Guleʼ ndaaniʼ guidxi Moundsville, ti guidxi ni riaana ruaa guiiguʼ Ohio, ladu guiaʼ de Virginia Occidental. Gupaʼ chupa bicheʼ ne ti bizanaʼ, ne naa nga guiropa xiiñiʼ bixhozeʼ ne jñaaʼ, ngue runi nabé guca ridxi ralídxidu. Bixhozeʼ ne jñaaʼ gúcacaʼ binni runi dxiiñaʼ ne qué ñuu dxi nibáʼnacaʼ stiʼ stobi ne nadxiicaʼ binni, qué ñácadu ricu, peru qué ñuu dxi ñaadxaʼ ni niquiiñedu. Cumu testigu stiʼ Jiobá bixhozeʼ ne jñaaʼ la? ngue runi bíʼnicabe stipa pur gusiidicabe laadu cani zeeda lu Biblia dede nahuiinidu.

Peru dxi maʼ ziniiseʼ maʼ gadxé ni guyuuladxeʼ, ngue runi maʼ qué ninanda cani bisiidicabe naa. Guníʼ iqueʼ pa zanda gacané cani zeeda lu Biblia naa para guibaneʼ galán. Naa rabeʼ ni zacané naa guibaneʼ nayecheʼ nga cadi chuʼ tu guni mandar naa, sínuque gacaʼ libre. Ngue runi, qué nindaa maʼ qué ñaaʼ ca guendaridagulisaa. Ti bicheʼ ne ti bizanaʼ yenándacaʼ neza ca ziaa que. Bixhozeʼ ne jñaaʼ biyúbicaʼ modo ñacanecaʼ laadu, peru qué nuzúʼbadu stiidxacaʼ.

Qué niníʼ iqueʼ pa cani guneʼ que zucaa naa guiabaʼ lu ti viciu ni guniná naa. Ti dxi zendaʼ de scuela, bidxaagaʼ ti xhamiguaʼ ni bidii naa ti gueza ne gudubaʼ ni. Dede dxi que maʼ bizulú bineʼ stale cosa ni bininá naa, gudubaʼ guixi, guxudxeʼ ne guyuaaniáʼ tutiica. Ra zidiʼdiʼ iza maʼ gudubaʼ droga ni jma bininá naa ne beeda gacaʼ casi ti esclavu stiʼ ca viciu que. Pur ca viciu ca dede bituaaʼ guixi para gapaʼ bueltu.

Ora maʼ cuchiiñaʼ xquendabiaaneʼ naa, runeʼ stipa pur cadi gulabeʼ ni, peru laga jma rusietenalaʼdxiʼ ni naa cadi jneza modo nabaneʼ. Guníʼ iqueʼ maʼ qué zanda diʼ gusaanaʼ modo nabaneʼ que. Ne stale biaje bineʼ sentir nuaaʼ stubeʼ ne triste neca nuaʼ lade binni ora riaaʼ saa ne ora riaaʼ xiixa conciertu. Guyuu biaje guníʼ iqueʼ nabé nachaʼhuiʼ bixhozeʼ ne jñaaʼ ne galán nabánicaʼ ne guníʼ iqueʼ xiñee bineʼ guiráʼ guenda qué iquiiñeʼ que.

Neca guníʼ iqueʼ qué ziuu dxi guchaaʼ la? xcaadxi binni qué niníʼ ique zacá. Lu iza 2000, biʼniʼ invitar bixhozeʼ ne jñaaʼ naa chaaʼ ti guendaridagulisaa de chonna gubidxa stiʼ ca testigu stiʼ Jiobá. Ne guyaaʼ neca qué gapaʼ gana. Guizáʼ bidxagayaa ora biiyaʼ laaca guyé bicheʼ ne bizanaʼ, cani bireechú casi naa que.

