Kaanbalnaj tiʼ le máaxoʼob kʼalaʼanoʼoboʼ
Tu añoil 2011 juntúul máak lukʼ tu luʼumil Eritreaeʼ kʼuch tu luʼumil Noruega. Le ka tʼaanaj u Testigoʼob Jéeoba tu yéeteloʼ tu yaʼalaj tsʼokaʼaniliʼ u kʼaj óoltik le Testigoʼob tu luʼumil Eritreaoʼ. Tu yaʼalaj xan tiʼobeʼ le táan u beetik u soldadoiloʼ tu yilaj bix u kʼaʼalal le Testigoʼob yoʼolal le baʼaxoʼob ku creerkoʼoboʼ. Kex maltratartaʼaboʼobeʼ maʼ tu yóotoʼob u beet u soldadoiloʼobiʼ.
Ka máan kʼiineʼ oksaʼab cárcel le máakaʼ. Teʼeloʼ tu kʼaj óoltaj Paulos Eyasu, Negede Teklemariam yéetel Isaac Mogos, letiʼobeʼ u testigoʼob Jéeoba yéetel kʼalaʼanoʼob desde tu añoil 1994.
Le máakaʼ tu yileʼ le Testigoʼoboʼ ku beetkoʼob baʼax ku kaʼanskoʼob yéetel jach utsoʼob. Jach jatsʼuts tu yilil bix u invitarkoʼob u maasil máaxoʼob kʼalaʼanoʼob yéetel le baʼax ku jaantikoʼoboʼ. Tsʼoʼoleʼ sáamsamal ku xokikoʼob le Bibliaoʼ yéetel ku yaʼalikoʼob tiʼ u maasil ka xooknakoʼob tu yéeteloʼob. Le Testigoʼoboʼ jeʼel kaʼach u chaʼabloʼob chéen yéetel ka u firmartoʼob junpʼéel documento tuʼux ku yaʼalikoʼob ku xuʼulul u beetik u Testigoiloʼob. Chéen baʼaleʼ maʼ tu beetoʼobiʼ.
Le máakaʼ jach jatsʼuts tu yilil tuláakal le baʼax tu beetoʼoboʼ. Le oʼolal ka kʼuch Noruegaeʼ taakchaj u yojéeltik baʼaxten u testigoʼob Jéeobaeʼ jach nojoch u fejoʼob. Le ka túun tsikbalnaj yéetel le Testigoʼoboʼ káaj u xokik le Biblia tu yéeteloʼoboʼ yéetel u bin teʼ tuʼux ku muchʼkubaʼoboʼ.
Tu mesil septiembre tiʼ 2018, okjaʼanaj le máakaʼ. Bejlaʼeʼ ku yilik u tsikbaltik tiʼ le máaxoʼob ku taaloʼob Eritrea yéetel Sudán le baʼaxoʼob tsʼoʼok u kanikoʼ. Tsʼoʼoleʼ ku yáantkoʼob u maas naʼatoʼob le Bibliaoʼ utiaʼal u maas nojochtal u fejoʼob tiʼ Dios.