LECCIÓN 5
Bí rzelachhi Dios ki Lichhileyoni
1. Bixhkié bhen Dios Lichhileyó
Jeobá benhe Lichhileyó kuenda suaka bene lawenaʼ. Katí benhe Adán len Eva bi bhene leke para suake yibá. Dios chikalá benhe ángeles na suake yibá. Lo Biblia rne: «Yibá naka ki Jeobá, pero Lichhileyó chi bdeʼ ki benachi» (Salmo 115:16; Job 38:4, 7). Jeobá bzué Adán ga sdan rhelawe Edén (Génesis 2:15-17). Lhézekan gónhene bin kieke suake yatzajyolaj len tzalasa lo Lichhileyó. Blaba Salmo 37:29.
Letiga Lichhileyó goka to paraíso. Adán len Eva rhala suá bin kieke na kan yodzake Lichhileyó len tzawelachhi gonke Lichhileyoni paraíso (Génesis 1:28). Lichhileyó zeajlí naka ga suá ka bene len bi bata yiniti. Lo Biblia rne: «Leʼ benhe Lichhileyó tzotzorhá; len bi bata ida na kan gata tzalasa» (Salmo 104:5).
Byo video ¿Por qué creó Dios la Tierra?
2. Bixhkié birhe naka naʼn Lichhileyoni to paraíso
Tan Adán len Eva bi bzenágake kíe bebeaje leke lo jardín ki Edén. Tanka beniti paraíso na binho rzéke yiyonká ta yobla. Lo Biblia rne Lichhileyó zua lonaʼ bene malha (Job 9:24). Blaba Génesis 3:23, 24.
A waka inerha bigoka Jeobá gonhe kanha benhe kuenda ki bene Lichhileyó. Bí naka kan, Jeobá naake bene wezékie gon yogoté len ta rneʼ bi bata te kanzi (Isaías 45:18). Ta zi zaalha, Dios gonhe ka bene yizuakaké kateka gónhene katí gzoló. Lo Biblia rne: «Bene golalachhi waka kieke Lichhileyó, len wezuake yatzajyolaj tan gatadaʼ yeladza chhiatzawe. [...] Katí bene malha yinítike lí welelho» (Salmo 37:11, 34).
3. Nonaka yiyaka ta yobla Lichhileyoni to paraíso
Jesús, Bene Rnebé lo Yelarnebé ki Dios, yiyonhe lo Lichhileyó to paraíso. Tzaxhen len ka ángeles, yosnitie yogoté bene rlékene ziʼ Dios, lo dila rhelawe Armagedón. Katinaʼ, Jesús kséyaje Satanás non 1,000 yíza, tan bhen na Adán len Eva bi bzenágake ki Dios. Bene yechhi ki Dios telake lo dila gonhe, Jesús gákalenhe leke len gonchiʼe leke na kan wezuake tzalasa lo Paraíso. Lo Biblia rne Dios «yoxhié nisa ze loke, na yelagoti birhe bata gata, len yelarhonrbechhi ni yelarhebanhe ni yelarheguirlá» (Revelación [Apocalipsis] 21:4). Blaba Revelación 20:1-3.
4. Bata yiyochhi yelarheguirlá
Bata yosniti Dios ta malha. Jesús gdixhajeʼ bí gaka na gakabeʼ chi zua gaagoze gonhe kan. Ta banachhi chi rhaka lo dzanandza rlué chi dzarha «lo dza rheyochhilachhi ki lichhileyoni». Blaba Mateo 24:3, 7-14, 21, 22.
Tzalaka snebé Jesús Lichhileyó non 1,000 yíza yibate, yosnitie tan rsakayá rhoʼ (Isaías 9:6, 7; 11:9). Jesús naake bene rnebé len gáke bxhozi yiajlo, gaka loneʼ yiguiele dolaxhkiá ki bene rhékiekene Dios. Tanka, Dios ugónhene chhin Jesús na yiguiele yelargolha len «yosnitie tzalasa yelagoti». Katí Yelarnebé ki Dios chi zua «nitó bene sué naʼ birhe iné: ‹Rhaka xhwea›» (Isaías 25:8; 33:24).
5. Nó bene suake lo Paraíso
Lo Yoʼo ga Rhedóbika bene yechhi ki Jeobá gonbelho bene rhékiekene Dios len rhonke chhin kíe
Bene rzenágake ki Dios leke suake lo Paraíso (1 Juan 2:17). Jesús kséle bene glachhilenke leʼ na dzajdilajke bene rhajxhenkene ksédike na gonke ta rheyolachhi Dios. Lo dza naʼn, Jeobá rsédiene millónkane bene bí rhala gonke kuenda suake lo Paraíso (Sofonías 2:3). Bene rheajke lo Yoʼo ga Rhedóbika bene yechhi ki Jeobá, ga yogoté familias rheajneláchhike toxhen Dios, na ryedie bene len nigolha notzaganake naʼka skuake chhiʼa len xhcheke lo yoʼo kieke chhiaʼterhe na rzike banheza ki rson chhiágazi zaa lo Biblia. Blaba Miqueas 4:1-4.
