Jesús cadi casi binni guidxilayú laa, purtiʼ primeru gúcabe ti espíritu guibáʼ ante gálebe ndaaniʼ Guidxilayú (Juan 8:23). Laabe nga bizáʼ Dios primé, ne despué gucanebe Bixhózebe guca guiráʼ xixé cosa ni nuu. Biblia na laabe nga «tobi lucha Xiiñi Dios» purtiʼ stubi si Dios bizáʼ laabe. Laaca runibiáʼcabe laabe casi «Diidxaʼ», purtiʼ laabe guniʼbe ni racalaʼdxiʼ Bixhózebe (Juan 1:14). Biindaʼ Proverbios 8:22, 23, 30 ne Hebreos 12:1.

Dios biseendaʼ Xiiñiʼ lu Guidxilayú riʼ ra guluu xquendanabánibe ndaaniʼ María, ti baʼdudxaapaʼ de Judea. Ngue runi Jesús qué ñapa diʼ bixhoze ndaaniʼ Guidxilayú (Lucas 1: 30-35). Laabe beedabe lu Guidxilayú pur chonna razón: 1 ) para gusiidibe laanu ni dxandíʼ de Dios, 2 ) para gusiidibe laanu né ejemplu stibe ne zacá gúninu ni na Dios neca guidxaagalunu guendanagana, ne 3 ) para gudiibe guendanabani sin donda stibe ti gulabe laanu. Biindaʼ Mateo 20:28.

Pa gacalaʼdxiʼ tuuxa gulá xquendanabani ti binni ni chiguuticabe la? naquiiñeʼ quixe para ganda gulá laabe (Éxodo 21:29, 30). Nin guendaguti nin guendarioʼxhoʼ cadi zeeda diʼ lade guiráʼ ca cosa ni gudixhe ique Dios para binni guidxilayú. Xiñee nánnanu ni yaʼ. Nánnanu ni purtiʼ gudxi Jiobá Adán zati pa guchee o pa qué guzuubaʼ diidxaʼ. Ne pa ñaca qué nucheebe la? qué ñuu dxi ñátibe (Génesis 2:16, 17; 5:5). Biblia ruzeeteʼ pur Adán nga guyuu guendaguti lu Guidxilayú. Zacá  nga bisaanané Adán guendaruchee ca xiiñiʼ ne pur nga ráticabe. Nga runi guiranu caquiiñenu tu quixe pur laanu ti guilanu. Biindaʼ Romanos 5:12 ne 6:23.

Yanna, tu laa zanda quixe para ganda guilanu de lu náʼ guendaguti yaʼ. Ora rátinu riguíxenu pur donda stinu. Cumu nácanu binni ruchee la? nin tobi de laanu qué zanda quixe pur donda stiʼ sti binni. Biindaʼ Salmo 49:7-9.

Gadxepeʼ Jesús de laanu purtiʼ laa qué ñalené donda ne qué ñuu dxi nuchee. Nga runi, gútibe para quíxebe stonda guiráʼ binni ne cadi para quíxebe stóndabe. Ora biseendaʼ Dios Xiiñiʼ para beeda gati pur laanu, bisihuínnibe nabé nadxiibe binni guidxilayú. Ne Jesús bisihuinni nadxii laanu ra bizuubaʼ stiidxaʼ Bixhoze ne ra bidii xquendanabani ti gulá laanu de lu naʼ guendaruchee ne guendaguti. Biindaʼ Juan 3:16 ne Romanos 5:18, 19.

Biiyaʼ videu ni láʼ Xiñee guti Jesús

Dxi guyuu Jesús lu Guidxilayú bisiándabe binni huará, bisibánibe gueʼtuʼ ne gucanebe cani cadiʼdiʼ lu yuubaʼ, zaqué bisihuínnibe xi zúnibe pur ca xpinni Dios despué (Mateo 15:30, 31; Juan 5:28). Ora guti Jesús bisibani Dios laa de lade gueʼtuʼ ne biasa casi espíritu para guibani guibáʼ (1 Corintios 15:44). De raqué guyuube ladu derechu stiʼ Dios ne gulézabe raqué dede ora gudxi Dios laabe maʼ zanda guni mandarbe Guidxilayú (Hebreos 10:12, 13). Yanna maʼ cayuni mandar Jesús guibá, ne ca discípulo stibe maʼ cayábicaʼ binni ni nabeza lu guidubi naca Guidxilayú xi cayúnibe. Biindaʼ Daniel 7:13, 14 ne Mateo 24:14.

Ne maʼ qué zandaa zaquiiñebe poder ni maʼ bidii Dios laabe para gunduuxebe ca binni malu ne guiráʼ yuubaʼ cutiidicaʼ binni. Guiráʼ cani napa fe Jesús ne ruzuubacaʼ stiidxabe zabánicaʼ nayecheʼ lu Guidxilayú, dxi maʼ gácani ti paraísu. Biindaʼ Salmo 37:9-11.