vovo aboro ka i dunga na gunde ya.

Dia aboro kugume nakoda apai wa yamba aboro ku kpuro yo, ono si ima rengba ka koda fu undo a rogo mangimangipai yo. Ni kpiapai, kura wirina sa ni dee afu gari regbo ka yugo gbata fu wirina ni dee naye ni vovo ri na ki yugu wai furi ka dia aũnduge. Gupai gu wirina re amangihe aima zio ngbaduriyo na ki undo ri ri iniditiri na vovo aboro gbiati gari vovo rago.

MOMU TIPA KA MANGA SONAKUMBATAYO

Ho yere anyaka ni, u naura gu sisiru du ti ni bara dunguhe mbata fu apoporu du na rengba ka gu.  Wakina gure a, ho mo aga ni ku rogo vovo dungurati, si naida mo mbu ai gupai nasa ro mo du na bakabangirise nga gu naká na mo ti manga mo bakere asunge tingba ga Yekova sunge. Nicolas na Céline aya, “Ga ku rogo kura vovo ba nga bawene rabahe. Inido ani tirani na vovo aboro gbiati vovo rago nangarasa rani ani sonosi vovo asino.” Jean-Charles, i nipepa ko ti tonatona gi kekapai re apepa wai gako aborokporo nagbia undo: “Rogo gaani vovo dungurati, awirani ima da ni nyanyaki aboro gbe rogo toro yo na i ima mbeda gbe na Yekova. Tifuo bete adiwi gbua, gu wirani nga degude atona ka manga apaparaha ti regbo gu dunguratise nga ga bebere poso na gu wirani nga kumbagude ada ni gu batungusipai ata ziongo bapatiza ya.”

Na ka si du nga agu apai du tipa ro ambunga ro mo ga ku rogo kura ba te, ni kpiapai, ka ga ku rogo gu ba du na bakere zingo abatungusipai rogoho? Mo rengbe ka sa gamo kuru dungurati si du ni vovoho foro ni mangapai kuti bete agu aberãpai i napepa ha rogo gi kekeapai re. Wa mo nikaa kido kuti Yekova, mo naamanga sunge rogo gamo dungurati ni manga mo mbakadapai kaa tungusapai na kura aboro na kini zi vovo abakure na agu aboro mo naima ino yo. Isoke mo ima rengba ka diandue ka undo agu aboro du ni vovo yo watadu naida na undo rogo mangimangipai yo. Wa duhe nga nyemuse nayugo ndikidi aKristano, undo mo kura aboro ima rengba ka mbedisa ro gbe na Yekova. (Yo. 13:35) Mo ima rengba kadu na gu kido nga, “ngbatunga gi rũhe re, si ngba ti Mbori.”​—Eb. 13:16.

Ka akpakarapai vura du vurũ, badungu aboro ima du na rengba kadu na ngbarago na kini mangi dungu weneapai rogo gayo vovo dungurati​—na si ima rengba kadu a wo tipa ro! Anne-Lise aya, “Pa aria mi adungurati ima undo re mi zaki kpotore yo.” Kazumi ima du na gu kido awere nga, pa ga mo ku rogo vovo dungurati ima rengba ka sa ro “mo bi wai Yekova aundo ro kisusi gu nidu mbata.” Na ginipai tigaha du tipa Jules? Ko aya: “Agu abakure mi nazihe ima undo re mi naabi tire nga mi kina kporo. Mi ima mbeda awere gbe na gimi dungurati na si ima rengba kadu ni kpakarakpakaraha fere mi guari kusayo rogoho.”