GUNÁʼ de cani bizéʼtenu riʼ raʼbuʼ jneza yaʼ. Stale tu riuulaʼdxiʼ ca diidxaʼ ni guníʼ Saulo, ni runibiaʼnu casi apóstol Pablu. Riguuni gana ne riguixhedxí ni ladxidoʼcaʼ (Hechos 17:26, 27). Lu Biblia ridxélanu xcaadxi diidxaʼ ni riguu gana laanu. Casi lu ti oración biʼniʼ Jesús, guniʼbe zanda gunibiáʼ ca xpínnibe Dios ne guicaacaʼ ndaayaʼ stiʼ (Juan 17:3).

Peru guyuu caadxi filósofo gadxé modo guníʼ íquecaʼ, tobi de laacabe nga Filón. Guníʼcabe qué zanda gunibiaʼnu Dios purtiʼ qué riénenu ximodo laa. Yanna, gunapeʼ nga ni dxandíʼ yaʼ.

Biblia ruzeeteʼ nuu cosa ni raca nagana para laanu guiénenu de Dios. Tobi de laacani nga pabiáʼ tiempu de nuube ne pabiáʼ nuu xpiaanibe. Qué zanda diʼ gánnanu ne cuʼ biaʼnu cani bizéʼtenu riʼ, purtiʼ xquendabiaaninu qué rugaanda guiene cani. Neca qué gánnanu ca cosa riʼ de Dios qué rucueeza cani laanu de gunibiaʼnu laabe. Laga jmaruʼ racanécani laanu guidxíñanu gaxha de Dios ni bizáʼ laanu (Santiago 4:8). Guidúʼyanu caadxi cosa ni qué randa riénenu, ne despué zadúʼyanu xcaadxi cosa ni randa riénenu.

QUÉ ZIUU DXI GÁTIBE. Sicaríʼ rusiidiʼ Biblia: «Guiráʼ dxi huadiʼdiʼ ne guiráʼ dxi chitiidiʼ lii nga Dios» (Salmo 90:2). Qué gápabe ra bizulú xquendanabánibe ne nin ra guiluxe ni, qué ziuudxí gátibe. Para binni guidxilayú «nabé nandxóʼ Dios ne qué zanda gunibiaʼnu laabe nin gánnanu panda iza nápabe» (Job 36:26, Traducción en lenguaje actual).

Xiñee naquiiñeʼ gánnanu ni. Maʼ guníʼ Dios zápanu guendanabani ni qué zaluxe pa gunibiaʼnu laa (Juan 17:3). Ñee nisaca ni guniʼbe ca pa qué nibánibe xadxí la? Nga runi, Dios si ni «qué ziuu dxi guiaana dxí [...] de guni mandar» zanda guni ni maʼ guníʼ (1 Timoteo 1:17).

XQUENDABIAANIBE. Sicaríʼ na Biblia de Dios: «Qué zanda diʼ gánnanu xiná xquendabiaanibe» (Isaías 40:28; 55:9). Nga runi, lu Biblia zeeda ca guendarinabadiidxaʼ riʼ: «Tu laa zanda guiene xi riníʼ ique Dios yaʼ, o tu laa zanda usiidi laabe» (1 Corintios 2:16).

Xiñee naquiiñeʼ gánnanu ni. Neca tobi si ora guni orar millón de binni randa rucaadiaga Dios laacaʼ (Salmo 65:2). Cadi guiníʼ íquenu qué zulabi Dios laanu ne qué zucaadiaga laanu purtiʼ nuu xhiiñaʼ. Dede ora gatiʼ ti manihuiiniʼ ránnabe ni, nga runi stiidxabe rabi laanu: «Jma risaca tu que ca mani huiiniʼ» ca (Mateo 10:29, 31).

MODO RÚNIBE DXIIÑAʼ. Biblia rusiidiʼ qué ziuu dxi guiénenu «guiráʼ ni bizáʼ Dios ni dxandíʼ dede dxi bizulú guiráʼ cosa dede ra biluxe cani» (Eclesiastés 3:11). Nga runi, qué ziuu dxi gánnanu guiráʼ xixé cosa de Dios. Né stale guendabiaaniʼ rúnibe dxiiñaʼ dede que riénenu cani (Romanos 11:33). Neca zacá, rusiidibe ca cosa riʼ ca binni racalaʼdxiʼ gusiecheʼ laabe (Amós 3:7).

Xiñee naquiiñeʼ gánnanu ni. Pa ruundaluʼ Biblia ne riníʼ íqueluʼ ni ruundaluʼ, qué zusaana de guiziidiluʼ xiixa nacubi de Dios ne de cani chiguni. Nga runi, biaʼ tiica dxi tiidiʼ qué zusaana de guidxíñanu gaxha de Dios.