Ora nuaaʼ ra cayaca guendaridagulisaa que bietenalaʼdxeʼ raqueca guyaaʼ ti conciertu ra bixhídxicabe rock. Ora biiyaʼ maʼ gadxé ca binni que, yendá ngue ndaaniʼ ladxiduáʼ. Dxi guyaaʼ conciertu que guiráʼ ladu biiyaʼ ríʼ guixi ne nuu stale guʼxhuʼ gueza. Stale de ca binni ni guyé raqué qué rieegucaʼ xcaadxi binni ne nabé feu ca letra stiʼ ca saa ni guxidxi raqué. Peru dxi guca guendaridagulisaa que guizáʼ nayá lugar que ne nabé sicarú ni bisiidicabe. Raqué guyuaaʼ lade binni ni dxandíʼ nabani nayecheʼ ne galán modo bidxagalucaʼ naa neca maʼ xadxí de qué huayuuyacaʼ naa. Ora biiyaʼ pabiáʼ racané Stiidxaʼ Dios binni, bicaa ngue naa guiníʼ iqueʼ xiñee bisaanaʼ ni (Isaías 48:17, 18).

Qué nindaa de guyaa guendaridagulisaa que gudixheʼ iqueʼ guibiguetaʼ ndaaniʼ xquidxi Dios. Zaqueca biʼniʼ bicheʼ ne bizanaʼ, purtiʼ laaca guyuuláʼdxicaʼ ni bíʼyacaʼ lu guendaridagulisaa que. Ne guiónnadu bizulú biindanécabe laadu Biblia.

Ca diidxaʼ ni cá lu Santiago 4:8 riʼ yendácani ndaaniʼ ladxiduáʼ: «Laidxiña gaxha de Dios, ne laa zadxiña gaxha de laatu». Bidieeʼ cuenta pa racalaʼdxeʼ guidxiñaʼ Dios la? naquiiñeʼ guchaaʼ modo nabaneʼ. Ne laaca biiyaʼ naquiiñeʼ gusaanaʼ de cubaʼ gueza, droga, gueeʼ nisadxuʼniʼ ne xcaadxi cosa (2 Corintios 7:1).

Bixeleʼ de ca xhamiguaʼ ne maʼ biyubeʼ gaca xhamiguaʼ cani runi adorar Jiobá. Ne tobi de cani nabé gucané naa nga ti xpinni Cristu ni naca binnigola ne laca laabe biindanebe naa Biblia. Ne gatigá riníʼnebe naa pur teléfono ne rigánnabe naa para gúʼyabe ximodo nuaaʼ. Dede yanna laabe nga tobi de cani jma xhamiguaʼ.

Lu primavera stiʼ iza 2001 guyuaanisaʼ para gusihuinneʼ maʼ bidieeʼ naa Jiobá, ne zaqueca biʼniʼ bicheʼ ne bizanaʼ. Guníʼ ique pabiáʼ nayecheʼ guyuu bixhozeʼ, jñaaʼ ne bicheʼ ni jma nahuiiniʼ, ni qué nusaana de ñuni ni na Dios, purtiʼ maʼ guiradu runi adorardu Jiobá tobi si.

Dxiqué guníʼ iqueʼ rucueeza ca conseju ni zeeda lu Biblia binni guni cani racalaʼdxiʼ, peru yanna maʼ ruuyaʼ nabé racanécani binni. Biblia gucané naa para gusaanaʼ droga que ne maʼ cadi gutuaaʼ ni ti ganda guneʼ ni jneza.

Nabé risaca para naa nga nuaaʼ lade binni ni zeeda gaca casi ti familia ni nuucaʼ tobi si para guni adorarcaʼ Jiobá ne dxandíʼ nadxiisaacaʼ (Juan 13:34, 35). Ládecabe bidxelaʼ Adrianne, xheelaʼ, ne nácabe ti ndaayaʼ nabé risaca para naa. Nabé nadxieeʼ laabe ne guizáʼ runeʼ respetar laabe. Nabánidu nayecheʼ purtiʼ cayúnidu ni na Jiobá, Dios ni bizáʼ laadu.

Lugar de guyubeʼ puru si para naa, riquiiñeʼ tiempu stinneʼ para gusiideʼ binni pabiáʼ zacané Stiidxaʼ Dios laacaʼ guibánicaʼ galán. Dxiiñaʼ ca nga ni jma rusiecheʼ naa. Zanda guiniéʼ de guidubi ladxiduáʼ Biblia nga gucané naa guchaaʼ xquendanabaneʼ. ¡Yanna huaxa nga maʼ libre naa!