CÁSIPEʼ biʼniʼ sentir Kingsley gudapa huiinicabe xiqueʼ bizuluca libana stiʼ. Ndiʼ nga primé biaje tiidibe lu Scuela stiʼ cani Rucheeche Diidxaʼ. Né stale cuidadu guniʼbe cada tobi de ca diidxaʼ que sin nusiaadxabe ti sílaba. Peru guendaridxagayaa: cadi cayuuyabe lu Biblia stibe. Xiñee yaʼ.

Kingsley, guleza ndaaniʼ guidxi Sri Lanka, qué ñuuyaʼ, qué ñunadiaga chaahuiʼ ne biquiiñeʼ ti silla de rueda. Ximodo binibiaʼbe Jiobá ne xi bíʼnibe para gunda gudíʼdibe lu Scuela stiʼ cani Rucheeche Diidxaʼ yaʼ. Chitidxeʼ lii ximodo.

Primé biaje biiyaʼ Kingsley, bidxagayaaʼ ora biiyaʼ pabiáʼ riuuláʼdxibe gánnabe cani dxandíʼ rusiidiʼ Stiidxaʼ Dios. Maca biindané ca testigu stiʼ Jiobá laabe, peru qué ñanda niníʼsibe lu stiidxaʼ Dios. Nápabe libru El conocimiento que lleva a vida eterna lu diidxaʼ braille ne nabé maʼ bioʼxhoʼ ni. * Gudxeʼ laabe pa zuundaniáʼ laabe ne laabe gunabe, peru nápabe chupa guendanagana.

Primé guendanagana gúpabe nga gulézabe ndaaniʼ ti yoo ra rápacabe ca binni ni maʼ nagola ne ni huará, ne nabé raca ridxi raqué. Ngue runi, gupa xidé gunieeʼ reciu para gunda bicaadiágabe. ¡Nabé nadipaʼ gunieniáʼ laabe ne guiráʼ tu nuu raqué runadiaga!

 Guiropa guendanagana gupa Kingsley nga nabé nanene para guiziidiʼ, raca nagana para laa guiene ni cayuundaʼ. Para guiziidibe jma nagueenda, ruundaʼ chaahuibe: chupa chonna biaje ruundabe libru stibe, ruyúbibe ca textu lu Biblia ni nápabe lu diidxaʼ baille ne riníʼ íquebe ximodo guicábibe; sicaríʼ nabé nagueenda biziidibe. Ora maʼ caziidibe ruzeechuñeebe lu alfombra stibe, rudiibe golpehuiiniʼ layú, né gana rusiénebe ni caziidibe ne riniʼbe ni nadipaʼ. Qué nindaa yegannaʼ laabe chupa biaje lu ti semana, ne cada biaje chaaʼ rindaʼdu chupa hora.

Guizáʼ maʼ napa Kingsley gana cheʼ reunión, peru gúcani nagana para laabe purtiʼ caquiiñeʼ chuʼ tu gacané laabe cuibe lu silla de rueda stibe, para quíbabe ndaaniʼ carru ne chuʼbe ndaaniʼ Yoo stiʼ Reinu. Peru ca hermanu que raca turnarcaʼ para gacanecaʼ laabe; ne riuuláʼdxicabe gúnicabe ni. Ora rié Kingsley reunión riquiiñeʼ ti bocinahuiiniʼ ne ruchiña ni ra diaga para ganda gucaadiaga chaahuiʼ ne guicabi.

Ti tiempu despué de cayuundaniáʼ laabe, gudixhe íquebe tiidibe lu Scuela stiʼ cani Rucheeche Diidxaʼ. Chupa semana ante de gudiibe primé libana stibe, gunabadiidxaʼ laabe pa cayuni ensayarbe. Nagueendaca bicábicabe naa: «Maʼ bineʼ ensayar ni treinta biaje, bicheʼ». Gudxeʼ laabe galán ni cayúnibe ne gudxeʼ laabe gúʼndabe ni para gucaadiaʼgaʼ laabe. Bixhélebe Biblia stibe, gudíxhebe ca bicuinabe luni ne bizulú biindabe. Peru bidieeʼ cuenta, huaxiéʼ cuniibibe ca bicuininabe casi runi ca binni ni qué ruuyaʼ. ¡Biziidibe ca versículo que de memoria!

Qué guirá guidxagayaaʼ ni biiyaʼ que. Qué nusaana de ñete nisa luaʼ laga cayuuyaʼ laabe. Ora bilúxebe gunabadiidxaʼ laabe ximodo gunda bietenaláʼdxibe guiráʼ ca versículo que pa treinta biaje si biindabe ni. Óraque bicábibe naa: «Coʼ bicheʼ, runeʼ ensayar ni treinta biaje ti dxi». Maʼ zinebe ti beeu de ribibe lu alfombra stibe ne maʼ cayuundabe ca versículo que dede biziidibe cani de memoria.

Despué bedandá dxi gutiidibe libana que. Ora biluxe Kingsley libana stiʼ, nabé nadipaʼ gudapanáʼ ca hermanu que, ne stale tu biinaʼ pur stipa ni bíʼnibe que. Ti gunaa xpinni Cristu ni maʼ qué ridiʼdiʼ lu Scuela stiʼ cani Rucheeche Diidxaʼ purtiʼ nabé ridxibi, gudixhe ique tiidiʼ sti biaje. Xi bicaa laabe gúnibe ni yaʼ. Laabe guniʼbe: «Pa gunda biʼniʼ kingsley ni la? naa laaca zanda».

Despué de chonna iza de cayuundaʼ Kingsley Biblia, guyuunisa 6 stiʼ septiembre 2008. Qué nusaanabe de ñúnibe ni na Dios dede dxi gútibe, 13 stiʼ mayo 2014, peru nánnabe zúnirube xhiiñaʼ Jiobá ndaaniʼ Paraísu ra maʼ ziuube nazaaca (Isaías 35:5, 6). (Paul McManus guníʼ ni bizaaca.)