Dxandíʼ, qué zanda guiénenu guiráʼ cosa de Dios, peru qué riníʼ diʼ nga qué zanda gunibiaʼnu laabe. Lu Biblia ridxélanu stale cosa ni racané laanu guizíʼdinu de laabe. Guidúʼyanu caadxi ejemplu.

LABE. Biblia rusiidiʼ laca Dios gulí lá. Sicaríʼ nabe: «Naa nga Jiobá. Nga nga laʼyaʼ». Jma de gadxe mil biaje rieeteʼ lá riʼ lu Biblia; gástiruʼ sti lá ni jma rieeteʼ casi laani (Isaías 42:8).

Xiñee naquiiñeʼ gánnanu ni. Lu oración de padrenuestro, Jesús guníʼ: «Bixhózedu ni nuu guibáʼ, guisácapeʼ laluʼ» (Mateo 6:9, TNM). Nga runi, ora guni orarluʼ guníʼ lá Dios. Zulá Jiobá guiráʼ binni guni respetar lá (Romanos 10:13).

RA NUUBE. Biblia ruzeeteʼ nuu chupa lugar ra nuu guendanabani. Tobi nga Guidxilayú ra nuunu riʼ ne stobi ca nga guibáʼ (Juan 8:23; 1 Corintios 15:44). Gatigá riquiiñeʼ Biblia diidxaʼ guibáʼ para guiníʼ lugar ra nuu ca ángel, ca espíritu bizáʼ Dios. Ne laaca guibáʼ ca nga ra nuu Dios (1 Reyes 8:43).

Xiñee naquiiñeʼ gánnanu ni. Ora guiénenu ni, qué zaca nagana para laanu guiénenu ximodo nga Dios. Cadi ti stipa ni canazá guiráʼ  ladu nga laabe. Dxandíʼ nuu Jiobá ne dxandíʼ lugar ra nuube ca. Dede lugar ca ruuyabe guiráʼ ni cayaca. Biblia na: «Gasti nuu ndaani guidxilayú ni qué zanda guʼya Dios» (Hebreos 4:13).

MODO LAABE. Biblia rusiidiʼ napa Jiobá stale guenda nabé sicarú ni rucaa binni guidxiña laa. Ruzeeteʼ ni «de Dios nga reeda enda ranaxhii», «qué rusiguii», runi ni jneza, rilaselaʼdxiʼ, riaʼ ne cadi casi zeʼ ridxiichi (1 Juan 4:8; Tito 1:2; Éxodo 34:6; Hechos 10:34). Peru ni jma ridxagayaanu nga gánnanu racaláʼdxibe gaca xhamígube cani guni respetar laabe (Salmo 25:14).

Xiñee naquiiñeʼ gánnanu ni. Guníʼ ique: ¡lii zanda gaca xhamíguluʼ Jiobá! (Santiago 2:23.) Ra jma gunibiaʼluʼ modo naca Jiobá, jma ziéneluʼ caadxi relatu zeeda lu Biblia.

Biblia ruzeeteʼ ximódopeʼ nga Jiobá Dios. Cadi nácabe tobi ni qué zanda gunibiaʼnu, sínuque laapebe racaláʼdxibe gaca xhamígube laanu. Stiidxabe rabi laanu: «Pa guyúbiluʼ laabe la? zudiibe lugar guidxélaluʼ laabe» (1 Crónicas 28:9). Pa guidúʼndanu Biblia ne guiníʼ íquenu ni guidúʼndanu, zunibiaʼnu Dios ne «laa zadxiña gaxha» de laanu (Santiago 4:8).

Zándaca riníʼ íqueluʼ pa qué randa riénenu guiráʼ cosa de Dios ni bizáʼ laanu laaca qué zanda gácanu xhamígube. Peru guníʼ ique ndiʼ: ñee naquiiñepeʼ gápaluʼ título de doctor para ganda gaca xhamíguluʼ ti cirujanu la? Coʼ. Zándaca gadxé dxiiñaʼ runi xhamigu ti cirujanu. Peru qué rucueeza nga de gaca xhamígucabe pa xhamígube ca runibiáʼ chaahuiʼ ximodo laabe, xi riuuláʼdxibe ne xi qué riuuláʼdxibe. Zacaca nga para gaca xhamíguluʼ Jiobá, naquiiñeʼ gánnaluʼ ximodo laabe.

Lu Biblia zeeda guiráʼ ni zacané laanu gunibiaʼnu Dios ni bizáʼ laanu, purtiʼ qué rucaachiʼ ni xiixa de laabe. Ñuuláʼdxiluʼ ñaca xhamíguluʼ laabe la? Ziuulaʼdxiʼ ca testigu stiʼ Jiobá gúʼndanecaʼ lii Biblia. Galán pa guiníʼneluʼ laacabe o zanda cheluʼ lu sitiu www.pr418.com/zai.