你知唔知道?
点解耶稣话喺圣殿卖祭牲嘅商人系“强盗”呢?
根据马太福音嘅记载,“耶稣入咗圣殿,将圣殿里面做买卖嘅人全部赶晒出去,又推冧兑钱商嘅台同埋卖鸽嘅人啲凳。耶稣同佢哋讲:‘圣经话:“我嘅圣殿要称为祷告嘅殿。”但系你哋就将佢变成强盗嘅巢穴!’”(马太福音21:12,13)
犹太历史显示,圣殿里面嘅兑钱商坐地起价,向需要购买动物祭牲嘅人牟取暴利。比如话,白鸽本来系好平嘅,穷人可以买得起,用嚟献俾上帝。不过,古代犹太文献记载,喺公元1世纪,如果人想买两只白鸽,就要俾一个金第纳流斯。当时一般工人要做25日先赚到咁多钱。但系啲白鸽卖到咁贵,穷人根本买唔起。(利未记1:14;5:7;12:6-8)一个叫西缅·本·迦玛列嘅犹太教拉比大发义愤,减少咗犹太人要献嘅祭物数量。结果,两只白鸽嘅价钱,即刻跌到原价嘅百分之一。
呢班喺圣殿做买卖嘅商人贪得无厌,靠剥削穷人嚟谋利,耶稣话佢哋系“强盗”,的确系好啱嘅。