Tu añoil 2005, juntúul koʼolel India u taal ku kʼaabaʼtik Sowbhagyaeʼ kíim u yíicham. Pʼáat chéen yéetel u chan hija de tres años ku kʼaabaʼtik Meghana. Le ka úuch lelaʼ jach istikyaj tu yilil u kaxtik u kuxtal letiʼ yéetel u chan hija.

 Tu tsʼook xaneʼ Sowbhagyaeʼ káaj u pʼektaʼal tumen u maasil máakoʼob yéetel maʼ maʼalob bix u tratartaʼaloʼob tumen u láakʼtsiloʼobiʼ. Ku yaʼalaʼaltiʼob chéen caridad ku maan u beetoʼob yéetel chéen problemas ku taaskoʼob tiʼ u láakʼtsiloʼob. Utiaʼal u kaxtik áantajeʼ Sowbhagyaeʼ káaj u bin tiʼ junpʼéel iglesia yaan teʼ kaajoʼ, chéen baʼaleʼ como óotsiloʼobeʼ maʼ maʼalob u tratartaʼaloʼobiʼ. Sowbhagyaeʼ káaj xan u kaxtik meyaj utiaʼal ka yanak junpʼíit taakʼin tiʼ, pero kex jeʼel baʼalak ka u beeteʼ mix máak tsʼáaik meyaj tiʼ.

 Sowbhagyaeʼ ku yaʼalik: «Pʼáat maʼ tin kaxtik bey baʼax jeʼel in beetkeʼ, le oʼolal tin chʼaʼtuklaj in kíimskinba. Pero tin tuklaj xaneʼ in chan hijaeʼ yaan u sen sufrir wa ku pʼáatal tu juunal, ka tin chʼaʼtuklaj in luʼsik in kuxtal yéetel u kuxtal». Sowbhagya túuneʼ bin u man veneno utiaʼal u kíimskubaʼob.

 Le táan u suut Sowbhagya tu yotoch teʼ trenoʼ náatsʼ juntúul u testigo Jéeoba tu yiknal ku kʼaabaʼtik Elizabeth ka túun káaj u tsikbaloʼob. Sowbhagyaeʼ tu tsikbaltajtiʼeʼ minaʼan meyajtiʼ, Elizabetheʼ tu yaʼalajtiʼeʼ jeʼel u yáantik u kaxt meyajeʼ. Tu yaʼalaj xan tiʼeʼ táan u bin u xíimbalt wa máax utiaʼal u tsʼáaik xook tiʼ yéetel le Bibliaoʼ. Sowbhagyaeʼ jaʼakʼ u yóol ka tu yuʼubaj baʼax aʼalaʼabtiʼ tumen kex tsʼoʼok u bin tiʼ yaʼab religiónoʼobeʼ mix juntéen u yuʼub u yaʼalaʼal wa ku tsʼaʼabal xook tiʼ máak yéetel le Bibliaoʼ. Elizabetheʼ tu invitartaj Sowbhagya ka xiʼik tu yotoch wa u kʼáat maas kaanbal tiʼ le Bibliaoʼ.

 Le ka kʼuch Sowbhagya tu yotocheʼ láayliʼ u chʼaʼtukultmaj u kíimskubaeʼ. Chéen baʼaleʼ juntúul tiʼ u láakʼtsiloʼobeʼ tu bisaj Meghana de viaje. Le oʼolal tu chʼaʼtukleʼ hasta u suut u hijaeʼ ku kíimskuba tu yéetel.

 Mientras maʼ suunak u hijaeʼ Sowbhagyaeʼ bin u xíimbalt Elizabeth, letiʼ túuneʼ jach maʼalob úuchik u kʼamik tu yotoch. Le táan le tsikbaloʼ Elizabetheʼ tu yeʼesajtiʼ le libro ¿Baʼax jach tu jaajil ku kaʼansik le Bibliaoʼ? Como maʼ sen úuch kíimik u yíichameʼ Sowbhagyaeʼ jach interesante tu yilil le xook «¿Tuʼux yaan le kimenoʼoboʼ?». Teʼ kʼiin jeʼeloʼ Sowbhagyaeʼ tu yóotaj ka tsʼaʼabak xook tiʼ yéetel le Bibliaoʼ.

 Elizabetheʼ tu invitartaj Sowbhagya tiʼ junpʼéel asamblea kun beetbil teʼ semana ku taaloʼ, letiʼeʼ tu yaʼalaj jeʼel u bineʼ. Sowbhagyaeʼ jach jatsʼuts tu yilil le baʼax tu kanaj teʼ asambleaoʼ, le oʼolal tu chʼaʼtuklaj u beetkuba u testigo Jéeoba. Le táan u suut tu yotochoʼ ofrecertaʼabtiʼ junpʼéel meyaj.

 Úuchik u seguer u xokik le Bibliaoʼ Sowbhagyaeʼ anchaj u biilal u kuxtal, le oʼolal xuʼul u tuklik u kíimskuba. Ka máan kʼiineʼ okjaʼanaji yéetel okjaʼanaj xan u hija. Teʼ kʼiinoʼobaʼ tu kaʼatúulaloʼob táan u beetik u precursora regulariloʼob. Tsʼoʼoleʼ Meghanaeʼ táan xan u yáantaj tiʼ junpʼéel oficina tiʼ traducción tu luʼumil India.

 Sowbhagya yéetel u hijaeʼ jach ku tsʼáaikoʼob u graciasil tiʼ Elizabeth. Sowbhagyaeʼ jach kiʼimak u yóol tumen le táan u viajar teʼ trenoʼ Elizabetheʼ tu yeʼesajtiʼ u yutsil yéetel tu kaʼansaʼajtiʼ baʼax ku yaʼalik Dios. Chéen baʼaleʼ maases ku tsʼáaikoʼob u graciasil tiʼ Jéeoba. Meghanaeʼ ku yaʼalik: «Wa maʼ úuchik u kaʼansaʼaltoʼon u jaajil teʼ kʼiin jeʼeloʼ bejlaʼaʼ úuch kiʼ muʼukkoʼoneʼ, pero bejlaʼeʼ jach kiʼimak k-óol. Jach kin tsʼíiboltik xan ka kʼuchuk u kʼiinil u kaʼa kuxkíintaʼal in papá yéetel in kaʼa méekʼik. Yaan k-kaʼansiktiʼ u jaajil yéetel yaan k-aʼaliktiʼeʼ Jéeobaeʼ tu salvartoʼon».