GUPAI ABORO APEHE

Badungu aboro nabi ba ake wa gu mbaro adunga na kerepai ti ni ya, ka si du nga aboro nangihe ringbisihe kuti andiko. Gu kura ngbatunga ba ake kinaho i asigiraha kuti ndiko, wa gu kura ngbatunga ba ake irangbii asongodaha asongoda, si naye na gu mbakadapai naundo aboro dunduko.

GUPAI ZIAZIA KEKEAPAI AGUMBAHA

Baibiri agumbanga pa nyanyakipa pai tipa ake te. Wa vura duhe wo, si ima fu badungu arugute nga gu rengbe ka nungusa rani tipa ka yugo wai Mbori abi ba ake.

Bete agu apai nidu rogo ba ake yo—ka nze nigbia marã rii ngongo aboro—si natagbaga tihe na gu ga Baibiri zahe nga “ka oni dí nga ngbiti ahe ya.” (Ruka 12:15) Ni rengo, ngbaduse du nasonosa gupai nga ga ba ake. Agu abasunge nabipa ba ake natakapande pa bakere diabese, ono ka i amanganga pai niruru he tipa agu amomu du aboro na ni tipa ka gbia gu diabese re ya, bambiko i ima ino gupai nga pa berã agu aboro nangihe ka da ni airakumuko nika sayo i moi bakere marã. Kuba gupai nga ba ake ngarasi aboro i mbu gu sino nga ga ngbaduse, si narimiso nyemu gbia marã ngba taata gene.

Ba ake naru riipa gu sasa nga ga gbangbati: ka gbia gu mara kura abangi ake nazanga ru. Ono tie, Baibiri nangarasa boro ka ni “gbáta nga gani he ya, ono gu ngba fu kurani.” (1 AKorindo 10:24) Na ndiko sa dagba Agu Andiko Naadu Bawe aya: “Ka mo kpí nga . . . [nyemu] agu ahe dunduko nga ga kuaro” ya. (Gate 20:17) Ho bangi ake amaa ngbaduni ni ka gbia bakere mosoro, si wa ka i ya ni namaabangirini tipa kura aboro zanga gayo marã tipa wa ka ni gbia undo.

Baibiri a nafu zahe tipa kaa bi gupai nga ga wenepia wa gu bakere ome nga gu naye na amaku. Rogo gu ringara aYisaraere nadumbata, kura aboro adu kinaho naadu nga na idapase kuti Mbori ya na i atona ka ‘maa mbisa tipa gu mbori nga ga wenepia ko.’ Ya mo Mbori arengbe ka idapa ngbatunga gu ranigose re fu “gu mbori nga ga wenepia ko”? Oó, ko aya fuyo wẽ: “Oni amangi gu pai gberẽ agberã bangire, ki sia gu pai rago angba nga ti re be he ya.”—Yesaya 65:11, 12, NW.

Rengo ngaha nga, rogo gu kura apapara zegino, i namangasunge na agu amarã i agbiaha ti gu sunge ba ake i aima sigiraha ka tumo marã sukuru, ka sonosa rago, gbiati gu kura ambakadapai du tipa aboro dunduko. Ono pa mangasunge na gu marã re aʹarianga pa wai i agbia ru te—nga vurube gu mangaapai nangarasa gu sino nga ga ngbaduse na gbangbati na kini sonosi gu berãpai nga ka gbia guhe boro amanganga sunge amanga tipaha ya.

“Ka mo kpí nga . . . [nyemu] agu ahe dunduko nga ga kuaro” ya.—Gate 20:17.