喺印度古吉拉特邦嘅一個小鎮，約翰嘅爸爸60年前受浸成為一個耶和華見證人。約翰同佢嘅五個兄弟姊妹，仲有佢媽媽，都係虔誠嘅羅馬天主教徒，所以佢哋都反對爸爸嘅信仰。

有一日，約翰嘅爸爸叫佢送封信俾會衆嘅一個弟兄。嗰日朝早，約翰開一個大鐵桶嗰陣，割傷咗隻手指，傷口好深。雖然係噉，約翰仲係好想按爸爸嘅話去做。跟住佢攞塊布包住隻手指，就行出去送信嘞。

約翰到咗嗰度，呢個弟兄嘅太太係耶和華見證人。約翰遞封信俾姊妹嗰陣，姊妹發現佢隻手指受咗傷，就馬上攞個急救箱出嚟，幫佢消毒同包紮傷口。之後，姊妹仲沖咗杯熱茶俾約翰飲，同埋一直好友善噉同佢講聖經。

喺呢個時候，約翰對見證人嘅偏見開始改變。佢想知道耶和華見證人同天主教喺信仰方面有咩唔同，所以佢問姊妹兩個問題，一個問題係耶穌係咪上帝，另一個問題係基督徒應唔應該向馬利亞禱告。因為呢位姊妹學過古吉拉特邦語，所以就用約翰嘅母語，通過聖經回答佢嘅問題，仲送咗本《這王國的好消息》册子俾佢。

當約翰睇緊呢本册子嗰陣，佢覺得自己第一次睇到聖經真理。佢去問神父同樣嘅問題。神父即刻發脾氣，攞本聖經掟佢，大聲嗌：“你呢個撒但！聖經邊度話耶穌唔係上帝，邊度話唔可以崇拜馬利亞，指俾我睇吓吖！”神父嘅反應令約翰好震驚，所以佢同神父講：“我以後都唔會再踏入天主教堂一步。”之後佢就冇去過嘞！

約翰開始同見證人學習聖經，擁護真理同埋開始事奉耶和華。後來，其他幾個家庭成員都係噉樣做。今日，約翰右手隻食指仲有嗰條60年前留低嘅疤痕，呢條疤痕令佢諗翻起一個美好嘅回憶，就係一個基督徒小小嘅舉動，吸引佢認識真理，而且用一生去事奉耶和華。（哥林多後書6:4,6）