LECCIÓN 5
¿Xha ná xhgab xhte Dios par lo Guixliú?
1. ¿Xhi ní beinché Dios Guixliú?
Jehová beinché Guixliú par kuez de bniety loni. Chi beini Adán ne Eva, kɨt guktideb par ibaindeb guibá, Dios a bein de ángl par ibáin rik (Job 38:4, 7). Jehová blú primer bniety nguiu laʼn tuby jardín ni bdielá Edén (Génesis 2:15-17). Zikza repni laab dek zak nibainba nasáʼ lo Guixliú ne kɨt chuʼti dxi niatyba kun de irate de xiʼnba ni niuʼ. Bily Salmo 37:29 ne 115:16.
Jardín xhte Edén gukni tuby ldazí lo Guixliú. Adán ne Eva na par niuʼ xiʼndeb te zik nidaaly de bniety lo Guixliú par duxga, duxga niak idubte lo Guixliú tuby paraíso (Génesis 1:28). Idubtiempte Guixliú gakni rut kuez de bniety, ne kɨt chuʼti dxi initloni. Bily Salmo 104:5.
Mira el video ¿Por qué creó Dios la Tierra?
2. ¿Xhi ní kɨt nati lo Guixliú tuby paraíso?
Pur ni kɨt bkuadiág Adán ne Eva xhtidx Dios, guleeni laadeb laʼn jardín xhte Edén. Pur nii, gunity paraíso ki, ne kɨt tú ruyntigan guynzakni. Xhtidx Dios rní dek Guixliú nuʼ laznaa de bniety ni ná mal (Job 9:24). Bily Génesis 3:23, 24.
Per, ¿lá a bienlaaz Jehová xhgab ni gupni par de bniety guixliú? Kɨt rienlaaztini, laani nani Todopoderoso ne irate ni rnini rakpakni (Isaías 45:18). A zedial, Dios guyn dek galnabáin xhte de bniety guixliú gak zik ni guk xhgab xhtenni desd auyak. Bily Salmo 37:11, 34.
3. ¿Xha ikuby Dios paraíso?
Jesús, zik Rey xhte Galrnabee xhte Dios guynni lo Guixliú tuby paraíso. Kun de ángl initlodeni irate ni kɨt rkuadiág xhtidx Dios lo guerr xhte armagedón. Chikruʼ izeuni Bendxáb pur tuby mil iz, ángl mal ni bein kɨt ni kuadiág Adán ne Eva xhtidx Dios. De siervos xhte Dios zbaindeb chi initló de bniety mal, Jesús iní laadeb xhi guyndeb ne ikualoni laadeb, chikruʼ nasáʼ ibaindeb lo paraíso ne kɨtruʼ chuʼti dxi gatydeb. Bily Apocalipsis (Revelación) 20:1-3 ne 21:3, 4.
4. ¿Gúk lduxh galzí?
¿Gúk lduxh Dios kun de mal ni nuʼ? Jesús bded tuby «seny» par iliuʼni dek zedial dxi ki. De ni kayák na reʼ, ruyn nagán galnabáin xhte de bniety guixliú, nde rliuʼ «dek a mer ilduxhni irate de galnagán ni nuʼ lo Guixliú». Bily Mateo 24:3, 7-14, 21, 22.
Lo tuby mil iz ni Jesús inabee lo Guixliú desd guibá, duxhga izikani de galzí ni nuʼ (Isaías 9:6, 7; 11:9). Kum gakni Rey ne sumo sacerdote, laani iziani de duld xhte de bniety ni rkáz Dios. Zikni, pur Jesús, Dios izika irate de galguidx, galbɨngúl, ne galguty. Bily Isaías 25:8 ne 33:24.
5. ¿Tú de ní ibáin lo Guixliú chi gakni tuby paraíso?
Yuʼ rut rdxágsaʼ de testigu xhten Jehová rik guynbebiú de bniety ni rkáz Dios ne rkazdeb guyndeb voluntá xhtenni.
De bniety ni ikuadiág xhtidx Dios laadeb ibaindeb lo paraíso (1 Juan 2:17). Jesús bxhel de seguidores xhtenni par chitildeb de bniety ni rkazpak ikuadiág xhtidx Dios ne guyndeb ni riulaaz Dios lo galnabáin xhtendeb. Na reʼ Jehová kaliuʼ millón de bniety par ibaindeb lo paraíso (Sofonías 2:3). De ni red laʼn yuʼ rut rdxágsaʼ de testigu xhten Jehová rut irate famíl reddeb par guyndeb servir lo Dios rzeddeb xha na par ikazdeb chieldeb, ne xha gak xhmoddeb kun de xiʼndeb ne xha rakné de didx zák ni rní xhtidx Dios laadeb. Bily Miqueas 4:1-4.
