Ra ziluxe siglu XIX nga bizulú historia stiʼ ca testigu stiʼ Jehová ni nuu yanna. Lu ca iza que, ti grupuhuiiniʼ de binni ruundaʼ Biblia ni guleza ndaaniʼ guidxi Pittsburgh (Pensilvania, Estados Unidos) gudíxhecaʼ ti modo guni estudiarcaʼ Stiidxaʼ Dios. Bichaagacabe ni rusiidiʼ ca religión né cani rusiidiʼ Biblia. Despué bizulú gúdxicabe binni ni caziidicabe. Guleecabe libru, bicaacabe tema ni guiree lu periódicu ne bíʼnicabe revista ni runibiaʼnu yanna casi Torre stiʼ ni rapa. Ni caníʼ de Reinu stiʼ Jehová.

Tobi de ca estudiante que láʼ Charles Taze Russell. Neca laabe nga primé binni ni biʼniʼ revista Torre stiʼ ni rapa ne biiyabe modo gusiidicabe binni de Biblia tiempu que, peru cadi caníʼ diʼ nga laabe gundisastibe ti religión nacubi. Ni gudixhe ique Russell ne ca Binni Ruundaʼ Biblia (zacá biree lácabe dxiqué), nga gacanecaʼ binni ganna cani bisiidiʼ Jesucristu ne para gúnicaʼ ni biʼniʼ ca xpinni Cristu ni bibani lu primé siglu. Ne cumu Jesús nga gudixhe chuʼ ti grupu binni sananda laa la? riénedu laabe gundisastibe religión stidu (Colosenses 1:18-20).