WIRIKAPAI 4
Da Nga Yesu Kristo?
1. Wai ga Yesu raka atona?
Gini asino Yesu nasa aboro i niye fuoko?—MATAYO 11:29; MARAKO 10:13-16.
Yesu araki ngbangbaturũ yo nitoro mbata fu i vunguko auru kpotosende. (Yoane 8:23) Ko aundo Mbori ti kusa kura ahe. Ko nga gu bangisa boro kina Yekova nitiko akusiko, na si du i ayambako ti ni nga “bangisa vungu” nga ga Mbori. (Yoane 1:14) Yesu amangisunge nibagumba fugo Mbori, si du i ayambako ti ni nga “Pai.”—Mo gedi Asanza 8:22, 23, 30; AKorosaio 1:15, 16.
2. Tipagine Yesu aye ti ni ku auru kpotosende no?
Mbori akedi Wiriko ku auru kpotosende no niˈariako gako unga ngbangbaturũ yo ku rukumbu gu ngasudee yo nangia Yudo rimori angia Maria. Si du Yesu aadunga ti ni na bako niboro nga ga kpotosende ní ya. (Ruka 1:30-35) Yesu aye ku auru kpotosende no tipa apai biata: (1) Ka yugo rengo tipa Mbori. (2) Ka maa kpiapai furani tipa wai ka manga ga Mbori pai zavura ho duhe ni nga ani ngbapai. (3) Ka fu gako rengberengbe unga ‘nimotumo’ tipa rani.—Mo gedi Matayo 20:28.
3. Tipagine si aidi ti ni i tumo rirani?
Motumo nga guhe i afuhe ka batasa boro ngba kpio yo. (Gate 21:29, 30) Anga kpio na gbinza nangia ga Mbori ringbisapai tipa aboro te. Wai ani aino gipai re? Mbori aya fu bambata kumba nga Adamu wee, ka ko mangi gupai Ziazia Kekeapai ayambaha nga “ingapai,” ko kpiakpi. Ka Adamu aamanganga ingapai ya, ka ko akpingo te. (Bambata Pai 2:16, 17; 5:5) Ziazia Kekeapai nayawee kpio “akuru” kurogo gi zegino re mbiko Adamu. Adamu aye na ingapai kurii awiriko gbiati sangbanaha nga kpio. Si aidi i tumo rirani tipa ani bati be sangbana gu ingapai ani adihe ti Adamu.—Mo gedi ARomo 5:12; 6:23.
Da narengbe ka fu motumo tipa ani bati be kpio? Ho boro akpi ni, ní nagbia kina mosoro gani ingapai nitini. Kpakpa boro ho rengbe ka tumo tipa gu ingapai nga ga kurani te.—Mo gedi Atambuahe 49:7-9.
4. Tipagine Yesu akpi ti ni?
Yesu angia rengberengbe boro. Ko aakpingo tipa ka gbia mosoro gako ingapai te, bambiko ko aamanganga ingapai wagu tooni te. Ono Yesu akpi tipa ga aboro ingaapai. Mbori ayugu gako dudunguro nyemuse tipa aboro nikedako Wiriko ko kpi tipa rani. Yesu ayugu nyemuse tigako tipa rani nigiako sangba Bako ki ye ka fu ungako tipa gaani ingaapai.—Mo gedi Yoane 3:16; ARomo 5:18, 19.
Mo bi gu vidio re Tipagine Yesu Akpi Ti Ni?
5. Ginipai Yesu amangaha awere?
Ho Yesu aduni auru kpotosende, ko ahusi aboro kaza, ki zingisi kangba aboro, na ki batasi aboro be kereapai. Gere ayugu gupai ko nika mangaha kumbatayo fu agu aboro dunduko duna giasangbaa. (Matayo 15:30, 31; Yoane 5:28) Fuo kpi Yesu, Mbori azingisiko nitoro ko ki ga ku ngbangbaturũ yo. (1 Petero 3:18) Yesu asungu ku kumbabe Mbori yo ka pido gu regbo Mbori nika fu ome fuko ko zogorago nibakindo ku auru kpotosende dunduko. (AEbere 10:12, 13) Yesu nazogarago awere nibakindo ngbangbaturũ yo, na apefuoko natakapande gu wene pangbanga re rogo zegino dunduko.—Mo gedi Daniere 7:13, 14; Matayo 24:14.
Barambeda, Yesu nika mangasunge na gako ome wangia ko Bakindo ka digiso arungo kusayo dunduko na agu aboro naye nani. Agu aboro dunduko duna idapase kuti Yesu na kini gisangbako, i nika raka wene raka rogo paradizo auru kpotosende ane.—Mo gedi Atambuahe 37:9-11.
