Zarinaeʼ tiaʼan kaʼach Rusia le ka okjaʼanaj utiaʼal u beetkuba u testigo Jéeobaoʼ. Ka tsʼoʼokeʼ suunaj Asia Central, le luʼum tuʼux kajaʼan kaʼachoʼ. Letiʼeʼ taak kaʼach u kaʼansik tiʼ tu kaʼatúulal u hijaʼob le baʼax tsʼoʼok u kanik teʼ Bibliaoʼ. Como minaʼan taakʼin tiʼeʼ bin kajtal yiknal u taataʼob, u sukuʼun yéetel u cuñada. Letiʼobeʼ tiʼ junpʼéeliliʼ cuarto kajaʼanoʼob. U taataʼob Zarinaeʼ tu yaʼaloʼobtiʼ maʼ u kaʼansik tiʼ u paalal le baʼax ku yaʼalik le Bibliaoʼ, tsʼoʼoleʼ tu yaʼaloʼob tiʼ le paalaloʼoboʼ maʼ u tsikbaloʼob tiʼ religión yéetel u maamaʼob.

 Zarinaeʼ táan kaʼach u tuklik bix jeʼel u kaʼansik tiʼ u paalal le baʼax ku yaʼalik Jéeobaoʼ (Proverbios 1:8). Le oʼolal tu kʼáataj tiʼ Dios ka áantaʼak u yil bix jeʼel u kaʼansik u paalaleʼ. Zarinaeʼ joʼopʼ u jóokʼol xíimbal tu yéeteloʼob, beyoʼ ku meyaj tiʼ le baʼaxoʼob u beetmaj Jéeoba utiaʼal u kaʼansik u paalaloʼoboʼ. Lelaʼ tu beetaj u maas taaktal u kaanbal le paalal tiʼ Diosoʼ.

 Ka tsʼoʼokeʼ Zarinaeʼ tu kaxtaj bix jeʼel u kaʼansik u paalal yéetel le libro ¿Baʼax jach tu jaajil ku kaʼansik le Bibliaoʼ? a Letiʼeʼ ku copiartik le párrafos yéetel le preguntaʼob tiʼ mejen notasoʼ tsʼoʼoleʼ ku tsʼíibtik xan jujunpʼéel baʼaloʼob utiaʼal u maas naʼatkoʼob. Kéen tsʼoʼokkeʼ tu tsʼáaik le notas yéetel junpʼéel lápiz yáanal le lavadora yaan teʼ bañooʼ. Kéen okok u paalal teʼ bañooʼ ku xokikoʼob le notasoʼ yéetel ku tsʼíibtikoʼob le baʼax tu naʼatoʼoboʼ.

 Bey úuchik u xokik Zarina yéetel u paalal kaʼapʼéel capítuloʼob tiʼ le libro ¿Baʼax jach tu jaajil ku kaʼansik le Bibliaoʼ? Le ka tu kaxtaj tuʼux u kajtaleʼ páajchaj u kaʼansik tubeel u paalal. Tu mesil octubre tiʼ 2016, tu kaʼatúulal u paalal Zarina okjaʼanajoʼob. Letiʼobeʼ jach kiʼimakchaj u yóoloʼob tumen u maamaʼobeʼ tu kaxtaj bix jeʼel u kaʼansiktiʼob le baʼax ku yaʼalik le Bibliaoʼ.