Tu jaʼabil 1987, Lyman Swingle, juntúul máak yaan kaʼach ichil le Cuerpo Gobernante tiʼ u j-jaajkunajoʼob Jéeobaoʼ, tʼaanaj tu táan 63,580 máakoʼob muchʼukbaloʼob teʼ Plaza de Toros Monumental yaan tu kaajil Valenciaoʼ (Venezuela). Yaʼab tiʼ le máakoʼoboʼ bul áakʼab viajarnajoʼob tiʼ autobús. Lymaneʼ tu yaʼalajtiʼobeʼ jach tsʼoʼok u yaʼabtaloʼob, maʼ chéen u chan múuchʼ j-Jaajkunajoʼobiʼ. Tu yaʼalajtiʼobeʼ jach taʼaytak u chukikoʼob 100,000 j-kʼaʼaytajoʼob.

Teʼ jaʼaboʼ yaan kaʼach maas tiʼ 38,000 j-kʼaʼaytajoʼob tu luʼumil Venezuela. Le j-kʼaʼaytajoʼoboʼ letiʼe j-jaajkunajoʼob tsikbaltik baʼax ku yaʼalik le Biblia tiʼ uláakʼ máakoʼoboʼ. Teʼ kʼiinoʼoboʼ chéen tiʼ ocho luʼumoʼob yaan maas tiʼ 100,000 j-kʼaʼaytajoʼobiʼ.

Bejlaʼeʼ le j-Jaajkunajoʼoboʼ jach tsʼoʼok u yaʼabtaloʼob tiʼ tuláakal yóokʼol kaab. Ka tsʼoʼok le Yáax Nojoch Baʼateltáambaloʼ chéen wa jaypʼéel miles máakoʼob kʼaʼaytik le Reinooʼ. Baʼaleʼ maʼ bey pʼáatikoʼ. Le anuario tiʼ 1943 (1943 Yearbook of Jehovah’s Witnesses), tu yaʼalaj: «Le numeroʼob ku chíikpajal tu informeil 1942, kex maʼ chúukaʼan tumen yaan tuʼux maʼ páajchaj u túuxtikoʼob u informeʼobeʼ, ku yeʼesik bix táan u bendecirkoʼon Jéeoba [...]; ku yeʼesikeʼ bejlaʼeʼ yaan maas tiʼ 106,000 j-kʼaʼaytajoʼob [táan u kʼaʼaytikoʼob le maʼalob péektsil] tiʼ tuláakal yóokʼol kaaboʼ». Tsʼoʼoleʼ kex táan le Kaʼapʼéel Nojoch Baʼateltáambaloʼ yaʼab máakoʼob tu beetubaʼob j-Jaajkunajoʼob. Jeʼex teʼ Estados Unidosoʼ, tu jaʼabil 1950, tu chukaj maas tiʼ 100,000 j-kʼaʼaytajoʼob.

Tu jaʼabil 1974, Nigeriaeʼ tu chukaj xan 100,000 j-kʼaʼaytajoʼob.

Ka máan junpʼéel añoeʼ teʼ Brasil yéetel Alemaniaoʼ anchaj xan maas tiʼ 100,000 j-kʼaʼaytajoʼob. Jeʼex k-ilkoʼ tiʼ kanpʼéel continenteʼob yaʼabchaj le j-Jaajkunajoʼoboʼ. Lelaʼ tu yeʼeseʼ u jejeláasil máakoʼob taak u yojéeltikoʼob baʼax ku yaʼalik le Bibliaoʼ.

Le máaxoʼob kʼamik le maʼalob péektsiloʼ seguernaj u yaʼabtaloʼob tuláakal yóokʼol kaab; béeychaj baʼax ku yaʼalik le profecía yaan teʼ Isaías 60:22: «Le junpʼíit máakoʼobaʼ bíin suunak junpʼéel nojoch múuchʼ kaajoʼob. Teen Yuumtsil, teen bíin in beet u séeb úuchul, jach tu kʼiinil».

Le informe tiʼ u jaʼabil meeyjil 2014, tu yeʼeseʼ tiʼ 24 luʼumoʼob tsʼoʼok u píitmáan le 100,000 j-kʼaʼaytajoʼoboʼ. Ichileʼ táakaʼan Venezuela; teʼeloʼ tu jaʼabil 2007 ka tu chukaj le 100,000 j-kʼaʼaytajoʼoboʼ. Bejlaʼeʼ tiʼ tuláakal yóokʼol kaabeʼ yaan 115,416 múuchʼuliloʼob tiʼ u j-jaajkunajoʼob Jéeoba, yéetel yaan 8,201,545 j-kʼaʼaytajoʼob.