Brookeeʼ juntúul u testigo Jéeoba kajaʼan Estados Unidos. Le táan le COVID-19, tu tsʼáaj u yóol predicar yéetel cartaʼob. Yaʼab cartaʼob tu tsʼíibtaj cada semana. Chéen baʼaleʼ lúub u yóol tumen durante año y medioeʼ chéen juntúul máax núuktiʼ, tsʼoʼoleʼ le máax núukoʼ chéen utiaʼal u yaʼalik maʼ u kaʼa túuxtaʼal uláakʼ carta tiʼ. Yoʼolal lelaʼ Brookeeʼ tu tukleʼ chéen en vano u xachkuba u tsʼíibt cartaʼob.

 Ka máan kʼiineʼ, Kim, uláakʼ juntúul Testigoeʼ tu tsikbaltaj tiʼ Brooke le baʼax tu yaʼalaj juntúul máak bin teʼ banco tuʼux ku meyajoʼ. Le máakoʼ tu yaʼaleʼ tu kʼamaj junpʼéel carta tsʼíibtaʼan tumen juntúul u testigo Jéeoba, ¡lelaʼ junpʼéel tiʼ le cartaʼob u tsʼíibtmaj Brookeoʼ! Ka máan junpʼéel semanaeʼ le máakoʼ suunaj teʼ bancooʼ ka tu yaʼalaj tiʼ Kim wa jeʼel u béeytal u láakʼintikoʼob teʼ reuniónoʼoboʼ, teʼ kʼiinoʼob jeʼeloʼ ku beetaʼal tiʼ videoconferencia.

 Maʼ úuch tiʼ lelaʼ, David, uláakʼ juntúul Testigoeʼ tu tsikbaltaj tiʼ Brookeeʼ juntúul u yéet meyajeʼ tu kʼamaj xan junpʼéel tiʼ le cartaʼob u tsʼíibtmoʼ, le máakoʼ jaʼakʼ u yóol ka tu yileʼ le cartaaʼ chéen yéetel u kʼab máak tsʼíibtaʼan. Le máakoʼ tu yaʼalaj: «Bukaʼaj jatsʼutsil wa tuláakal máak ka u interesartuba tu yoʼolal u maasil». David túuneʼ tu aprovechartaj utiaʼal u predicar tiʼ u yéet meyajoʼ, tu kʼáataj xan tiʼ wa jeʼel u xokik junpʼéel publicacióneʼ, letiʼeʼ tu yaʼaleʼ jeʼeleʼ, ka tu tsʼáaj u diosboʼotikil.

 Toʼon u testigoʼon Jéeobaeʼ maʼ k-ojel tuʼux ken u tsʼáa u yich le meyaj k-beetkoʼ (Eclesiastés 11:5, 6). Chéen baʼaleʼ, le experienciaʼob tsikbaltaʼab tiʼ Brookeoʼ tu beetaj u yilkeʼ tuláakal le baʼaxoʼob ku beetik máak utiaʼal u tsikbaltik u tʼaan Diosoʼ jach ku taasik yaʼab utsiloʼob (1 Corintios 3:6).